پاکستان میں وبا سے متاثرہ 10 لاکھ افراد صحت یاب
پاکستان میں کرونا وبا سے متاثر ہونے والے 10 لاکھ سے زائد افراد صحت یاب ہو چکے ہیں۔
سرکاری اعداد و شمار کے مطابق پاکستان میں وبا سے 11 لاکھ 19 ہزار افراد متاثر ہوئے تھے جن میں سے 10 لاکھ چھ ہزار صحت یاب ہو چکے ہیں۔
اعداد و شمار کے مطابق وبا سے 24 ہزار 848 اموات ہوئی ہیں جب کہ گزشتہ 24 گھنٹوں میں مزید 65 افراد ہلاک ہوئے ہیں۔
پاکستان میں ایک کروڑ 30 لاکھ سے زائد افراد کی ویکسی نیشن مکمل
پاکستان میں کرونا وائرس سے بچاؤ کی ویکسین کی دونوں خوراکیں ایک کرور 30 لاکھ 22 ہزار افراد کو لگائی جا چکی ہیں۔
اعداد و شمار کے مطابق ملک بھی میں اب تک ایک ڈوز لگانے والے افراد کی تعداد تین کروڑ 64 لاکھ سے زائد ہے۔
واضح رہے کہ گزشتہ 24 گھنٹوں میں ملک بھر میں پانچ لاکھ 84 ہزار افراد کو ویکسین لگائی گئی۔
بیلجیم کا برسلز کے علاوہ پورے ملک میں پابندیاں ختم کرنے کا فیصلہ
یورپی ملک بیلجیم میں دو تہائی آبادی کو کرونا ویکسین لگائے جانے کے بعد حکومت وبا کے باعث ملک بھر میں عائد کردہ پابندیاں یکم ستمبر سے ختم کر رہی ہے تاہم برسلز شہر کے کچھ حصوں میں ویکسین لگائے جانے کی رفتار سست ہونے کے سبب عائد کردہ پابندیاں برقرار رہیں گی۔
بیلجیم کے وزیراعظم الیگزینڈر ڈی کرو کا صحافیوں سے گفتگو میں کہنا تھا 10 افراد میں سے 8 سے زائد افراد کو کرونا ویکسین لگ چکی ہے۔ جس کے بعد وہ یہ اقدام لے سکتے ہیں۔
وبا کے سبب عائد کردہ پابندیاں ہٹائے جانے کے بعد ریستوارن اور کیفے معمول کے اوقات میں کھلیں گے۔
ریستورانوں اور کیفے میں جانے والے افراد اور ایک میز پر بیٹھنے والوں کی تعداد پر کوئی پابندی نہیں ہو گی۔ اس کے باوجود لوگوں کو فیس ماسک پہننا پڑے گا۔
تاہم انڈور منعقد ہونے والی 200 افراد تک گنجائش والی محافل میں فیس ماسک لازمی نہیں ہو گا جب کہ آؤٹ دوڑ میں منعقد ہونے والی محافل میں 400 تک افراد بغیر ماسک کے شرکت کر سکتے ہیں۔
آسٹریلیا میں یومیہ ریکارڈ کیسز، لاک ڈاؤن کے خلاف احتجاج کرنے والے گرفتار
آسٹریلیا کے دو شہروں میلبرن اور سڈنی میں کرونا وبا کے باعث عائد کردہ لاک ڈاؤن کے خلاف ہونے والے احتجاج میں پولیس نے سیکڑوں مظاہرین کو گرفتار کر لیا۔
ہفتے کو مظاہرین اور پولیس کے درمیان ہونے والی جھڑپوں کے سبب سات پولیس اہل کار زخمی بھی ہوئے۔ جنہیں اسپتال منتقل کر دیا گیا ہے۔
ریاست وکٹوریا کے شہر میلبرن کی پولیس کا کہنا ہے کہ اس نے 218 افراد کو گرفتار جب کہ 236 افراد پر جرمانے کیے ہیں۔
نیو ساؤتھ ویلز کی پولیس کا کہنا ہے کہ اس نے دارالحکومت سڈنی میں قانون کی خلاف ورزی کرنے اور گرفتاری میں مزاحمت کرنے پر 47 افراد کو حراست میں لیا ہے۔
دوسری طرف آسٹریلیا میں 24 گھنٹوں کے دوران کرونا کے ریکارڈ یومیہ کیسز رپورٹ کیے گئے۔
ہفتے کو رپورٹ کیے جانے والے یومیہ 894 کیسز میں سے اکثریت سڈنی سے رپورٹ کیے گئے۔ جو کہ کرونا وائرس کی قسم ڈیلٹا ویرینٹ کا گڑھ سمجھا جا رہا ہے۔