متحدہ عرب امارات کا ٹرانزٹ فلائٹس کی بحالی کا اعلان
متحدہ عرب امارات کی حکومت نے دو ماہ بعد ٹرانزٹ فلائٹس کی بحالی کا اعلان کیا ہے۔
امارات حکومت کے آفیشل ٹوئٹر اکاؤنٹ پر جاری ایک بیان میں کہا گیا ہے کہ نقل و حمل کے لیے ہوائی اڈوں کو دوبارہ کھولنے کا فیصلہ کیا ہے۔
تاہم حکام نے یہ نہیں بتایا کہ ہوائی اڈے ٹرانزٹ فلائٹس کے لیے کب سے کھولے جا رہے ہیں۔
جکارتہ میں جمعے سے پابندیاں مشروط طور پر ہٹانے کا اعلان
انڈونیشیا کے دارالحکومت جکارتہ میں کرونا وائرس کے باعث عائد کردہ پابندیاں مشروط طور پر اٹھانے کا اعلان کر دیا گیا ہے۔
جکارتہ کے گورنر اینی بسویدان نے جمعرات کو ویڈیو بریفنگ کے دوران اعلان کیا کہ جمعے سے پبلک ٹرانسپورٹ اور عبادت گاہوں کو کھولا جا رہا ہے تاہم شہریوں کو سماجی دوری کی احتیاط پر لازمی عمل کرنا ہو گا۔
انڈونیشیا میں سرکاری طور پر کسی بھی شہر میں لاک ڈاؤن نہیں ہے۔ البتہ جکارتہ میں حکام نے لاک ڈاؤن کر رکھا تھا۔
انڈونیشیا میں اپریل کے وسط میں پبلک ٹرانسپورٹ اور عبادت گاہوں سمیت کاروباری مراکز بند کر دیے گئے تھے۔ کرونا وائرس کے کیسز میں کمی کے بعد آہستہ آہستہ معمولات زندگی بحال کیے جا چکے ہیں۔
خیبر پختونخوا: ماسک کے بغیر سرکاری دفاتر میں داخلے پر پابندی
خیبر پختونخوا کی حکومت نے ماسک پہنے بغیر سرکاری دفاتر میں داخلے پر پابندی عائد کر دی ہے۔
صوبائی حکومت کی جانب سے جاری نوٹی فکیشن کے مطابق کرونا وائرس کے پھیلاؤ کے باعث عوامی مفاد میں فیصلہ کیا گیا ہے کہ کسی بھی شخص کو ماسک کے بغیر سرکاری دفاتر میں داخلے کی اجازت نہیں ہو گی۔
حکومت نے تمام محکموں کو بھی ہدایت کی ہے کہ وہ دفتر کے مرکزی دروازے پر بینر آویزاں کریں جس پر نمایاں درج ہو کہ ماسک کے بغیر داخلہ منع ہے۔
کرونا وائرس کا خطرہ: ویسٹ انڈیز کے تین کھلاڑیوں کی دورۂ انگلینڈ سے معذرت
ویسٹ انڈیز کرکٹ بورڈ نے دورۂ انگلینڈ کے لیے 14 رکنی اسکواڈ کا اعلان کر دیا ہے تاہم تین کھلاڑی ایسے بھی ہیں جنہوں نے کرونا وائرس کے خطرے کے پیشِ نظر انگلینڈ جانے سے انکار کر دیا ہے۔
ویسٹ انڈیز کرکٹ ٹیم کو اگلے ہفتے انگلینڈ کا دورہ کرنا ہے جس میں وہ انگلینڈ کے خلاف تین ٹیسٹ میچز پر مشتمل سیریز کھیلے گی۔
اس دورے کے لیے ویسٹ انڈین کرکٹ بورڈ نے بدھ کو 14 کھلاڑیوں کے ناموں کا اعلان کیا ہے۔
کرکٹ بورڈ کے حکام کے مطابق ڈیرن براوو، شمرون ہیٹمیر اور کیمول پال نے انگلینڈ نہ جانے کا فیصلہ کیا ہے جس کے بعد 11 ریزرو کھلاڑیوں میں سے تین کو ٹیم کا حصہ بنایا گیا ہے۔
ویسٹ انڈیز کرکٹ بورڈ کے مطابق تین کھلاڑیوں کی جانب سے انگلینڈ نہ جانے کے فیصلے کا احترام کرتے ہیں۔