عالمی رہنما جو کرونا وبا کی حقیقت سے انکاری رہے
برازیل کے صدر جائر بولسونارو کا شمار ان رہنماؤں میں ہوتا ہے جنہوں نے عالمی وبا کے آغاز سے ہی اس کی شدت کو کم کر کے بیان کیا اور پھر خود بھی اس کا شکار ہوئے۔ نیلوفر مغل بتا رہی ہیں کہ دنیا بھر میں کون سے عالمی رہنماؤں نے کرونا وبا کو زیادہ سنجیدہ نہیں لیا اور ان کی اس سوچ کا عوام پر کیا اثر پڑا؟
امریکہ کا جاپان سمیت 110 ممالک اور علاقوں کے لیے سفری سفارشات میں نرمی کا اعلان
امریکہ میں بیماریوں پر قابو پانے اور ان کی روک تھام کے نگراں ادارے (سی ڈی سی) نے ٹوکیو اولمپکس کے انعقاد سے قبل ہی جاپان سمیت 110 سے زائد ممالک اور علاقوں کے لیے سفری سفارشات میں نرمی کا اعلان کیا ہے۔
خبر رساں ادارے 'رائٹرز' کے مطابق سی ڈی سی نے منگل کے روز اس بات کی تصدیق کی کہ ان ممالک میں وہ 61 ممالک شامل ہیں جن کے بارے میں اس سے قبل بیماری کے شدید خدشات پر مبنی انتباہ اور احتیاطی تدابیر اختیار کرنے کے لیے کہا گیا تھا۔
سی ڈی سی نے تنبیہ کی تھی کہ جن افراد کو ویکسین کی دونوں خوراکیں لگ چکی ہیں وہ بھی شدید متاثرہ ملکوں کے سفر سے اجتناب برتیں۔ اب تک ان ملکوں کو چوتھی کیٹیگری یعنی انتہائی خطرناک ملک کے درجے میں رکھا گیا تھا۔
سی ڈی سی کی خاتون ترجمان نے کہا ہے کہ مزید 50 ملکوں اور علاقوں کو خطرے کے 'دوسرے' یا 'پہلے' درجے پر رکھا گیا ہے، جو خطرے کی کم سطح کو ظاہر کرتی ہے۔
جن ممالک کو کووڈ-19 کے خدشات کے کم ترین درجے پر رکھا گیا ہے ان میں سنگاپور، اسرائیل، جنوبی کوریا، آئس لینڈ، بیلیز اور البانیہ شامل ہیں۔
نئی فہرست میں جن ملکوں کو اب خطرے کی 'تیسری' سطح پر رکھا گیا ہے ان میں فرانس، ایکواڈور، فلپائن، جنوبی افریقہ، کینیڈا، میکسکو، روس، اسپین، سوئٹزرلینڈ، ترکی، یوکرین، ہنگری اور اٹلی شامل ہیں۔
پاکستان میں آج کرونا ویکسی نیشن کی تعداد ایک کروڑ سے تجاوز کر جائے گی: اسد عمر
پاکستان کے وفاقی وزیر برائے منصوبہ بندی اور کرونا وبا پر قابو پانے کے متحرک ادارے نیشنل کمانڈ اینڈ آپریشن سینٹر (این سی او سی) کے سربراہ اسد عمر کا کہنا ہے کہ ملک میں آج اب تک ہونے والی کرونا ویکسی نیشن کی تعداد ایک کروڑ سے تجاوز کر جائے گی۔
اسد عمر نے بدھ کو ٹوئٹر پر جاری بیان میں کہا ہے کہ الحمد لی اللہ لوگ رجسٹر بھی کر رہے ہیں اور ویکسین بھی بڑی تعداد میں لگائی جا رہی ہیں۔
ان کا مزید کہنا تھا کہ اگر آپ نے ابھی تک ویکسین نہیں لگوائی تو جلد لگوا لیں۔
فائزر کا 12 برس سے کم عمر کے بچوں پر ویکسین کا تجربہ کرنے کا اعلان
امریکی کمپنی فائزر نے 12 برس سے کم عمر کے بچوں پر ویکسین کا تجربہ کرنے کا اعلان کیا ہے۔
ویکسین کے تجربے کے لیے امریکہ کی کمپنی فائزر اپنی شراکت دار جرمن کمپنی بائیو این ٹیک کے ساتھ امریکہ، فِن لینڈ، پولینڈ اور اسپین میں90 سے زیادہ مقامات پر ساڑھے چار ہزار بچوں کو رضاکارانہ طور پر شامل کرے گی۔
اس تجربے کے دوران پانچ سے 11 برس عمر کے بچوں کو ویکسین کی 10 مائیکرو گرام کی دو خوراکیں دی جائیں گی جو نوجوانوں اور بالغ کو دی جانے والی خوراک کا ایک تہائی حصہ ہے۔
دوسری جانب چھ ماہ کی عمر کے بچوں پر بھی آئندہ چند ہفتوں میں ویکسین کا تجربہ کیا جائے گا اور اس دوران انہیں تین مائیکرو گرام کی خوراک دی جائے گی۔
واضح رہے کہ فائزر اور بائیو این ٹیک کی تیار کردہ مشترکہ ویکسین کو پہلے ہی امریکہ اور یورپ میں 12 سال سے زائد عمر کے نوجوانوں کو ہنگامی استعمال کی منظوری دی جا چکی ہے۔