پنجاب کے 9 اضلاع میں تعلیمی ادارے بند ہوں گے
وزیرِ تعلیم پنجاب مراد راس نے اپنے ایک ٹوئٹ میں بتایا ہے کہ لاہور، راولپنڈی، گوجرانوالہ، گجرات، ملتان، فیصل آباد، سیالکوٹ، سرگودھا اور شیخوپورہ کے تمام سرکاری اور نجی تعلیمی ادارے 11 اپریل تک بند رہیں گے۔
مراد راس کے مطابق پنجاب کے دیگر اضلاع میں پرانے شیڈول کے مطابق تعلیمی اداروں میں تدریس کا عمل جاری رہے گا۔
خیبرپختونخوا کے 10 اضلاع میں اسکول بند رہیں گے
صوبائی حکومتیں مشاورت سے اسکولوں کی بندش کا فیصلہ کریں گی: شفقت محمود
پاکستان کے وفاقی وزیرِ تعلیم شفقت محمود نے کہا ہے کہ ملک کے مخصوص اضلاع میں 11 اپریل تک تعلیمی ادارے بند رہیں گے۔ صوبے اسکول بند کرنے یا نہ کرنے سے متعلق فیصلے کرنے میں آزاد ہیں۔
اسلام آباد میں نیشنل کمانڈ اینڈ آپریشن سینٹر (این سی او سی) کا ورچوئل اجلاس ہوا جس میں تمام صوبوں کے وزرائے تعلیم اور وزرائے صحت نے شرکت کی۔
بعدازاں پریس بریفنگ کے دوران شفقت محمود نے بتایا کہ صوبۂ پنجاب کے چند اضلاع اور خیبرپختونخوا کے کچھ علاقوں میں کیسز کی تعداد میں اضافہ ہوا ہے جب کہ پاکستان کے زیرِ انتظام کشمیر میں بھی کچھ اسی طرح کی صورتِ حال ہے۔
ان کے بقول سندھ، بلوچستان اور گلگت بلتستان میں بیماری کی شدت کم ہے۔ اس لیے متعلقہ حکومتیں اپنی وزارتِ صحت سے مشاورت کے بعد صوبے میں اسکولوں کو بند کرنے یا نہ کرنے کا فیصلہ کریں گی۔
بھارت میں 47 ہزار سے زائد کیسز رپورٹ
بھارت میں گزشتہ چوبیس گھنٹوں کے دوران کرونا وائرس سے مزید 275 اموات 47 ہزار 262 نئے کیسز رپورٹ ہوئے ہیں۔
بھارت کو کرونا وائرس کی دوسری لہر کا سامنا ہے جس کی وجہ سے مختلف ریاستوں میں کاروبارِ زندگی محدود کرتے ہوئے دیگر پابندیاں نافذ کی جا رہی ہیں۔
سرکاری اعداد و شمار کے مطابق ملک میں تصدیق شدہ کیسز کی تعداد ایک کروڑ 17 لاکھ سے زیادہ ہے جن میں سے ایک کروڑ 12 لاکھ سے زیادہ صحت یاب ہو چکے ہیں۔
حکام کے مطابق بھارت میں ایکٹو کیسز کی تعداد تین لاکھ 68 ہزار سے زیادہ ہے جب کہ عالمی وبا سے ہلاکتوں کی مجموعی تعداد ایک لاکھ 60 ہزار 441 ہے۔