'نماز تراویح اور اجتماعی عبادات سے متعلق حتمی فیصلہ ریاستِ پاکستان کا ہی ہو گا'
پاکستان کے وفاقی وزیر برائے مذہبی امور نور الحق قادری کا کہنا ہے کہ کرونا وائرس کے باعث مسلمانوں کے مقدس مہینے رمضان میں نماز تراویح اور اجتماعی عبادات سے متعلق کسی کی خواہش پر فیصلے نہیں ہوں گے۔ اس حوالے سے حتمی فیصلہ ریاستِ پاکستان کا ہی ہو گا۔
وفاقی وزیر کے بقول رویت ہلال کمیٹی کے چیئرمین مفتی منیب الرحمن نے نماز اور تراویح سے متعلق جو کہا وہ اُن کے فیصلے کے بجائے مطالبات تھے۔
نور الحق قادری نے بتایا کہ رمضان میں پاکستان سے لوگ عمرہ کی ادائیگی کے لیے سعودی عرب نہیں جا سکیں گے۔ سعودی حکومت نے رمضان میں عمرہ ویزوں کا اجرا روک دیا ہے۔
اسلام آباد میں وائس آف امریکہ کو دیے گئے خصوصی انٹرویو میں وفاقی وزیر نور الحق قادری کا کہنا تھا کہ مساجد میں عبادات کے حوالے سے حکومت اور علما کے درمیان آنکھ مچولی جاری ہے۔ علما کے ساتھ بعض معاملات پر اختلافات صرف کرونا وائرس کے باعث ہی نہیں بلکہ ماضی میں بھی ایسا ہوتا رہا ہے۔
- By شمیم شاہد
قبائلی اضلاع میں انٹرنیٹ کی سہولت فراہم کرنے کا مطالبہ
پاکستان کے دیگر علاقوں کی طرح تمام قبائلی اضلاع میں بھی تعلیمی ادارے بند ہیں جب کہ شہروں اور قصبوں کے تعلیمی اداروں میں زیر تعلیم طلبہ آبائی علاقوں کو واپس جا چکے ہیں۔
کرونا وائرس سے پیدا شدہ صورت حال کے پیش نظر ملک کے زیادہ تر تعلیمی اداروں نے آن لائن درس و تدریس کا سلسلہ شروع کر دیا ہے مگر قبائلی علاقوں میں انٹرنیٹ کی سہولیات نہ ہونے کے باعث یہاں کے طلبہ اس تدریس کے عمل کا حصہ بننے سے محروم ہیں۔
قبائلی علاقؤں کے متاثرہ طلبہ اور نوجوانوں سمیت تمام سیاسی جماعتوں کے رہنما بھی قبائلی اضلاع میں انٹرنیٹ کی سہولت فراہم کرنے کا مطالبہ کر رہے ہیں۔
صدر ٹرمپ کی کانگریس کو ملتوی کر کے تقرریاں کرنے کی دھمکی
امریکہ کے صدر ڈونلڈ ٹرمپ نے کانگریس کی منظوری کے بغیر اہم عہدوں پر تعیناتیاں کرنے کا عندیہ دیا ہے۔ صدر نے دھمکی دی ہے کہ وہ اس کے لیے کانگریس کو ملتوی بھی کر سکتے ہیں۔
صدر ڈونلڈ ٹرمپ نے ذرائع ابلاغ کو بتایا کہ سینیٹ میں ڈیمو کریٹک پارٹی کے اراکین اُن کی جانب سے کی گئی اعلٰی عہدوں پر تقرریاں روکنا چاہتے ہیں۔ لہذٰا وہ اپنا آئینی اختیار استعمال کرتے ہوئے کانگریس کے دونوں ایوانوں کو ملتوی کر کے اہم عہدوں پر تعیناتیاں یقینی بنائیں گے۔
صدر نے جن عہدوں پر تعیناتیوں کی منظوری دی ہے ان میں ڈائریکٹر آف نیشنل انٹیلی جنس اور نشریاتی ادارے وائس آف امریکہ کو چلانے والی ایجنسی کے سربراہ کا عہدہ بھی شامل ہے۔
وائٹ ہاؤس کی جانب سے حالیہ دنوں میں وائس آف امریکہ کی کرونا وائرس سے متعلق کوریج پر تنقید بھی جاتی رہی ہے۔
- By ضیاء الرحمن
لاہور کے پانچ علاقوں میں کرونا وائرس 'سپر اسپریڈر' کے ذریعے پھیلا
محکمہ صحت پنجاب کے مطابق لاہور کے پانچ علاقوں میں کرونا وائرس 'سپر اسپریڈر' کے ذریعے پھیلا۔
پنجاب کے دارالحکومت لاہور کے پانچ علاقوں میں کرونا وائرس تیزی سے پھیلنے کے بعد 'سپر اسپرریڈر' اصطلاح سامنے آئی ہے۔
وائس آف امریکہ کو میو اسپتال لاہور کے پروفیسر ڈاکٹر اسد اسلم نے بتایا کہ سپر اسپریڈر ایک طبی اصطلاح ہے جس کا مطلب ہے کہ کسی بھی بیماری کا شکار ایسا فرد جو زیادہ لوگوں کو متاثر کر سکے۔
پروفیسر ڈاکٹر اسد اسلم کے مطابق کرونا کی حالیہ وبا کے دوران سپر اسپریڈر کی اصطلاح لاہور
میں ثمن آباد کے علاقے اسکندریہ کالونی کے لیے استعمال کی گئی ہے۔ جہاں کرونا کا مرض بہت تیزی سے پھیلا ہے۔
ان کا کہنا تھا کہ سپر اسپریڈر ایسے شخص کو کہتے ہیں کہ جو ہر جگہ پھرا ہے، وہ گھروں میں بھی گیا ہے، بازار میں بھی چکر لگایا ہو۔ اپنے رشتہ داروں میں بھی پھرا ہے۔ ایسے شخص کیرئیر (بیماری پھیلانے کا ذریعہ) ہوتے ہیں۔
سپر اسپریڈر کے حوالے سے انہوں نے کہا کہ ایسے شخص کو پتا نہیں ہوتا کہ وہ کسی مرض یا کرونا میں مبتلا ہے لیکن وہ کیرئیر بن جاتا ہے جو جہاں جہاں جاتا ہے اُس بیماری (کرونا) کے
جراثیم پھیلاتا جاتا ہے۔
انہوں نے کہا کہ اسکندریہ کالونی میں بھی ایک کرونا سے متاثرہ شخص معمول کے مطابق علاقے میں پھرتا رہا اور لوگوں میں کرونا کے وائرس منتقل کرتا رہا۔ اصولی طور پر سائنس کے مطابق کسی بھی وبا کا شکارایک شخص اپنا میل جول محدود رکھے تو وہ کم از کم دس لوگوں کو متاثر کرتا ہے اور اگر ایسا متاثرہ شخص مختلف گھروں اور کام کے لیے دفتر بھی جا رہا ہے جب کہ بازاروں میں بھی گیا ہو تو وہ 10 سے زیادہ افراد کو بھی متاثر کر سکتا ہے۔
محکمہ پرائمری اینڈ اسکینڈری ہیلتھ پنجاب کے مطابق لاہور کے پانچ علاقوں میں کرونا سے متاثرہ مریضوں کی تعداد ایک دم سامنے آئی۔ جس کے بعد اِن علاقوں کی جانچ پڑتال اور متاثرہ اشخاص کے ٹیسٹ شروع کیے گئے۔