افغانستان میں کرونا کے مزید 215 کیس رپورٹ
افغانستان کی وزارت صحت نے 14 صوبوں میں گزشتہ 24 گھنٹوں میں کرونا وائرس کے 215 نئے کیسز کی اطلاع دی ہے۔
افغانستان میں کووڈ 19 مریضوں کی کل تعداد 3778ہو گئی ہے۔ کابل 1025 کیسز کے ساتھ ملک میں 34 صوبوں میں سر فہرست ہے۔ صحت کے نائب وزیر ڈاکٹر واحداللہ مجروح نے کرونا وائرس سے مرنے والوں کی تعداد 109 بتائی ہے جبکہ جمعے کے روز تک 472 افراد صحت یاب بھی ہو چکے ہیں۔
بھارت میں لاک ڈاؤن کے باعث آن لائن شادی، ہزاروں افراد کی شرکت
بھارت میں لاک ڈاؤن کے باعث ایک جوڑے نے 19 اپریل کو شیڈول اپنی شادی کی تقریب ملتوی کرنے کے بجائے انٹرنیٹ کے ذریعے اسے ممکن بنایا۔ دلہا ممبئی اور دلہن اتر پردیش میں تھی جب کہ پنڈت نے ریاست چھتیس گڑھ میں بیٹھ کر شادی کی رسومات ادا کیں۔
بھارت میں شادی کی تقریبات کئی روز تک جاری رہتی ہیں، لیکن کرونا وائرس کے باعث لاک ڈاؤن نے شادی کی تقریبات کو بھی محدود کر دیا ہے۔ لہذٰا اب کئی جوڑے آن لائن شادی کو ترجیح دے رہے ہیں۔
دلہا سوسن ڈانگ شادی کی رسومات کے لیے ممبئی میں روایتی لباس زیبِ تن کیے آن لائن ہوئے جب کہ دلہن کریتی نارنگ اتر پردیش کے شہر بریلی سے سرخ جوڑا پہنے آن لائن ہوئیں۔
دلہا، دلہن کے لگ بھگ 100 عزیز و اقارب ایک آن لائن ایپ کے ذریعے مختلف مقامات سے شادی میں شریک ہوئے۔ تقریب کی لائیو اسٹریمنگ کی گئی جسے لگ بھگ 16 ہزار افراد نے دیکھا۔
کرونا وائرس صورتحال پر غور کے لیے قومی اسمبلی کا اجلاس آئندہ ہفتے ہوگا
پاکستان کی پارلیمانی جماعتوں کے رہنماؤں نے کرونا وائرس کے پیشِ نظر لاک ڈاؤن کے بعد پارلیمنٹ کے ایوان زیریں یعنی قومی اسمبلی کا اجلاس بلانے پر اتفاق کیا ہے۔
قومی اسمبلی کا اجلاس بلانے کے حوالے سے قائم کردہ خصوصی کمیٹی کے اجلاس میں فیصلہ کیا گیا ہے کہ یہ غیر روایتی اجلاس اگلے ہفتے 11 مئی سے شروع ہو گا۔
اجلاس میں کرونا وائرس کے باعث پیدا ہونے والی صورتِ حال کا جائزہ لیا جائے گا۔
حزب اختلاف اور حکومتی جماعت کے درمیان یہ طے پایا ہے کہ اس غیر معمولی اجلاس میں نہ تو قانون سازی ہو گی۔ نہ سوالات پوچھے جائیں گے اور نہ ہی کوئی توجہ دلاؤ نوٹس یا تحریک التوا پیش کی جائے گی۔
کرونا وائرس کہاں سے شروع ہوا؟
تیزی سے پھیلنے والے ہلاکت خیز کرونا وائرس سے سب سے زیادہ جانی اور معاشی نقصان اٹھانے والا ملک امریکہ ہے، جسے دوسری جنگ عظیم کے بعد سب سے بڑی کساد بازاری کا خدشہ ہے۔ صدر ٹرمپ وائرس سے پہنچنے والے نقصان کا ذمہ دار چین کو ٹھہراتے ہوئے، کہہ چکے ہیں کہ اسے یہ قیمت چکانا ہو گی۔
چین پر دو طرح کے الزام لگائے جاتے ہیں۔ اول یہ کہ اس نے دنیا کو بر وقت وائرس کے پھیلاؤ سے آگاہ نہیں کیا اور دوسرا یہ کہ کرونا چینی شہر ووہان میں واقع اس لیبارٹری سے نکلا جہاں وائرسوں پر تحقیق کی جاتی ہے۔
امریکی وزیر خارجہ پومپیو نے حال ہی میں کہا ہے کہ امریکہ کے پاس یہ شواہد موجود ہیں، جو اس جانب اشارہ کرتے ہیں کہ وائرس ووہان کی وائرالوجی لیباٹری سے برآمد ہوا تھا۔ ان کا یہ بھی کہنا تھا کہ یہ واضح نہیں ہے کہ وائرس جان بوجھ کر پھیلایا گیا یا بدانتظامی کے سبب وہاں سے لیک ہوا، کیونکہ ان کے بقول، چین میں لیبارٹریوں کی سیکیورٹی کے فول پروف ہونے پر سوالات موجود ہیں۔
دوسری جانب چین کا کہنا ہے کہ کرونا وائرس ایک امریکی فوجی خاتون ووہان لے کر آئی تھی جو وسط اکتوبر میں ووہان میں عالمی فوجی کھلیوں میں شرکت کرنے والے تین سو امریکی فوجیوں کے دستے میں شامل تھی۔ اس میں بعدازاں پازیٹو ٹیسٹ رپورٹ ہوا تھا۔ چینی عہدے داروں کا کہنا ہے کہ اس کے بعد سے علاقے میں وائرس پھیلنا شروع ہوا۔ امریکہ اس کی تردید کرتا ہے۔