ملک میں تین کروڑ سے زائد افراد کو ویکسین لگائی جاچکی ہے، اسد عمر
پاکستان میں کرونا کے نگراں ادارے نیشنل کمانڈ اینڈ آپریشن سینٹر (این سی او سی) کے سربراہ اسد عمر نے کہا ہے کہ ملک میں تین کروڑ سے زائد افراد کو ویکسین لگائی جا چکی ہے۔
ٹوئٹر پر اپنے ایک بیان میں انہوں نے بتایا کہ پہلے ایک کروڑ افراد کو 113 دن میں ویکسین لگائی گئی تھی جب کہ اگلے 28 دن میں مزید ایک کروڑ لوگوں کو ویکسین لگائی گئی۔
ان کے بقول آخری ایک کروڑ افراد کی ویکسین میں صرف 16 دن لگے ہیں۔ ان کا کہنا ہے کہ ملک میں ویکسی نیشن کا عمل تیز ہوگیا ہے۔
اسد عمر کا کہنا ہے کہ رواں ہفتے کے چھ دن میں پچاس لاکھ ویکسی نیشن کی گئیں جب کہ گزشتہ روز نو لاکھ 34 ہزار ویکسی نیشن ہوئیں۔
پاکستان: کرونا مثبت کیسز کی شرح ساڑھے آٹھ فی صد سے زائد
پاکستان میں کرونا وائرس کے پھیلاؤ میں تیزی آ رہی ہے۔ ملک میں گزشتہ 24 گھنٹوں کے دوران پانچ ہزار 26 نئے کیسز رپورٹ ہوئے ہیں۔
سرکاری اعداد و شمار کے مطابق ملک میں گزشتہ 24 گھنٹوں کے دوران 56 ہزار 965 افراد کے کرونا ٹیسٹ کیے گئے جن میں مثبت کیسز کی شرح آٹھ اعشاریہ آٹھ دو فی صد رہی۔
گزشتہ 24 گھنٹوں میں کرونا سے پانچ ہزار 26 افراد متاثر ہوئے۔ اس سے قبل 29 اپریل کو ملک میں پانچ ہزار سے زائد کیس رپورٹ ہوئے تھے۔
کرونا وبا سے پاکستان میں مزید 62 افراد کا انتقال بھی ہوا ہے۔ ملک میں اموات کی مجموعی تعداد 23 ہزار 422 تک پہنچ گئی ہے۔
ڈیلٹا ویرینٹ: آسٹریلیا سے فلپائن تک لاک ڈاؤن اور ہنگامی اقدامات
کرونا وائرس کے ڈیلٹا ویرینٹ کے مہلک اثرات سے بچنے اور ان سے مؤثر طور پر نمٹنے کے لیے، آسٹریلیا سے جاپان اور فلپائن تک کے ایشیائی ممالک نے جمعے سے اپنے شہریوں کی نقل و حمل محدود کرنے کی غرض سے سخت پابندیاں عائد کر دی ہیں۔
ڈیلٹا ویرینٹ جو سب سے پہلے بھارت میں سامنے آیا تھا، کئی ملکوں میں پھیل چکا ہے اور عالمگیر سطح پر تشویش کا باعث بنتا جا رہا ہے۔
وبا کی اس قسم کے اثرات سے بچنے کے لیے امریکہ، اسرائیل اور سنگاپور جیسے ملک، جہاں ویکسی نیشن کے جدید پروگرام پر عمل درآمد جاری ہے، انہوں نے بھی شہریوں کی نقل و حمل سے متعلق کچھ پابندیاں پھر سے عائد کر دی ہیں۔
تاہم، ایشیائی ممالک ڈیلٹا ویرینٹ کی سب سے زیادہ زد میں ہیں، جہاں تصدیق شدہ کیسز کی تعداد میں ریکارڈ اضافہ ہوتا جا رہا ہے، جب کہ خطے میں ویکسی نیشن مہم کی سست روی کے باعث لاکھوں افراد کو اس تیزی سے پھیلنے والی وبا کا خطرہ لاحق ہے۔
امریکی سینٹرز فار ڈیزیز کنٹرول اینڈ پریوینشن (سی ڈی سی) کی ایک داخلی دستاویز کا حوالہ دیتے ہوئے اخبار ’نیو یارک ٹائمز‘ نے تحریر کیا ہے کہ ڈیلٹا ویرینٹ دراصل خسرے کی طرح کا ایک متعدی مرض ہے جو بیمار کو تیزی سے جکڑ لیتا ہے۔