کرونا وائرس: آسٹریلوی بورڈ کو رواں برس ٹی ٹوئنٹی ورلڈ کپ کے انعقاد پر تحفظات
آسٹریلین کرکٹ بورڈ کے سربراہ کیون روبرٹس نے رواں برس ٹی ٹوئنٹی ورلڈ کپ کے انعقاد پر تحفظات کا اظہار کیا ہے۔ اُن کا کہنا ہے کہ وبائی مرض کی موجودگی میں اکتوبر، نومبر میں عالمی کپ کا انعقاد خطرے سے خالی نہیں ہے۔
کیون روبرٹس نے جمعے کی صبح ایک ویڈیو کال کے ذریعے صحافیوں سے گفتگو میں کہا کہ ہم سب پرامید ہیں کہ عالمی کپ اکتوبر، نومبر میں منعقد ہو لیکن وبائی مرض کی وجہ سے جو حالات درپیش ہیں ان میں ایونٹ کا انعقاد خطرناک ہو سکتا ہے۔
انہوں نے کہا کہ کرونا وائرس کی موجودگی میں ٹی ٹوئنٹی ورلڈ کپ کے امکانات وقت گزرنے کے ساتھ ساتھ کم ہوتے جا رہے ہیں۔
کیون نے مشورہ دیا کہ اگر عالمی کپ رواں برس نہ ہوسکا تو یہ فروری، مارچ میں کرایا جا سکتا ہے۔ رواں سال آئی سی سی کو کئی پیچیدہ مسائل کا سامنا ہے اس لیے وہ الجھن کا شکار ہے۔
لاک ڈاؤن کے دوران ایشیائی ملکوں میں بے چینی کا سبب بننے والی افواہیں
برِّ اعظم ایشیا میں کرونا وائرس کی وبا کے دوران گمراہ کُن معلومات اور افواہیں خوف و ہراس کا سبب بن رہی ہیں۔
پاکستان اور بھارت سمیت خطے کے دیگر ملکوں میں لاک ڈاؤن کے دوران متعدد ایسی غلط معلومات اور افواہیں پھیلائی گئیں جن کے سبب عوام میں خوف و ہراس اور بے چینی پھیل گئی ہے۔
پاکستان میں جہاں کرونا وائرس کے سبب نافذ کیے گئے لاک ڈاؤن میں نرمی کی گئی ہے۔ سماجی میڈیا پر ایک گمراہ کن ویڈیو شیئر کی گئی جس میں لاک ڈاؤن کی خلاف ورزی کرنے والے ایک دکان دار کو اپنی دکان چھوڑ کر بھاگتے دیکھا جا سکتا ہے۔
درحقیقت یہ ویڈیو 2015 میں پولیس کے ایک قحبہ خانے پر چھاپے کی ہے جس میں ایک شخص کو بھاگتے ہوئے دیکھا جا سکتا تھا۔
پاکستانی صارفین کی طرف سے اس ویڈیو کا پرانا ہونے کی نشاندہی کیے جانے کے باوجود مذکورہ ویڈیو کو سماجی رابطوں کی ویب سائٹس فیس بک، ٹوئٹر، یوٹیوب اور واٹس ایپ پر لاکھوں صارفین نے دیکھا۔
سعودی عرب: کرونا سے مزید 16 اموات، مساجد میں نماز جمعہ کی اجازت
سعودی عرب میں کرونا وائرس سے گزشتہ 24 گھنٹوں کے دوران مزید 16 افراد ہلاک ہو گئے ہیں جب کہ ملک بھر میں لاک ڈاؤن میں نرمی کرتے ہوئے مساجد کھولنے کی اجازت دے دی گئی ہے۔
سعودی عرب میں اتوار سے باضابطہ طور پر مساجد کھولی جا رہی ہیں۔ البتہ جمعے کو بھی مساجد میں نماز جمعہ کی ادائیگی کی اجازت دی گئی ہے۔
ملک بھر کی 90 ہزار سے زائد مساجد کو جراثیم کش اسپرے سے صاف کیا گیا ہے۔
مساجد میں نماز کی ادائیگی کے لیے ایس او پیز بھی جاری کیے گئے ہیں جس میں لوگوں کو گھر سے وضو کر کے آنے اور مساجد میں داخل ہونے سے قبل ہاتھ سینیٹائز کرنے کی ہدایت کی گئی ہے۔
پاکستان میں بین الاقوامی فلائٹ آپریشن کی جزوی بحالی
پاکستان میں بین الاقوامی فلائٹ آپریشن جزوی طور پر بحال کر دیا گیا ہے۔ غیر ملکی پروازوں کو پاکستانی ہوائی اڈوں پر لینڈنگ کی اجازت دے دی گئی ہے۔
سول ایوی ایشن اتھارٹی کی جانب سے جاری کردہ نوٹم میں بتایا گیا ہے کہ مجاز اتھارٹی کی اجازت سے غیر ملکی پروازوں کو پاکستان کے ہوائی اڈوں پر لینڈ کرنے کی اجازت دے دی گئی ہے۔
یہ غیر ملکی پروازیں بطور فیری فلائٹس یعنی بغیر مسافروں کے جہاز پاکستانی ایئر پورٹس پر اتریں گے۔ صرف پاکستان سے مسافروں کو لے جانے کی اجازت ہو گی۔ نوٹم میں مزید بتایا گیا ہے کہ یہ اجازت جمعے کی رات 12 بجے سے ہو گی اور 30 جون تک برقرار رہے گی۔
ترجمان ایوی ایشن ڈویژن عبدالستار کھوکھر نے بتایا کہ پروازوں کو کھولنے سے متعلق فیصلہ وفاقی حکومت کی جانب سے کیا گیا ہے جس کے تحت شیڈول، نان شیڈول اور چارٹرڈ فلائٹس آپریٹ ہو سکیں گی۔ ایئر پورٹ پر غیر ملکی ایئرلائنز کے ایک ایک طیارے کو یومیہ لینڈنگ کی اجازت ہو گی جو پاکستان سے مسافروں کو لے کر روانہ ہو سکیں گی۔
انہوں نے بتایا کہ غیرملکی ایئر لائنز کے لیے قواعد و ضوابط بنا دیے گئے ہیں جن پر ان کو عمل کرنا لازمی ہو گا۔ جہازوں کو ڈس انفیکٹ کرنا لازمی قرار دیا گیا ہے۔
ایس او پیز کے تحت پاکستانی ہوائی اڈوں پر لینڈنگ کرنے والے غیر ملکی طیاروں کے عملے کو جہاز سے اترنے کی اجازت نہیں ہوگی۔ انہوں نے بتایا کہ قومی اور بین الاقوامی پروازیں گوادر اور تربت کے علاؤہ سب جگہ سے آپریٹ ہوں گی۔
کرونا کے پیش نظر پاکستان نے پہلی بار 21 مارچ کو دو ہفتوں کے لیے تمام بین الاقوامی پروازیں معطل کرنے کا اعلان کیا تھا۔ بعد میں اس بندش میں توسیع کر دی گئی تھی۔ اس کے علاوہ پی آئی اے نے بھی اپنی تمام بین الاقوامی پروازیں معطل کر دی تھیں۔