یمن میں کرونا وائرس تیزی سے پھیل رہا ہے
گزشتہ پانچ سال سے جنگ سے تباہ حال اور انسانی بحران سے دوچار یمن سے ایک اور بری خبر آئی ہے۔ اقوام متحدہ نے کہا ہے کہ ملک بھر میں کرونا وائرس وسیع پیمانے پر اور تیزی سے پھیل رہا ہے۔
عالمی ادارے کے فلاحی کاموں کے سربراہ مارک لوکوک کے مطابق انھیں خبریں مل رہی ہیں کہ تیز بخار اور سانس لینے میں دشواری کے شکار لوگوں کو اسپتال میں داخل نہیں کیا جارہا، کیونکہ یا تو وہ پہلے ہی بھرے ہوئے ہیں یا محفوظ طریقے سے علاج کے قابل نہیں۔ انھوں نے صحافیوں کو بتایا کہ بدقسمتی سے لوگ بیمار ہو رہے ہیں اور گھر پر انتقال کررہے ہیں۔
مقامی حکام کا بھی یہی کہنا ہے کہ روزانہ درجنوں اموات ہورہی ہیں، جن کی وجہ کا تعین نہیں کیا جا رہا۔
جنوبی مغربی صوبے تعز میں عالمی ادارہ صحت کے ساتھ کام کرنے والے ڈاکٹر آدم الجیدی نے کہا کہ وبا بڑے پیمانے پر پھیل رہی ہے جہاں پہلے ہی خسرہ، ڈینگی اور چکن گونیا جیسی بیماریاں موجود ہیں۔
ڈاکٹر الجیدی نے کہا کہ مقامی حکام سنجیدگی سے احتیاطی تدابیر اختیار نہیں کررہے جبکہ متحارب دھڑے بدستور لڑائی میں مصروف ہیں جس سے صورتحال مزید پیچیدہ ہوئی ہے۔
یمن کا نظام صحت پانچ سال کی جنگ سے بری طرح متاثر ہوا ہے۔ صحت عامہ کے محض نصف مراکز کام کررہے ہیں اور ان میں سے بھی بیشتر کے پاس وبا کا مقابلہ کرنے کے لیے عملے، دواؤں اور آلات کی کمی ہے۔
خیبر پختونخوا کے ضلع کرم میں ایک ہی خاندان کے 19 افراد میں کرونا کی تصدیق
افغانستان سے ملحقہ قبائلی ضلع کرم میں ایک ہی روز میں کرونا کے مزید 45 کیس رپورٹ ہوئے ہیں جب کہ ایک ہی خاندان کے 19 افراد میں وائرس کی تصدیق ہوئی ہے۔
ضلع کرم میں محکمہ صحت کے حکام کا کہنا ہے کہ علاقے کے 87 افراد کے کرونا ٹیسٹ لیے گئے جن میں سے 54 افراد کے ٹیسٹ مثبت آئے ہیں۔
ضلع کرم میں کرونا سے متاثرہ افراد کی تعداد 148 ہو گئی ہے۔
کرونا وائرس کے ایک مریض کے خاندان اور رشتہ داروں کے ٹیسٹ لیے گئے تو خاندان کے 19 میں سے 14 افراد کے ٹیسٹ مثبت آ گئے۔
ایران میں مساجد کھولنے کا اعلان
ایران کے صدر حسن روحانی نے ملک بھر میں کرونا کے باعث بند کی جانے والی مساجد کھولنے کا اعلان کیا ہے۔
ہفتے کو سرکاری ٹی وی پر لاک ڈاؤن میں نرمی کا اعلان کرتے ہوئے صدر روحانی نے کہا کہ شاپنگ مالز بھی شام چھ بجے کے بعد تک کھلے رکھنے کی اجازت دی جائے گی۔
ایران میں سرکاری اہلکاروں نے بھی ہفتے سے دفاتر میں کام شروع کر دیا ہے۔
ایرانی صدر نے کہا کہ ملک بھر کی مساجد کے دروازے عام شہریوں کے لیے کھولے جا رہے ہیں۔ لیکن شہریوں کو احتیاطی تدابیر اور سماجی فاصلے برقرار رکھنا ہوں گے۔
ایران میں اب بھی کئی علاقوں میں وائرس کا تیزی سے پھیلاؤ ہو رہا ہے۔ ملک بھر میں اب تک کرونا کے 146668 کیس رپورٹ ہو چکے ہیں جب کہ وائرس سے 7677 اموات ہو چکی ہیں۔