شہباز شریف کا پیٹرول کی قیمت 70 فی صد کم کرنے کا مطالبہ
پاکستان مسلم لیگ (ن) کے صدر اور قومی اسمبلی میں اپوزیشن لیڈر شہباز شریف نے مطالبہ کیا ہے کہ حکومت موجودہ صورتِ حال میں عوام کو ریلیف دینے کے لیے پیٹرولیم مصنوعات کی قیمتوں میں 70 فی صد تک کمی کرے۔
لاہور میں ویڈیو لنک کے ذریعے نیوز کانفرنس کرتے ہوئے شہباز شریف نے اعلان کیا ہے کہ اُن کی پارٹی کرونا وائرس کے مریضوں کے علاج میں مصروف عمل ڈاکٹرز کو 10 ہزار حفاظتی کٹس فراہم کرے گی۔
شہباز شریف نے حکومت سے شرح سود دو سے تین فی صد مزید کم کرنے کا مطالبہ بھی کیا۔ شہباز شریف نے کہا کہ موجودہ صورتِ حال میں حکومت غریب عوام کی دیکھ بھال کے لیے منصوبہ سامنے لائے۔
شہباز شریف کا کہنا تھا کہ وبا پر مکمل کنٹرول تک دیہاڑی دار افراد کو وظیفہ دیا جائے۔
- By ضیاء الرحمن
پاکستان میں ٹرین آپریشن معطل کرنے کا اعلان
پاکستان ریلوے نے منگل اور بدھ کی درمیانی سب 12 بجے سے ٹرین آپریشن معطل کرنے کا فیصلہ کیا ہے۔
پاکستان ریلوے کی جانب سے جاری نوٹی فکیشن کے مطابق ریلوے آپریشن 31 مارچ تک معطل رہے گا۔
محکمہ ریلوے نے ایڈوانس بکنگ کرانے والے افراد کو ہدایت کی ہے کہ وہ ری فنڈ کے لیے رابطہ کر سکتے ہیں۔
- By شمیم شاہد
پشاور ہائی کورٹ سمیت ماتحت عدالتیں 28 مارچ تک بند
چیف جسٹس پشاور ہائی کورٹ جسٹس وقار احمد سیٹھ نے صوبائی حکومت کی درخواست پر ہائی کورٹ سمیت ماتحت عدالتیں 28 مارچ تک بند رکھنے کا حکم دیا ہے۔
پشاور ہائی کورٹ کے جاری کردہ اعلامیے میں کہا گیا ہے کہ ہنگامی حالات میں پشاور ہائی کورٹ کے دو جج اور ضلعی سطح پر ایڈیشنل سیشن جج اور ایک جوڈیشل مجسٹریٹ اس دوران دستیاب ہوں گے۔
پشاور ہائی کورٹ نے اس سے قبل سول اور دیوانی مقدمات کی سماعت غیر معینہ مدت تک کے لیے ملتوی کر دی تھیں۔
دریں اثنا خیبر پختونخوا کے طول و عرض میں جزوی لاک ڈاؤن منگل کو بھی جاری ہے۔ تمام سرکاری اور نیم سرکاری ادارے بند ہیں۔ دفاتر، ہوٹل اور ریستوران اور بڑے تجارتی مراکز بھی بند ہیں۔ البتہ بعض شہروں اور قصبوں سے لاک ڈاؤن کی خلاف ورزی کے واقعات بھی سامنے آ رہے ہیں۔
- By روشن مغل
پاکستان کے زیرِ انتظام کشمیر میں لاک ڈاؤن
پاکستان کے زیرِ انتظام کشمیر میں کرونا وائرس کا پھیلاؤ روکنے کے لیے لاک ڈاؤن جاری ہے۔ مظفر آباد سمیت دیگر شہروں میں کاروباری مراکز اور دُکانیں بند ہیں۔
