- By شمیم شاہد
متحدہ عرب امارات سے وطن واپس آنے والے 68 افراد میں کرونا کی تصدیق
متحدہ عرب امارات کی ریاست دبئی سے پاکستان واپس آنے والے 68 افراد میں کرونا وائرس کی تصدیق ہوئی ہے۔
پرونشل ڈیزازٹر مینیجمنٹ اتھارٹی (پی ڈی ایم اے) کے مطابق 25 اپریل کو پاکستان انٹرنیشنل ایئر لائنز کی تین خصوصی پروازوں کے ذریعے 684 افراد پشاور کے باچا خان انٹرنیشنل ایئر پورٹ پہنچے تھے۔ جن میں خواتین اور بچے بھی شامل تھے۔
حکام کے مطابق ان افراد کو پشاور کے مختلف علاقوں میں قائم کردہ قرنطینہ مراکز میں رکھا گیا ہے۔ جن میں سے 434 افراد کے کرونا ٹیسٹس کیے گئے۔ جس کی رپورٹ کے مطابق 68 افراد میں کرونا وائرس کی تشخیص ہوئی ہے۔
- By شمیم شاہد
افغانستان میں پھنسے پاکستانی باشندوں کی واپسی
افغانستان میں مارچ کے وسط سے پھنسے پاکستانی باشندوں کی واپسی کا سلسلہ طورخم کے راستے جاری ہے۔
افغانستان سے وطن واپس آنے والوں کے لیے ضلع خیبر میں لگ بھگ سات خصوصی قرنطینہ مراکز قائم کیے گئے ہیں۔
حکام کا کہنا ہے کہ اتوار کی شام تک ان مراکز میں 1334 افراد رکھے گئے ہیں اور ان میں بھی 108 افراد میں کرونا وائرس کی تشخیص ہوئی ہے۔ جب کہ 911 افراد کو کلیئر قرار دیا گیا ہے۔
چین کے دو بڑے شہروں میں تعلیمی ادارے کھل گئے
چین کے دو انتہائی اہم شہروں میں تین ماہ بعد اسکول کھول دیے گئے ہیں جہاں بچوں کی تدریس کا سلسلہ ایک بار پھر شروع ہو گیا ہے۔
فرانسیسی خبر رساں ادارے 'اے ایف پی' کی رپورٹ کے مطابق چین کی حکومت نے کرونا وائرس کے باعث عائد پابندیوں میں بتدریج نرمی کرنا شروع کر دی ہے۔
پیر سے بیجنگ اور شنگھائی میں تعلیمی ادارے کھول دیے گئے جہاں کئی ماہ بعد تدریس کا سلسلہ ایک بار پھر بحال ہوا ہے۔
شنگھائی میں ثانوی اور اعلیٰ ثانوی جماعتوں کے اُن طلبہ کو کلاس میں جانے کی اجازت دی گئی ہے جو فائنل ایئر میں ہیں۔ بیجنگ میں صرف اعلیٰ ثانوی تعلیمی اداروں کے طلبہ کو کلاسز میں جانے کی اجازت دی گئی ہے۔
اسکول کھلنے کے حوالے سے شنگھائی کی 18 سالہ طالبہ ہانگ ہوان کا کہنا تھا کہ "مجھے خوشی ہے کہ میں ایک طویل عرصے کے بعد اپنی ہم جماعت ساتھیوں سے مل سکوں گی۔
برطانیہ میں لاک ڈاؤن میں فوری نرمی کا امکان مسترد
برطانیہ کے وزیر اعظم بورس جانسن نے کہا ہے کہ حکومت ابھی نہیں کہہ سکتی کہ کب تک لاک ڈاؤن سے متعلق پالیسی میں نرمی کی جا سکے گی اور یہ کس قدر جلد ممکن ہو سکے گا۔
برطانوی وزیر اعظم کا کہنا تھا کہ ہم ابھی یہ نہیں کہہ سکتے کہ کب کس قدر جلد یا کتنی دیر سے تبدیلی لا سکیں گے۔
انہوں نے کہا کہ حکومت اس حوالے سے آنے والے دنوں میں ہی کچھ بتا سکے گی۔
برطانوی وزیر اعظم کے مطابق یہ تمام فیصلے انتہائی شفافیت سے کیے جائیں گے۔
خیال رہے کہ برطانوی وزیر اعظم بورس جانسن نے کرونا وائرس سے صحت یاب ہونے کے بعد پیر کو دوبارہ اپنی ذمہ داریاں سنبھالی ہیں جب کہ ان پر شدید دباؤ ہے کہ وہ برطانیہ میں لاک ڈاؤن کے حوالے سے واضح نقشہ پیش کریں اور برطانیہ میں وبا کے ٹیسٹ کم ہونے کے حوالے سے سوالات کے جواب دیں۔