اسرائیل میں معمولاتِ زندگی بحال کرنے کا آغاز
اسرائیلی حکومت کا کہنا ہے کہ نصف آبادی کو کرونا ویکسین لگائے جانے کے بعد وہ معمول کی زندگی کی طرف واپس لوٹ رہے ہیں۔
اسرائیل میں دکانیں کھول دی گئی ہیں۔ تاہم تفریحی مقامات، جمز، ہوٹلز اور تھیٹرز میں صرف ان لوگوں کو جانے کی اجازت ہو گی جنہیں یا تو ایک ہفتہ قبل کرونا ویکسین کی دونوں خوراکیں لگائی جا چکی ہیں یا پھر وہ افراد جو وبا سے صحت یاب ہو چکے ہیں اور ان میں قوتِ مدافعت پیدا ہو چکی ہے۔
ان لوگوں کو وزارتِ صحت کی ایپ پر 'گرین پاس' جاری کیا جائے گا۔
اس دوران فیس ماسک پہننے اور سماجی دوری کی پابندیاں نافذ رہیں گی جب کہ عبادت گاہوں میں نصف تعداد کے ساتھ عبادت کی اجازت ہو گی۔
امریکہ: برفانی طوفان سے کرونا ویکسی نیشن مہم متاثر، ٹیکساس آفت زدہ ریاست قرار
امریکہ میں برفانی طوفان اور شدید سرد موسم کی وجہ سے معمولاتِ زندگی متاثر ہو رہے ہیں۔ طوفان کی وجہ سے ملک کے مختلف حصوں میں کرونا وبا سے بچاؤ کے لیے جاری ویکسی نیشن مہم بھی متاثر ہو رہی ہے۔ امریکہ کے صدر جو بائیڈن نے طوفان سے متاثرہ ریاست ٹیکساس کو آفت زدہ قرار دے دیا ہے۔
طوفان کے باعث اب تک دو ہزار سے زائد کرونا ویکسی نیشن سینٹرز بند ہو چکے ہیں جس کی وجہ سے 60 لاکھ افراد تک ویکسین کی خوراکیں پہنچانے کا عمل تعطل کا شکار ہو گیا ہے۔
امریکہ 14 فروری سے شدید سردی کی لپیٹ میں ہے جس کی وجہ برفانی طوفان ہے جس نے کئی ریاستوں میں نظامِ زندگی درہم برہم کر دیا ہے۔ ریاست اوکلاہوما، آرکنساس اور ٹیکساس میں شدید موسم کی وجہ سے کئی علاقے بجلی سے محروم ہیں۔
برفانی طوفان کے سبب مختلف حادثات میں ملک بھر میں اب تک کم از کم 70 افراد ہلاک ہو چکے ہیں۔
امریکہ کی فیڈرل ایمرجنسی مینجمنٹ ایجنسی کے حکام کا کہنا ہے کہ صدر بائیڈن کی جانب سے ٹیکساس کو آفت زدہ قرار دیے جانے کے بعد ریاست کے شہریوں کے لیے اضافی فنڈنگ کی راہ ہموار ہو گئی ہے۔
تیل اور گیس پیدا کرنے والی امریکی ریاست ٹیکساس میں لاکھوں لوگ بجلی سے محروم ہیں جب کہ ریاست کی آدھی سے زائد آبادی پینے کے صاف پانی سے محروم ہے۔
پاکستان میں کرونا سے مزید 38 ہلاکتیں
پاکستان میں اتوار کو کرونا سے مزید 38 ہلاکتیں رپورٹ ہوئی ہیں جس کے بعد وائرس سے مرنے والوں کی تعداد 12 ہزار 601 ہو گئی ہے۔
ملک میں اتوار کو کرونا کے مزید 1329 کیس رپورٹ ہوئے ہیں جس کے بعد مجموعی کیسز پانچ لاکھ 71 ہزار سے بڑھ گئے ہیں۔
پاکستان میں اب تک تک وائرس کی تصدیق کے لیے 86 لاکھ سے زائد ٹیسٹس کیے جا چکے ہیں۔
ملک بھر میں اس وقت 1616 مریض انتہائی نگہداشت وارڈز میں زیرِ علاج ہیں۔ پاکستان میں طبی عملے کو وائرس سے بچاؤ کی ویکسین لگانے کا سلسلہ بھی جاری ہے۔
فائزر کی ویکسین عام فریزر میں بھی دو ہفتے تک کارآمد رہ سکتی ہے
کرونا کی ویکسین پر کام کرنے والی فارماسوٹیکل پارٹنر کمپنیوں فائزر اور بائیو این ٹیک نے جمعے کے روز بتایا ہے کہ کمپنیوں کی جانب سے کی جانے والی ایک نئی تحقیق سے معلوم ہوا ہے کہ ان کی کرونا وائرس کی ویکسین اگر عام فریزر میں رکھی جائے تو دو ہفتوں تک کارآمد رہ سکتی ہے۔
فائرز کی ویب سائٹ پر دیے گئے ایک بیان میں کہا گیا ہے کہ دونوں کمپنیوں نے یہ نیا ڈیٹا ادویات پر کنٹرول کے امریکی ادارے فوڈ اینڈ ڈرگ ایڈمنسٹریشن کو جمع کروا دیا ہے کہ ان کی کرونا وائرس کی ویکسین منفی 15 سے منفی 25 درجہ حرارت میں رکھی جائے تو بھی کارآمد رہ سکتی ہے۔ یہ درجہ حرارت عموماً فارماسوٹیکل فریزر اور ریفریجریٹرز کے ہوتے ہیں۔
یہ نئی معلومات اس حوالے سے اہم ہے کہ فائزر اور بائیو این ٹیک کی کرونا ویکسین کی ترسیل میں ایک رکاوٹ یہ تھی کہ یہ ویکسین انتہائی ٹھنڈے فریزر میں ہی کارآمد رہ سکتی تھی اور اسے مارکیٹ میں عام بکنے والے فریزر میں نہیں رکھا جا سکتا تھا۔ اس ضرورت کی وجہ سے فائزر کی ویکسین کی ترسیل کی لاگت کافی بڑھ جاتی ہے اور اسے کم ترقی یافتہ علاقوں تک پہنچانا ممکن نہیں ہوتا۔