پاکستان میں کرونا ٹیسٹ مثبت آنے کی شرح آٹھ فی صد سے زائد
پاکستان میں گزشتہ 24 گھنٹوں میں کرونا وائرس سے مزید چار ہزار 253 افراد متاثر ہوئے ہیں۔
سرکاری اعداد و شمار کے مطابق پاکستان میں گزشتہ 24 گھنٹوں میں 51 ہزار 749 ٹیسٹ کیے گئے جن کے مثبت آنے کی شرح 8.2 فی صد رہی۔
اعداد و شمار کے مطابق زیرِ علاج افراد میں سے ایک ہزار 731 افراد انتہائی نگہداشت میں زیرِ علاج ہیں۔
پاکستان میں چار ماہ بعد 50 اموات
پاکستان میں کرونا وائرس سے چار ماہ بعد یومیہ اموات ایک بار پھر 50 تک پہنچ گئی ہیں۔
سرکاری اعداد و شمار کے مطابق ملک میں گزشتہ 24 گھنٹوں میں ہونے والی 50 اموات کے بعد وبا سے ہونے والی مجموعی ہلاکتیں 29 ہزار 601 ہو گئی ہیں۔
واضح رہے کہ پاکستان میں وبا کی چوتھی لہر میں یومیہ اموات کی شرح 45 سے 55 کے درمیان تھی البتہ اب ایک بار پھر ملک بھر میں اموات کی شرح میں اضافہ ہو رہا ہے۔
پاکستان میں کرونا کیسز میں کمی
پاکستان میں کرونا کیسز میں کمی کا سلسلہ جاری ہے۔ گزشتہ 24 گھنٹوں میں ملک میں لگ بھگ 2800 کیسز رپورٹ ہوئے ہیں۔
سرکاری اعداد و شمار کے مطابق پاکستان میں گزشتہ 24 گھنٹوں میں 52 ہزار 327 کرونا ٹیسٹ کیے گئے جن میں سے پانچ اعشاریہ تین چار فی صد کے نتائج مثبت آئے۔
ملک میں کرونا وائرس سے مزید 37 افراد انتقال بھی کرگئے ہیں۔
چین کے شہر بیز میں لاک ڈاؤن
چین میں کرونا کیسز میں اضافے کے بعد حکام نے بیز شہر میں لاک ڈاؤن کا اعلان کردیا ہے اور رہائشیوں کو گھروں میں رہنے اور غیر ضروری سفر سے گریز کرنے کا حکم دیا گیا ہے۔
خبر رساں ادارے 'رائٹرز' کے مطابق بیز کی آبادی 36 لاکھ ہے اور یہ شہر ویتنام کی سرحد کے پاس ہے۔
بیز میں گزشتہ تین روز کے دوران کرونا وائرس کے 70 کیسز رپورٹ ہوئے ہیں۔
حکام کی جانب سے رہائشیوں کو صرف ضروری سامان کی خریداری کرنے یا کرونا ٹیسٹ کے لیے جانے کی اجازت ہے۔ مقامی حکام نے رہائشیوں کو اسٹور جانے کے بجائے ڈیلوری سروس کے استعمال کا مشورہ دیا ہے۔
خیال رہے کہ یہ لاک ڈاؤن ایسے موقع پر لگایا گیا ہے جب دارالحکومت بیجنگ میں سرمائی اولپکس جاری ہیں۔ اولمپک کے یہ مقابلے 20 فروری تک جاری رہیں گے۔