پاکستان میں مزید 66 اموات، 3800 نئے کیسز رپورٹ
نظامِ صحت پر دباؤ پاکستان میں مزید 14 شہروں پر کرونا ایس او پیز کا اطلاق
پاکستان میں کرونا وائرس کا پھیلاؤ روکنے کے لیے مزید 14 شہروں پر کرونا پابندیوں کا اطلاق کر دیا گیا ہے۔
اتوار کو نیشنل کمانڈ اینڈ آپریشن سینٹر کی جانب سے جاری کیے گئے اعلامیے کے مطابق پنجاب کے شہروں خانیوال، میانوالی، سرگودھا، خوشاب، بہاولپور اور رحیم یار خان میں بھی اب کرونا ایس او پیز کا اطلاق ہو گا۔
خیبرپختونخوا کے شہروں سوات، ہری پور، مانسہرہ، لوئر دیر، صوابی اور چترال میں اب کرونا پابندیوں کا اطلاق ہو گا۔
نئی پابندیوں کے تحت ان شہروں میں ضروری اشیا کے علاوہ دیگر کاروباری مراکز رات آٹھ بجے بند کر دیے جائیں گے جب کہ سرکاری دفاتر میں 50 فی صد افراد کو آنے کی اجازت ہو گی۔
آسٹریلیا میں کرونا کے مزید 1323 کیس رپورٹ
آسٹریلیا میں کرونا کے مقامی سطح پر مزید 1323 کیس رپورٹ ہونے کے بعد حکام کی تشویش میں اضافہ ہو رہا ہے۔
خبر رساں ادارے 'رائٹرز' کے مطابق آسٹریلیا میں کرونا کے ڈیلٹا ویریئنٹ کے کیس سب سے زیادہ ریاست نیو ساؤتھ ویلز میں رپورٹ ہو رہے ہیں جہاں 1218 کیس رپورٹ ہوئے ہیں۔
وائرس کے پھیلاؤ میں اضافہ ایسے وقت میں ہو رہا ہے جب ملک بھر میں کرونا پابندیاں ہٹانے پر غور ہو رہا ہے۔
نیو ساؤتھ ویلز کی پریمیئر گلیڈیس بیریجکلیئن نے اعلان کیا ہے کہ 16 سے زائد عمر کے 70 فی صد افراد کی ویکسی نیشن مکمل ہونے کے بعد ریاست میں پابندیاں ختم کر دی جائیں گی۔
بھارت میں کرونا کی 63 کروڑ خوراکیں لگا دی گئیں
بھارت میں کرونا وائرس سے بچاؤ کے لیے اب تک مجموعی طور پر ویکسین کی 63 کروڑ خوراکیں لگائی دی گئی ہیں۔
وزارتِ صحت کے حکام کے مطابق ہفتے کو بھارت میں 70 لاکھ سے زائد افراد کو کرونا سے بچاؤ کی ویکسین لگائی گئی جب کہ اس سے قبل جمعے کو ایک کروڑ بھارتی شہریوں کو کرونا سے بچاؤ کی ویکسین لگائی گئی تھی۔
دریں اثنا بھارت میں کرونا کیسز میں ایک بار پھر اضافہ دیکھا جا رہا ہے اور گزشتہ 24 گھنٹوں کے دوران مزید 45 ہزار سے زائد کیس رپورٹ ہوئے ہیں جب کہ 460 افراد اس وائرس کے باعث زندگی کی بازی ہار گئے ہیں۔