دنیا بھر میں ایک دن میں ریکارڈ ایک لاکھ سے زائد افراد متاثر
بین الاقوامی ادارۂ صحت (ڈبلیو ایچ او) نے کرونا وائرس کے پھیلاؤ میں تیزی کی نشان دہی کرتے ہوئے دنیا میں ایک دن میں سب سے زیادہ افراد کے متاثر ہونے کی تصدیق کی ہے۔
ادارے کے مطابق نئے کیسز سامنے آنے کے بعد دنیا بھر میں وائرس سے اب تک متاثر ہونے والے افراد کی تعداد 50 لاکھ سے بڑھ گئی ہے۔
بین الاقوامی ادارۂ صحت نے بدھ کو ایک بیان میں بتایا کہ گزشتہ 24 گھنٹے کے دوران دنیا کے مختلف ملکوں میں وائرس کے ایک لاکھ چھ ہزار سے زائد نئے کیس رپورٹ ہوئے۔
چین میں دسمبر 2019 میں کرونا وائرس سامنے آنے کے بعد سے ایک دن میں وبا سے متاثر ہونے والے افراد کی یہ سب سے زیادہ تعداد ہے۔ وائرس سے دنیا بھر میں اب تک تین لاکھ 26 ہزار سے زائد افراد کی جان جا چکی ہے جن میں سے نصف سے زائد ہلاکتیں یورپ میں ہوئی ہیں۔
ڈبلیو ایچ او کے سربراہ ٹیڈروس ایڈہینم گیبریاسس کا کہنا ہے کہ وہ کم اور متوسط آمدن والے ممالک کے لیے بہت زیادہ فکر مند ہیں۔
کرونا ڈراونے خواب دکھا رہا ہے
کرونا وائرس کے وبائی صورت اختیار کرنے کے بعد دنیا بھر میں لاکھوں افراد اس وائرس سےمتعلق خوفناک خواب دیکھنے لگے ہیں۔
بہت سے لوگ ایسے خوابوں کو سوشل میڈیا پر شیئر بھی کر رہے ہیں۔ سائنسدان اور ماہر نفسیات اس صورت حال کے بارے میں کیا کہتے ہیں؟ دیکھیے اس رپورٹ میں
شام کے پناہ گزین کیمپ میں کرونا وبا پھیلنے کا خطرہ
شام کے مشرقی علاقے الحسقہ میں مقامی حکام نے الحول پناہ گزین کیمپ میں کرونا وائرس کے پھیلاؤ کا خدشہ ظاہر کیا ہے جہاں ہزاروں کی تعداد میں داعش سے منسلک خاندان قید ہیں۔
حکام کا کہنا ہے کہ اس کی وجہ داعش کی خواتین کا مذہب کے نام پر کرونا کے خلاف حفاظتی اقدامات پرعمل نہ کرنا ہے۔
بوسنیا کی مذہبی روایات پر کرونا کے اثرات
کرونا کی عالمی وبا نے دنیا بھر میں لوگوں کو اپنی مذہبی روایات کو منانے کے طریقے میں تبدیلی پر مجبور کر دیا ہے۔ جیسے بوسنیا کے دارالحکومت سراجیوو میں اس سال پہلی بار رمضان کے مہینے کے سرکاری اعلان کے لیے توپ تو چلائی گئی لیکن اس خوشی کو منانے کے لیے عام لوگ موجود نہیں تھے۔
