پاکستان میں موجود غیر ملکیوں کے ویزوں میں 30 اپریل تک توسیع
پاکستان کی وزارتِ داخلہ نے کرونا وائرس کا پھیلاؤ روکنے کے لیے تمام غیر ملکی افراد کے ویزوں میں 30 اپریل تک توسیع کر دی ہے۔
وزارت داخلہ کی جانب سے اس حوالے سے ایک نوٹی فکیشن بھی جاری کر دیا گیا ہے۔ جس میں کہا گیا ہے کہ یہ فیصلہ وائرس کا پھیلاؤ روکنے کے لیے لوگوں کے وسیع تر مفاد میں کیا گیا۔
بھارت میں لاک ڈاؤں میں مزید توسیع کا عندیہ
بھارت کے وزیر اعظم نریندر مودی نے کہا ہے کہ لاک ڈاؤن کو اچانک ختم کرنا ممکن نہیں ہے۔ لہذٰا اس میں توسیع کی جا سکتی ہے۔ بدھ کو بھارت کی مختلف سیاسی جماعتوں کے رہنماؤں کے ساتھ ویڈیو مشاورت کے بعد بھارتی وزیر اعظم کا کہنا تھا کہ کرونا وائرس کے پھیلاؤ کے پیشِ نظر پابندیاں فوری طور پر ہٹانا ممکن نہیں ہو گا۔
بھارت میں 21 روزہ لاک ڈاؤن کی مدت 14 اپریل کو ختم ہو رہی ہے۔ ملک میں کرونا وائرس سے اب تک 149 ہلاکتیں ہو چکی ہیں۔ جن میں سے 35 ہلاکتیں گزشتہ 24 گھنٹے میں ہوئی ہیں۔
امریکہ کے صدر ڈونلڈ ٹرمپ نے بھارت کی جانب سے اینٹی ملیریا دوا، ہائڈروکسی کلوروکوئن، کی سپلائی کی ہامی بھرنے کے بعد، بھارتی وزیر اعظم نریندر مودی کو عظیم اور واقعی اچھا دوست قرار دیا ہے۔
صدر ٹرمپ نے تصدیق کی ہے کہ بھارتی ریاست گجرات کی تین دوا ساز فیکٹریوں سے دواؤں کی بڑی کھیپ جلد امریکہ پہنچ رہی ہے۔
سینئر کانگریس رہنما ششی تھرور نے اس معاملے پر رد عمل ظاہر کرتے ہوئے صدر ٹرمپ سے کہا ہے کہ بھارت بغیر کسی غرض کے دوا کی سپلائی پر راضی ہوا ہے۔ لہذٰا اگر امریکی لیبارٹری میں کرونا وائرس کی ویکسین تیار ہو جائے تو امریکہ کو اسے بھارت بھجوا کر احسان کا بدلہ چکانا چاہیے۔
پاکستان میں امدادی رقوم کی تقسیم جمعرات سے شروع کرنے کا فیصلہ
پاکستان کے وزیراعظم عمران خان نے خدشہ ظاہر کیا ہے کہ اپریل کے آخر تک کرونا وائرس کے متاثرین کی تعداد بڑھ سکتی ہے۔ اُنہوں نے بتایا کہ آئندہ دو ہفتوں میں 144 ارب روپے تقسیم کیے جائیں گے۔
اسلام آباد میں صحافیوں سے بات چیت میں وزیراعظم کا کہنا تھا کہ پاکستان کو کرونا وبا جیسے بڑے چیلنج کا سامنا ہے۔ احتیاطی تدابیر اختیار کر کے ہم بہت بڑے مسئلے سے بچ سکتے ہیں۔
اُنہوں نے کہا کہ جتنے زیادہ لوگ جمع ہوں گے بیماری اتنی تیزی سے پھیلے گی، جنہیں بیماری لگ گئی ان میں سے 85 فی صد لوگوں کو خاص فرق نہیں پڑے گا۔ وہ اسپتال جائے بغیر ٹھیک ہو جائیں گے۔
عمران خان بولے کہ ایس ایم ایس کیش پروگرام میں کوئی سیاسی مداخلت نہیں ہو رہی۔ ایس ایم ایس کے ذریعے لوگوں کی رجسٹریشن ہو گی۔ فی خاندان 12 ہزار روپے دیے جائیں گے۔
وزیراعظم نے کہا کہ تین ہفتے پہلے ہم نے لاک ڈاوَن کا فیصلہ کیا تھا، پاکستان میں پانچ کروڑ لوگ غربت کی لکیر سے نیچے ہیں۔ لاک ڈاؤن سے یہ طبقہ سب سے زیادہ متاثر ہو رہا ہے۔ لہذٰا 14 اپریل سے تعمیراتی شعبہ کھول رہے ہیں۔
کرونا وائرس: دھوکے باز ویب سائٹس کے خلاف کارروائی کی ہدایت
ویب سائٹس ایڈریسز کی جانچ پڑتال کرنے والے ادارے (آئی سی این این اے) نے ویب سائٹس ایڈریس جاری کرنے والی کمپنیوں کو خبردار کیا ہے کہ کرونا وائرس کے پیشِ نظر فراڈ اور دھوکہ دہی میں ملوث ویب سائٹس کے خلاف کریک ڈاؤن کیا جائے۔
'انٹرنیٹ کارپوریشن فار اسائنڈ نیمز اینڈ نمبرز' (آئی سی اے این این) نے اس ضمن میں تمام اداروں کو ایک خط لکھا ہے۔
ماہرین کے مطابق کرونا وائرس سے ملتے جلتے ناموں پر مشتمل ویب سائٹس مختلف ناموں سے صارفین کو اشتہار یا پیغام بھیجتی ہیں۔ جن سے صارف کے ڈیٹا تک رسائی حاصل کی جا سکتی ہے۔
رپورٹ میں کہا گیا ہے صرف مارچ میں ایک لاکھ ایسی ویب سائٹس رجسٹر ہوئی ہیں۔ جن کے ایڈریسز 'کووڈ' 'کرونا' 'وائرس' یا اس سے ملتے جلتے ہین۔ ان ویب سائٹس کے ذریعے ہزاروں 'سپیم اشہتارات' صارفین کو موصول ہو رہے ہیں۔ جن کے ذریعے لوگوں کے ساتھ فراڈ کیا جا رہا ہے۔
ادارے نے دنیا بھر میں ویب سائٹس رجسٹر کرنے والے سیکڑوں اداروں کو اس بابت متنبہ کیا ہے کہ وہ اس صورتِ حال کے سد باب کے لیے نئے ویب سائٹ ایڈریس جاری کریں۔