اسکول کھولنے یا مزید بند رکھنے کا فیصلہ منگل کو ہو گا
وفاقی وزیر تعلیم شفقت محمود نے کہا ہے کہ صحت اور تعلیم کے شعبوں کے وزرائے اعلیٰ کا اجلاس منگل کو ہو گا جس کے دوران اسکول کھولنے یا مزید بند رکھنے سے متعلق فیصلہ کیا جائے گا۔
شفقت محمود کے مطابق این سی او سی کے اجلاس میں امتحانات کی صورتِ پر بھی بات چیت ہو گی۔
پاکستان میں بین الصوبائی ٹرانسپورٹ ہفتے میں دو روز بند رکھنے کا فیصلہ
پاکستان میں کرونا وائرس کی صورتِ حال کی نگرانی کرنے والے ادارے نیشنل کمانڈ اینڈ آپریشن سینٹر (این سی او سی) نے ہفتے میں دو روز کے لیے بین الصوبائی ٹرانسپورٹ بند کرنے کا فیصلہ کیا ہے۔
'این سی او سی' کے جاری کردہ ایک اعلامیے کے مطابق 10 سے 25 اپریل تک ہفتے میں دو روز (ہفتہ اور اتوار) بین الصوبائی ٹرانسپورٹ بند رہے گی۔ تاہم مال بردار گاڑیوں، طبی سامان اور دیگر ایمرجنسی سروسز کی اجازت ہو گی۔
ریلوے آپریشن ہفتے میں معمول کے مطابق بحال رہیں گے تاہم مسافروں کی گنجائش 70 فی صد تک کر دی گئی ہے۔
این سی او سی کے مطابق پابندی پر 20 اپریل کو دوبارہ جائزہ لیا جائے گا۔
بھارتی اداکار اکشے کمار بھی کرونا وائرس کا شکار
بھارت میں کرونا وائرس کی نئی لہر تیزی سے پھیل رہی ہے۔ اب تک کئی معروف شخصیات وائرس سے متاثر ہوچکی ہیں جس میں حالیہ اضافہ بالی وڈ اسٹار اکشے کمار کا ہے۔
بالی وڈ اداکار اکشے کمار نے ایک ٹوئٹ میں کرونا وائرس سے متاثر ہونے کی تصدیق کی ہے۔
ترپن سالہ اداکار نے اتوار کی صبح کی گئی اپنی ٹوئٹ میں کہا کہ ان کا کووڈ-19 کا ٹیسٹ مثبت آیا ہے۔
انہوں نے بتایا کہ وائرس کی تصدیق کے بعد اُنہوں نے خود کو الگ کر لیا ہے اور وہ اپنی ضروری دیکھ بھال کر رہے ہیں۔
بالی وڈ اسٹار نے ان تمام افراد سے کرونا ٹیسٹ کرانے کی درخواست بھی کی جو ان سے رابطے میں تھے۔
اکشے کمار کا شمار بھارت کے صفِ اول کے اداکاروں میں ہوتا ہے۔ وہ ایکشن، کامیڈی، رومانس سمیت مختلف موضوعات پر بننے والی درجنوں فلموں میں کام کر چکے ہیں۔
بالی وڈ اسٹار سے قبل ہفتے کو بھارتی کرکٹ ٹیم میں شامل اسپنر اکسر پٹیل نے بھی بتایا تھا کہ ان کا کرونا ٹیسٹ مثبت آیا ہے۔
ایک ہفتے قبل سابقہ بھارتی بلے باز سچن ٹنڈولکر میں بھی کرونا وائرس کی تشخیص ہوئی تھی۔
بھارتی کشمیر میں کیسز میں اضافے کے پیشِ نظر اسکول ایک بار پھر بند
بھارت کے زیرِ انتظام کشمیر کے حکام نے کرونا وائرس کے بڑھتے ہوئے کیسز کے پیشِ نظر تعلیمی اداروں کو ایک بار پھر بند کر دیا ہے۔
بھارتی کشمیر کے لیفٹننٹ گورنر منوج سنہا کے دفتر کی جانب سے اتوار کو جاری کیے گئے ایک بیان کے مطابق نوین جماعت تک دو ہفتے تک جب دسویں سے بارہویں جماعت تک کے لیے اسکولز ایک ہفتے کے لیے بند کیے گئے ہیں۔
واضح رہے گزشتہ دنوں وادی کشمیر میں مختلف تعلیمی اداروں کے 100 سے زائد طلبہ اور 24 کے لگ بھگ اساتذہ اور انتظامی عملے کے افراد کرونا کا شکار ہو گئے تھے۔
اتوار کو حکومت نے یہ اعلان بھی کیا کہ ہر قسم کی سماجی اور دیگر تقریبات میں زیادہ سے زیادہ دو سو افراد کو ایس او پیز کے تحت شریک ہونے کی اجازت ہو گی۔
گزشتہ ایک ہفتے کے دوران بھارت کے زیرِ انتظام کشمیر میں تین ہزار سے زائد کیس رپورٹ ہوئے ہیں جب کہ اس مہلک وائرس سے اسی عرصے کے دوران 20 افراد ہلاک ہوئے ہیں۔