پاکستان: حکومت اور طلبہ کے درمیان امتحانات کا مسئلہ ہے کیا؟
پاکستان میں حکومت طلبہ کے فیزیکل امتحانات پر اصرار کر رہی ہے، جب کہ طلبہ کا کہنا ہے کہ جب پڑھائی آن لائن ہوئی ہے تو امتحان بھی آن لائن لیے جائیں۔ حکومت اور طلبہ کی اس بحث میں ماہرینِ تعلیم کی کیا رائے ہے؟ جانتے ہیں پنجاب یونیورسٹی کے انسٹیٹیوٹ آف ایجوکیشن اینڈ ریسرچ سے منسلک ڈاکٹر عرونہ ہاشمی سے۔
پاکستان میں ٹیسٹ مثبت آنے کی شرح میں کمی
پاکستان میں کرونا وائرس کے ٹیسٹ مثبت آنے کی شرح میں کمی آئی ہے۔
سرکاری اعداد و شمار کے مطابق ملک بھر میں گزشتہ 24 گھنٹوں میں 50 ہزار 393 ٹیسٹ کیے گئے۔ یوں اب تک کیے جانے والے مجموعی ٹیسٹ ایک کروڑ 34 لاکھ 71 ہزار سے تجاوز کر گئے ہیں۔
گزشتہ روز کیے گئے ٹیسٹس میں سے صرف 1923 ٹیسٹ مثبت آئے ہیں۔ یوں ٹیسٹ مثبت آنے کی شرح 3.81 فی صد رہی۔
کرونا کیسز کے باعث 'مشن امپوسیبل 7' کی شوٹنگ روک دی گئی
برطانیہ میں جاری 'مشن امپوسیبل 7' کی شوٹنگ میں شریک بعض افراد کے کرونا ٹیسٹ مثبت آنے کے بعد فلم کی شوٹنگ ایک مرتبہ پھر روک دی گئی ہے۔
پیراماؤنٹ پکچرز نے جمعرات کو اعلان کیا ہے کہ کرونا کیسز سامنے آنے کے بعد فلم کی شوٹنگ دو ہفتوں کے لیے روکی گئی ہے۔
فلم بنانے والے اسٹوڈیو نے یہ نہیں بتایا کہ کرونا وائرس سے کون متاثر ہوا ہے اور کتنے افراد کے ٹیسٹ مثبت آئے ہیں۔
پیراماؤنٹ نے ایک بیان میں اتنا بتایا ہے کہ فلم کی شوٹنگ 14 جون تک عارضی طور پر روک دی گئی ہے اور وہ صورتِ حال کا جائزہ لیں گے۔
پاکستان: 21 لاکھ سے زائد افراد ویکسین کا کورس مکمل کر چکے
پاکستان میں گزشتہ چوبیس گھنٹوں کے دوران دو لاکھ 14 ہزار 133 افراد نے کرونا وائرس کی ویکسین کا پہلا ٹیکہ لگوا لیا ہے جب کہ 90 ہزار 729 افراد نے دوسرا ٹیکہ لگوایا ہے۔
سرکاری اعداد و شمار کے مطابق گزشتہ چوبیس گھنٹوں کے دوران تین لاکھ چار ہزار 862 افراد کو کرونا ویکسین دی گئی ہے۔
حکام کا کہنا ہے کہ اب تک 79 لاکھ 53 ہزار 574 افراد کو ویکسین لگائی جا چکی ہے۔
اعداد و شمار کے مطابق، اب تک 21 لاکھ 74 ہزار 169 افراد وہ ہیں جو کرونا ویکسین کی دو خوراکیں لے چکے ہیں جب کہ ویکسین کی پہلی ڈوز لینے والوں کی تعداد 37 لاکھ 46 ہزار 789 ہے۔
