ویکسین نہ لگوانے والے دوسروں کو خطرے میں ڈال رہے ہیں: فاؤچی
متعدی امراض کے چوٹی کے ماہر امریکی ڈاکٹر انتھونی فاؤچی نے ایک مرتبہ پھر ویکسین کی ضرورت پر زور دیتے ہوئے کہا ہے کہ ویکسین نہ لگوانے والے لاکھوں امریکی دوسروں کو خطرے میں ڈال رہے ہیں اور صورتِ حال گھمبیر ہوتی جا رہی ہے۔
ڈاکٹر فاؤچی امریکی صدر جو بائیڈن کے میڈیکل ایڈوائزر بھی ہیں۔ انہوں نے اتوار کو نشریاتی ادارے 'اے بی سی' کے پروگرام 'دِس ویک' میں گفتگو کرتے ہوئے کہا کہ کرونا وائرس کی ڈیلٹا قسم تکلیف کا باعث بن رہی ہے اور اس ویرینٹ سے ملک مشکلات سے دوچار ہے۔
انہوں نے کہا کہ ہمیں صحتِ عامہ سے متعلق ایک سنگین چیلنج کا سامنا ہے اور یہ حقیقت ہے کہ اگر آپ وبا کا شکار ہو جاتے ہیں اور دوسروں کو یہ وائرس منتقل کرتے ہیں تو آپ دوسروں کے حقوق کی خلاف ورزی کرتے ہیں۔
ڈاکٹر فاؤچی نے حال ہی میں کہا تھا کہ ان علاقوں میں ڈیلٹا ویرینٹ تیزی سے پھیل رہا ہے جہاں لوگ ویکسین لگوانے سے انکار کر رہے ہیں۔ انہوں نے اس صورتِ حال سے متعلق کہا تھا کہ ہم خود کو خطرے میں ڈال رہے ہیں اور غلط سمت میں جا رہے ہیں۔
بھارت میں 40 ہزار سے زیادہ کیسز رپورٹ
بھارت میں گزشتہ چوبیس گھنٹوں کے دوران 40 ہزار 134 نئے کیسز رپورٹ ہوئے ہیں جب کہ مثبت کیسز کی شرح دو اعشاریہ آٹھ ایک فی صد رہی۔
بھارت کی وزارتِ صحت کے مطابق ملک بھر میں عالمی وبا کے شکار مزید 422 مریض دم توڑ گئے ہیں۔
آسٹریلیا: برسبین میں نافذ لاک ڈاؤن میں توسیع
آسٹریلیا کی ریاست کوئنزلینڈ کے حکام نے پیر سے برسبین شہر میں پہلے سے نافذ شدہ لاک ڈاؤن میں مزید توسیع کر دی ہے۔
حکام کے مطابق گزشتہ چوبیس گھنٹوں کے دوران 13 افراد میں وائرس کی تشخیص ہوئی ہے جو مقامی سطح پر ایک روز کے دوران رواں برس رپورٹ ہونے والے سب سے زیادہ کیسز ہیں۔
آسٹریلیا کے تیسرے بڑے شہر برسبین میں پہلے سے نافذ شدہ لاک ڈاؤن کی مدت منگل کو ختم ہونا تھی۔ تاہم نئے کیسز سامنے آنے کے بعد حکام نے لاک ڈاؤن میں اتوار تک توسیع کر دی ہے۔
کوئنز لینڈ کے ڈپٹی پریمیئر اسٹیون ملز نے صحافیوں سے بات کرتے ہوئے کہا کہ نئے کیسز سامنے آنے کے بعد یہ واضح ہو گیا ہے کہ لاک ڈاؤن وبا کی روک تھام کے لیے ناکافی ہو گا۔
واضح رہے کہ برسبین کے حکام نے چھ ہفتوں کے لیے شہریوں کو گھروں میں ہی رہنے کے احکامات دیے تھے جس کی مدت منگل کو مکمل ہو رہی ہے۔
پاکستان میں 4858 افراد میں وائرس کی تشخیص
پاکستان میں ایک ہفتے کے دوران مثبت کیسز کی یومیہ تعداد چار ہزار سے زیادہ رپورٹ ہو رہی ہے۔ گزشتہ چوبیس گھنٹوں کے دوران مزید 4858 افراد میں وائرس کی تشخیص ہوئی ہے۔
سرکاری اعداد و شمار کے مطابق گزشتہ چوبیس گھنٹوں میں 56 ہزار 414 افراد کے کرونا ٹیسٹ کیے گئے اور مثبت کیسز کی شرح آٹھ اعشاریہ چھ ایک فی صد ریکارڈ کی گئی۔
حکام کے مطابق عالمی وبا کے شکار مزید 40 مریض دم توڑ گئے ہیں جب کہ3441 مریضوں کی حالت تشویش ناک ہے۔