ویکسین کی دونوں خوراک حاصل کرنے والے امریکیوں کو ماسک کی ضرورت نہیں: صدر بائیڈن
امریکہ کے صدر جو بائیڈن نے اعلان کیا ہے کہ وہ امریکی جنہیں ویکسین لگ چکی ہے، ان میں سے زیادہ تر کو اب ماسک پہننے کی ضرورت نہیں ہے، لیکن اگر کسی نے ویکسین نہیں لگوائی، تو اسے ہر صورت میں ماسک پہننا ہو گا۔
جمعرات کو وائٹ ہاؤس کے روز گارڈن میں پریس کانفرنس سے خطاب کرتے ہوئے، صدر بائیڈن نے کہا کہ وہ یہ اعلان وبائی امراض کے کنٹرول سےمتعلق ادارے سینٹر فار ڈزیز کنٹرول اینڈ پریوینشن (سی ڈی سی) کی سفارش کے بعد کر رہے ہیں۔ ان کا کہنا تھا کہ امریکہ کیلئے یہ ایک اچھا دن ہے۔
صدر بائیڈن نے کہا کہ سی ڈی سی نے سفارش کی ہے کہ امریکی نہ صرف کھلی بلکہ بند جگہوں پر یا اجتماعات میں بھی بغیر ماسک پہنے جا سکتے ہیں۔ نائب صدر کاملا ہیرس بھی اس پریس کانفرنس کے دوران صدر کےہمراہ موجود تھیں۔ دونوں نے ماسک نہیں پہنا ہوا تھا۔
خیال ہے کہ صدر بائیڈن کے اس اعلان کے بعد معمول کی زندگی کی جانب لوٹنے کا راستہ ہموار ہونا شروع ہو جائے گا۔
بھارت میں کرونا کے تین لاکھ 43 ہزار سے زائد کیسز رپورٹ
بھارت میں کرونا وائرس کی دوسری لہر کی شدت جاری ہے اور گزشتہ 24 گھنٹوں کے دوران تین لاکھ 43 ہزار 144 نئے کیسز رپورٹ ہوئے ہیں۔
ملک میں مزید چار ہزار افراد کرونا وائرس کے باعث ہلاک ہو گئے جس کے بعد اموات کی تعداد ڈھائی لاکھ سے تجاوز کر گئی ہے۔
بھارت میں کرونا وائرس انفیکشنز اور اموات کی تعداد بلند سطح پر برقرار ہے جس سے وزیرِ اعظم نریندر مودی کی حکومت پر اس دباؤ میں اضافہ ہو رہا ہے کہ وہ دنیا کے دوسرے سب سے گنجان آباد ملک میں لاک ڈاؤن نافذ کریں۔
پاکستان: مثبت کیسز کی شرح آٹھ اعشاریہ ایک نو فی صد
پاکستان میں کرونا کی تیسری لہر کے دوران مزید 48 افراد جان کی بازی ہار گئے۔
سرکاری اعداد و شمار کے مطابق ملک میں دو ہزار 517 افراد میں وائرس کی تشخیص ہوئی ہے۔
حکام کے مطابق گزشتہ 24 گھنٹوں میں 30 ہزار 700 افراد کے کرونا ٹیسٹ کیے گئے جس میں مثبت کیسز کی شرح آٹھ اعشاریہ ایک نو فی صد رہی۔
16 مئی سے 30 سال اور زائد کی عمر کے افراد کی ویکسین رجسٹریشن شروع ہو جائے گی، اسد عمر
پاکستان کے وزیرِ ترقی و منصوبہ بندی اور این سی او سی کے سربراہ اسد عمر نے کہا ہے کہ 16 مئی سے 30 سال اور اس سے زائد افراد کی ویکسین رجسٹریشن کا آغاز کردیا جائے گا۔
اسد عمر نے ایک ٹوئٹ میں کہا ہے کہ ویکسین کی سپلائی میں بہتری کے ساتھ ہی وفاقی اکائیوں میں ویکسین کی استعداد کار بڑھ رہی ہے۔