پاکستان میں کین سائنو ویکسین کی کامیاب فارمولیشن اور پیکنگ شروع
وزیرِاعظم عمران خان کے معاونِ خصوصی برائے صحت ڈاکٹر فیصل سلطان نے قومی ادارۂ صحت (این آئی ایچ) کی ٹیم اور قیادت کو چین کی کین سائنو بائیو انکارپوریشن کی مدد سے کین سائنو ویکسین کی کامیاب فارمولیشن اور پیکنگ پر مبارک باد پیش کی ہے۔
انہوں نے پیر کو ایک ٹوئٹ میں کہا کہ ویکسین نے مقامی سطح پر سخت ترین کوالٹی ٹیسٹنگ کو پاس کرلیا ہے اور یہ ہماری ویکسین کی سپلائی لائن میں ایک اہم قدم ہے۔
پاکستان میں فارمولیشن اور پیک ہونے والی ویکسین کو پاک ویک کا نام دیا گیا ہے اور ڈاکٹر فیصل سلطان نے اس کی تصویر بھی ٹوئٹر پر شیئر کی ہے۔
واضح رہے کہ رواں ماہ کے اوائل میں حکومتِ پاکستان نے چین سے کین سائنو ویکسین کی ایک لاکھ 20 ہزار خوراکیں خریدی تھیں اور اس کی مقامی سطح پر پیکنگ اور فارمولیشن کا فیصلہ کیا تھا۔
پاکستان میں کرونا سے مزید 57 اموات
پاکستان میں کرونا وائرس کی تیسری لہر جاری ہے اور گزشتہ 24 گھنٹوں میں تین ہزار 60 افراد میں وائرس کی تشخیص ہوئی ہے۔
سرکاری اعداد و شمار کے مطابق ملک میں گزشتہ 24 گھنٹوں میں 58 ہزار 670 افراد کے کرونا ٹیسٹ کیے گئے جن میں مثبت کیسز کی شرح 5 اعشاریہ 21 فی صد رہی۔
ملک میں پیر کو کرونا سے مزید 57 مریضوں کی ہلاکتوں سے اموات کی مجموعی تعداد 20 ہزار 308 ہو گئی ہے۔
اعداد و شمار کے مطابق ملک میں کرونا کے مجموعی کیسز 9 لاکھ تین ہزار 599 ہیں جن میں سے چار ہزار 763 افراد نگہداشت کی حالت میں ہیں۔
ٹوکیو اولمپکس سے قبل جاپان میں ماس ویکسی نیشن کا آغاز
جاپان میں ٹوکیو اولمپکس کے آغاز سے قبل ویکسی نیشن کے عمل میں تیزی کے لیے ملک کے پہلے ماس ویکسی نیشن سینٹرز کھول دیے گئے ہیں۔
بڑے پیمانے پر ویکسین مراکز کا آغاز ٹوکیو اولمپکس کے منعقد ہونے سے دو ماہ قبل کیا گیا ہے۔ اولمپکس کے یہ مقابلے گزشتہ برس کرونا وائرس کی وجہ سے ملتوی کردیے گئے تھے۔
ٹوکیو اور اوساکا میں فوج کی جانب سے چلائے جانے والے مراکز میں روزانہ ہزاروں افراد کو ویکسین لگائی جائے گی۔ ابتدائی طور پر بزرگ شہریوں کو یہ ٹیکے لگیں گے۔
جاپان میں کرونا وائرس کی چوتھی لہر جاری ہے۔ البتہ اب تک ساڑھے بارہ کروڑ آبادی والے ملک کی صرف دو فی صد آبادی کو مکمل ویکسین لگ سکی ہے۔
بھارت میں کرونا سے ہلاکتیں تین لاکھ سے متجاوز
بھارت میں کرونا وائرس سے مزید چار ہزار 454 افراد ہلاک ہوئے ہیں جس کے بعد ملک میں وبا سے اموات کی مجموعی تعداد تین لاکھ سے تجاوز کر گئی ہے۔
بھارت اس وقت کرونا وائرس کی دوسری لہر کی لپیٹ میں ہے اور اعداد و شمار کے مطابق گزشتہ دو ہفتوں میں 50 ہزار اموات رپورٹ ہو چکی ہیں۔
بھارت میں اموات کی یہ تعداد امریکہ اور برازیل کے بعد سب سے زیادہ ہے۔
وزارتِ صحت کے اعداد و شمار کے مطابق پیر کو ملک میں دو لاکھ 22 ہزار سے زائد نئے کیسز رپورٹ ہوئے ہیں۔
بھارت میں کرونا کے مجموعی کیسز کی تعداد دو کروڑ 67 لاکھ 52 ہزار 447 ہے جب کہ اب تک تین لاکھ تین ہزار 720 افراد وائرس سے ہلاک ہو چکے ہیں۔