پاکستان میں کووِڈ ویکسی نیشن: کیا جاننا ضروری ہے؟
پاکستان میں کرونا وائرس سے بچاؤ کے لیے سرکاری سطح پر چین میں تیار ہونے والی دو ویکسینز لگائی جا رہی ہیں جب کہ نجی شعبہ روسی ویکسین لگا رہا ہے۔ کیا یہ ویکسینز مکمل طور پر محفوظ ہیں؟ ان ویکسینز سے متعلق لوگوں کے خدشات کتنے درست ہیں اور کیا کرونا وائرس سے صحت یاب ہونے والوں کو بھی ویکسین لگوانا ضروری ہے؟ جانتے ہیں ڈاکٹر صومیہ اقتدار سے۔ نوید نسیم کی رپورٹ۔
پاکستان میں سخت پابندیوں کا عندیہ
وفاقی وزیر برائے اطلاعات و نشریات فواد چوہدری نے کہا ہے کہ اگر کرونا کی صورتِ حال میں بہتری نہ آئی تو ملک میں مزید سخت اقدامات کرنا ہوں گے جس کی تیاری کی جا رہی ہے۔
فواد چوہدری کے مطابق بھارت میں کرونا کی بگڑتی صورتِ حال کے پیشِ نظر پڑوسی ملک کے ساتھ آمد و رفت پر مکمل پابندی عائد ہے جس پر مکمل عمل درآمد ہو رہا ہے۔
پہلی مرتبہ یومیہ ویکسین لگانے کی تعداد ایک لاکھ سے بڑھ گئی، اسد عمر
وفاقی وزیر منصوبہ بندی اسد عمر نے کہا ہے کہ پہلی مرتبہ منگل کو ملک بھر میں ایک لاکھ سے زیادہ ویکسین لگائی گئی ہیں۔ ان کے بقول گزشتہ روز ایک لاکھ 17 ہزار 852 افراد کو ویکسین دی گئی ہے۔
اسد عمر کا کہنا ہے کہ مجموعی طور پر اب تک 21 لاکھ افراد کو ویکسین لگائی جا چکی ہے۔
انہوں نے ایک مرتبہ پھر عوام سے اپیل کی کہ 40 برس یا اس سے زائد عمر کے افراد کو رجسٹرڈ کرانے کی حوصلہ افزائی کی جائے۔
بھارت میں ریکارڈ کیسز، مجموعی ہلاکتوں نے دو لاکھ کا ہندسہ عبور کر لیا
بھارت میں گزشتہ چوبیس گھنٹوں کے دوران ریکارڈ کیسز اور اموات رپورٹ ہوئی ہیں۔
وزارتِ صحت کے مطابق ایک روز کے دوران مزید تین لاکھ 60 ہزار 960 افراد میں وائرس کی تشخیص ہوئی ہے۔ بھارت میں مسلسل ساتویں روز تین لاکھ سے زیادہ کیسز رپورٹ ہوئے ہیں۔
عالمی وبا کے شکار مزید 3293 مریض دم توڑ گئے ہیں۔ ایک روز کے دوران اموات کی یہ سب سے بڑی تعداد ہے جس کے ساتھ ہی بھارت میں مجموعی ہلاکتوں نے دو لاکھ کا ہندسہ عبور کر لیا ہے۔