کرونا بحران، اسکولوں میں بچوں کی ذہنی صحت کے بارے میں تشویش بڑھ رہی ہے
کرونا وائرس کا پھیلاو روکنے کے لیے امریکہ کے تمام تعلیمی اداروں کو مکمل یا جزوی طور پر بند کر دیا گیا ہے، جب کہ بچوں کو گھر سے تعلیم دی جا رہی ہے۔
ماہرین کا کہنا ہے کہ لاک ڈاؤن اور گھر سے تعلیم بچوں کی ذہنی صحت کو براہ راست متاثر کر رہی ہے۔
سال کے آغاز میں خبر رساں ادارے رائیٹرز نے 22 لاکھ طلبا سے سروے کیا، جس میں چھوٹے بڑے شہروں سے لے کر دیہی اور شہری علاقوں کے طلبا بھی شامل تھے۔ سروے میں بچوں کی اکثریت میں ذہنی مسائل کے آثار دیکھنے میں آئے۔
سروے کے مطابق، بچوں میں غیر حاضر دماغی، عدم دلچسپی، تنہائی اور پریشانی اور افسردگی جیسے مسائل دیکھے گئے۔
امریکہ بھر میں اساتذہ اس معاملے پر متفق ہیں کہ بچوں کی دماغی صحت کو ترجیح دی جائے، جس کے لیے اسکولوں میں اساتذہ کے لئے ذہنی صحت سے متعلق تربیت کا آغاز کر دیا گیا ہے۔
بچوں کو درپیش دماغی مسائل کے خدشات کے پیش نظر کئی ذرائع سے مالی امداد بھی دی جا رہی ہے، تاکہ بچوں کی دماغی صحت کی بہتری کے لئے اسکولوں کو وسائل اور سہولیات فراہم کی جا سکیں۔
پنجاب میں عید اور چاند رات کے لیے نئی ہدایات جاری
حکومتِ سندھ کا جمعے اور ہفتے کو کاروبار کھلا رکھنے کا اعلان
پاکستان کے صوبے سندھ کے وزیر اطلاعات ناصر حسین شاہ کا کہنا ہے کہ جمعہ اور ہفتہ صبح چھ سے شام چھ تک تمام کاروبار کھلا رہے گا۔
ناصر حسین شاہ کے مطابق دونوں دن کاروباری حضرات ایس او پیز کے ساتھ کاروبار کر سکتے ہیں۔ امید ہے عوام اور تاجر برادری ایس اوپیز کا خیال رکھیں گے۔
ان کے بقول صوبے میں اتوار سے کاروبار بند ہوگا جس کے لیے نوٹیفکیشن جاری کیا جائے گا۔
طورخم بارڈر 15 دن کے لیے بند
پاکستان اور افغانستان کے درمیان مصروف ترین گزر گاہ طورخم کو کرونا وائرس کے پھیلاؤ کے باعث شہریوں کی آمد و رفت کے لیے بند کر دیا گیا۔
عید الفطر سے قبل طورخم کو دو طرفہ آمد و رفت کے لیے آئندہ 15 دن کے لیے جمعرات سے بند کیا گیا ہے۔
وفاقی وزارتِ داخلہ کے اعلامیے کے مطابق ملک بھر میں عید الفطر کے دوران کرونا وائرس پر قابو پانے کے لیے لاک ڈاؤن کا اطلاق افغانستان کے ساتھ آمد و رفت پر بھی لاگو کیا گیا ہے۔
ضلع خیبر کے ڈپٹی کمشنر ارشد منصور کا کہنا ہے کہ 20 مئی تک کسی بھی پاکستانی باشندے کو افغانستان اور کسی بھی افغان باشندے کو پاکستان آنے کی اجازت نہیں ہو گی۔