- By قمر عباس جعفری
پاکستان میں کرونا کے مریضوں کی تعداد بڑھ رہی ہے
پاکستان میں لاک ڈاؤن تقریباً ختم ہونے اور لوگوں کی جانب سے احتیاطی تدابیر اختیار نہ کئے جانے کے سبب کرونا کے مریضوں کی تعداد میں اضافہ ہو رہا ہے، خاص طور پر ان مریضوں کی تعداد میں جن کی حالت نازک ہوتی ہے، جنہیں شدید بیمار کہا جاتا ہے۔
پاکستان میں ینگ ڈاکٹرز ایسو سی ایشن کے جنرل سیکریٹری، ڈاکٹر سلمان کاظمی نے وائس آف امریکہ سے گفتگو کرتے ہوئے کہا کہ ملک کے اسپتالوں میں آئی سی یو یونٹ بھرے ہوئے ہیں، بیڈز بھرے ہوئے ہیں۔ ایمرجنسی میں ان مریضوں کے لئے جگہیں مختص کی جا رہی ہیں۔
انھوں نے کہا کہ باہر نکلنے والے کوئی احتیاطی تدابیر اختیار نہیں کر رہے اور اگر صورت حال اسی طرح رہی تو آئندہ دس سے پندرہ دن میں یہ تعداد بہت بڑھ سکتی ہے اور پھر دوبارہ لاک ڈاؤن کے علاوہ کوئی چارہ کار باقی نہیں رہے گا، جس کا حکومت بھی عندیہ دے رہی ہے۔
انہوں نے کہا کہ ایک اہم بات یہ دیکھنے میں آرہی ہے کہ جن لوگوں کو ان وینٹی لیٹر پر رکھا جاتا ہے، جن میں گلے کے اندر ٹیوب ڈالی جاتی ہے، ان کے بچنے کی شرح بہت کم ہے، جبکہ ان مریضوں کے بچنے کی شرح زیادہ ہے جنہیں ان وینٹی لیٹرز پر رکھا جاتا ہے، جس میں چہرے پر ماسک لگایا جاتا ہے۔
ڈاکٹر کاظمی نے لوگوں سے اپیل کی کہ وہ احتیاطی تدابیر اختیار کریں، خاص طور سے نوجوان جو باہر سے بیماری لے کر گھر آجاتے ہیں اور اپنے بزرگوں اور ان لوگوں کو لگاتے ہیں جو ہائی رسک گروپ میں ہیں۔
اٹلی میں کرونا وائرس سے خبردار کرنے والی ایپ تیار
اٹلی کے متعدد علاقوں میں جلد ایک موبائل ایپ متعارف کرائی جائے گی جس سے کرونا وائرس میں مبتلا افراد کا علم ہوسکے گا۔ یہ ملک بھر میں ہر شخص کو دستیاب ہوگی اور لوگ اسے رضاکارانہ طور پر استعمال کریں گے جبکہ ان کی شناخت ظاہر نہ ہونے ضمانت ہوگی۔
اس ایپ کا نام 'امیونی' رکھا گیا ہے اور اسے اٹلی کی وزارت آئی ٹی کی تجویز پر بنایا گیا ہے۔
اسے تیار کروانے والے حکام کا کہنا ہے کہ یہ ایپ 29 مئی سے موبائل فون میں ڈاؤن لوڈ کی جاسکے گی۔ اس کی مدد سے کرونا وائرس میں مبتلا افراد اور ان سے رابطے میں آنے والے لوگوں کے بارے میں جاننے میں تیزی آسکے گی۔
وزارت کے چیف ٹیکنالوجی افسر پاؤلو ڈی روزا نے کہا کہ یہ ایپ روایتی طریقوں سے مختلف ہے جن میں آپ کو لوگوں کو شناخت کرنا پڑتا ہے۔ یہ ایپ صرف خبردار کرے گی کہ آپ کسی ایسے شخص سے رابطے میں آنے والے ہیں جو کرونا وائرس میں مبتلا ہے۔
اس ایپ کی بدولت لوگ یہ جان سکیں گے کہ وہ وائرس سے محفوظ ہیں یا کسی خطرے کی زد میں آچکے ہیں۔ عام صورتوں میں لوگ لاعلم رہتے ہیں اور بیماری کی علامات ظاہر ہونے پر انھیں پتا چلتا ہے۔ اب وہ کرونا وائرس میں مبتلا مریض سے رابطے میں آتے ہی ڈاکٹر سے رجوع کرسکیں گے۔
ڈی روزا نے کہا کہ یہ ایپ نجی معلومات کا تحفظ کرتی ہے اور سے یقینی بنانے کے لیے خاص اقدامات کیے گئے ہیں۔ اس ایپ کو استعمال کرنے والوں کو شناخت کرنا بے حد مشکل ہوگا۔ صارف کو محض اتنا بتانا پڑے گا کہ وہ کس علاقے کا رہنے والا ہے۔
انھوں نے کہا کہ اس ایپ کو کامیاب بنانے کے لیے ضروری ہے کہ کم از کم 60 فیصد لوگ اسے استعمال کریں۔ بہرحال یہ کارآمد شے اور دنیا میں بہت کم ملک یہ ٹیکنالوجی استعمال کر رہے ہیں۔
ڈی روزا کے مطابق، ایسی ایپ کا بنانا آسان نہیں تھا اور اس کے لیے محکمہ صحت کے حکام اور نجی معاملات کے تحفظ کے ماہرین سے مدد لی گئی۔ کئی دوسرے ملکوں سے معلومات کا تبادلہ بھی کیا گیا۔ لیکن کسی کو بھی اندازہ نہیں تھا کہ اس سلسلے کی بہترین ایپ کیسی ہوسکتی ہے۔ اس قدر تیزی سے پھیلنے والے وائرس کو روکنے کے لیے ایسی ہی ایپ درکار تھی جو اتنی ہی تیزی سے وائرس کی زد میں آنے والوں کا پتا چلاسکے۔
ابھی وبا کی پہلی لہر چل رہی ہے، دوسری بھی آئے گی، عالمی ادارہ صحت
عالمی ادارہ صحت نے خبردار کیا ہے کہ ابھی تک کرونا وائرس وبا کی پہلی لہر چل رہی ہے اور دنیا اس سے باہر نہیں نکلی جبکہ دوسری لہر بھی آئے گی۔
ادارے کے ایگزیکٹو ڈائریکٹر ڈاکٹر مائیک رائن نے پیر کو کہا کہ ہم عالمی سطح پر وبا کی پہلی لہر کے بیچ میں گھرے ہوئے ہیں۔ ہم ابھی تک اس مرحلے میں ہیں جس میں بیماری زور پکڑ رہی ہے۔
انھوں نے کہا کہ جنوبی امریکہ، جنوبی ایشیا اور دوسرے خطوں میں کیسز کی تعداد بڑھ رہی ہے۔ بیماری کسی بھی وقت قابو سے باہر ہوسکتی ہے۔ شمالی امریکہ، یورپ، جنوب مشرقی ایشیا اور دوسرے خطوں کو اپنے اقدامات میں نرمی کرنے میں جلدی نہیں کرنی چاہیے۔
ڈاکٹر رائن عالمی ادارہ صحت کے ہنگامی پروگراموں کے سربراہ ہیں۔ انھوں نے وبا کی دوسری لہر سے مہینوں پہلے انتباہ جاری کیا جس سے ان لوگوں کے خدشات کو تقویت ملی جو کاروبار جلدی کھولنے کی مخالفت کررہے ہیں۔
دنیا میں سے زیادہ کیسز اور اموات والے ملک امریکہ میں پیر میموریل ڈے کے موقع پر بڑی تعداد میں لوگ باہر نکلے اور ساحل سمندر اور عوامی پارکس میں دکھائی دیے۔
پاکستان میں کرونا سے مزید 28 اموات
پاکستان میں گزشتہ 24 گھنٹوں کے کرونا وائرس کے شکار مزید 28 مریض چل بسے جس کے بعد ہلاکتوں کی کل تعداد 1225 ہوگئی ہے۔
سرکاری اعداد و شمار کے مطابق گزشتہ چوبیس گھنٹوں میں 1446 افراد میں وائرس کی تشخیص ہوئی ہے۔ اس طرح پاکستان میں کرونا وائرس سے متاثرہ ہونے والوں کی مجموعی تعداد 58 ہزار 406 تک پہنچ گئی ہے جن میں سے 19142 صحت یاب ہو چکے ہیں۔
پاکستان میں ایک روز کے دوران 8491 افراد کے کرونا ٹیسٹ بھی کیے گئے ہیں جب کہ ملک بھر میں ٹیسٹ کی مجموعی تعداد چار لاکھ 99 ہزار 399 تک پہنچ چکی ہے۔
