پاکستان میں کرونا کیسز کی مجموعی تعداد سات لاکھ سے متجاوز
پاکستان میں گزشتہ چوبیس گھنٹوں کے دوران چار ہزار چار افراد میں کرونا وائرس کی تشخیص کے بعد کیسز کی مجموعی تعداد سات لاکھ سے تجاوز کر گئی ہے۔
سرکاری اعداد و شمار کے مطابق عالمی وبا کے شکار مزید 102 مریض دم توڑ گئے ہیں جس کے بعد ہلاکتوں کی کل تعداد 15 ہزار 26 تک جا پہنچی ہے۔
پاکستان میں اب بھی تین ہزار 769 مریضوں کی حالت تشویش ناک بتائی جاتی ہے۔
عالمی وبا کے شکار چھ لاکھ 20 ہزار سے زیادہ مریض صحت یاب ہو چکے ہیں جب کہ ملک میں ایکٹو کیسز کی تعداد 64 ہزار سے زیادہ ہے۔
برازیل: پہلی مرتبہ یومیہ چار ہزار اموات
برازیل میں گزشتہ چوبیس گھنٹوں کے دوران کرونا وائرس کے شکار چار ہزار 195 مریض دم توڑ گئے ہیں۔ اموات کی یہ تعداد برازیل میں یومیہ سب سے زیادہ تعداد ہے۔
برازیل کی وزارتِ صحت کے اعداد و شمار کے مطابق عالمی وبا سے لگ بھگ تین لاکھ 37 ہزار افراد ہلاک ہو چکے ہیں۔
امریکہ کے بعد برازیل دنیا کا دوسرا متاثرہ ترین ملک ہے۔ عالمی وبا سے امریکہ میں اب تک پانچ لاکھ 55 ہزار سے زیادہ اموات رپورٹ ہو چکی ہیں۔
برازیل میں کرونا وبا کی روک تھام کے لیے صحت کے ماہرین لاک ڈاؤن کی تجویز دے رہے ہیں۔
بھارت میں دوسری مرتبہ ایک لاکھ سے زیادہ کیسز رپورٹ
بھارت میں گزشتہ چوبیس گھنٹوں کے دوران ایک لاکھ سات ہزار ریکارڈ کیسز رپورٹ ہوئے ہیں۔ بھارت میں دوسری مرتبہ کرونا کیسز نے ایک لاکھ کا ہندسہ عبور کیا ہے۔
بھارت میں عالمی وبا کی شدت میں تیزی سے اضافہ ہو رہا ہے اور گزشتہ ایک ہفتے کے دوران یومیہ کیسز کی تعداد اوسطاً 90 ہزار کے لگ بھگ رپورٹ ہو رہی ہے۔
اتوار کو پہلی مرتبہ ایک لاکھ تین ہزار کیسز رپورٹ ہوئے تھے جس کے بعد بدھ کو دوبارہ ایک لاکھ سات ہزار کیسز رپورٹ ہوئے ہیں۔
مرکزی حکومت نے خبردار کیا ہے کہ اگلے چار ہفتے کرونا وائرس کے پھیلاؤ سے متعلق بہت تشویش ناک ہیں۔ شہری وبا کی دوسری لہر کے دوران اسے پھیلنے سے روکنے کے لیے تعاون کریں۔
تمام بالغ امریکی 19 اپریل سے کرونا ویکسین حاصل کر سکیں گے: بائیڈن
امریکی صدر جو بائیڈن نے منگل کے روز اعلان کیا ہے کہ 19 اپریل سے امریکہ کی تمام بالغ آبادی یعنی 16 برس سے زائد عمر کے تمام افراد کرونا وائرس کے خلاف تحفظ فراہم کرنے والی ویکسین حاصل کرنے کے اہل ہوں گے۔
اس سے قبل مذکورہ ہدف کے لیے بائیڈن حکومت نے یکم مئی کی تاریخ مقرر کی تھی۔
صدر بائیڈن نے کہا تھا کہ امریکہ میں 19 اپریل سے 90 فی صد بالغ آبادی کو ویکسین مل سکے گی، تاہم ویکسین کی رسد میں اضافے کے بعد اب انہوں نے اعلان کیا ہے کہ اب مکمل سو فی صد بالغ آبادی مذکورہ تاریخ سے ویکسین حاصل کر سکے گی۔
بائیڈن نے یہ اعلان امریکی ریاست ورجینیا میں قائم ایک ویکسین سینٹر کے دورے کے بعد وائٹ ہاؤس میں پہنچ کر کیا۔