نیمار کے لیے 120 ڈالرز کی کرونا امدادی رقم منظور
برازیل میں کرونا وائرس کے سبب متاثر ہونے والے کم آمدنی والے افراد کے لیے مختص امدادی رقم کے لیے فٹ بالر نیمار کے نام سے دائر کردہ درخواست کی بھی منظوری دی گئی تھی۔ تاہم حکام نے تحقیقات کے بعد اُن کا نام مستحقین کی فہرست سے نکال دیا ہے۔
نیمار کا نام، تاریخ پیدائش اور برازیل کا شناختی نمبر امدادی رقم حاصل کرنے کے لیے استعمال کیا گیا تھا۔
ایک سو بیس ڈالرز کی ہنگامی امداد ان لوگوں کو فراہم کی جا رہی تھی جو لاک ڈاؤن کی وجہ سے یا تو بے روزگار ہو گئے تھے یا اُنہیں مالی مشکلات کا سامنا تھا۔
نیمار کے اسٹاف نے رابطہ کرنے پر بتایا کہ نیمار نے کبھی اس امدادی رقم کے لیے درخواست نہیں دی تھی اور وہ نہیں جانتے کہ ایسا کس نے کیا ہے۔
- By روشن مغل
پاکستان کے زیرِ انتظام کشمیر میں کرونا کے مزید 32 کیسز رپورٹ
پاکستان کے زیرِ انتظام کشمیر میں گزشتہ 24 گھنٹوں کے دوران مزید 32 افراد میں کرونا وائرس کی تصدیق ہوئی جب کہ تین مریض صحت یاب ہوئے ہیں۔
کرونا وائرس کے شبہے میں 321 نئے افراد کے ٹیسٹ کے لیے سیمپل بھی لیے گئے ہیں۔
کرونا وائرس کے نئے مریضوں میں سے 14 کا تعلق مظفر آباد، سات کا راولا کوٹ، چار کا باغ، پانچ افراد کا بھمبر سے ہے اور میر پور میں بھی دو مریض سامنے آئے ہیں۔
پاکستان کے زیرِ انتظام کشمیر میں اب تک 7934 افراد کے ٹیسٹ کیے گئے ہیں جن میں سے 7881 کے نتائج آ چکے ہیں اور 331 افراد کرونا کے مریض پائے گئے ہیں۔
پاکستانی کشمیر میں کرونا کا شکار ہونے والوں میں سے مجموعی طور پر 185 افراد صحت یاب ہو چکے ہیں جنہیں ان کے گھروں پر بھیج دیا گیا ہے۔ اس کے علاوہ آٹھ افراد کرونا سے ہلاک بھی ہوئے ہیں۔
ہلاک شدگان میں سے پانچ افراد کا تعلق مظفرآباد، ایک کا راولا کوٹ جب کہ دو افراد کا تعلق میر پور کے علاقے سے ہے۔
- By روشن مغل
افغانستان میں کرونا وائرس کے ریکارڈ یومیہ کیسز رپورٹ
افغانستان کی وزارتِ صحت نے ملک کے 14 صوبوں میں گزشتہ 24 گھنٹوں میں کووِڈ 19 کے 915 نئے کیسز رپورٹ کیے ہیں۔
افغانستان میں کرونا وائرس سے متاثرہ افراد کی مجموعی تعداد 18 ہزار 900 سے زائد ہو گئی ہے۔ افغانستان میں کرونا کی وبا شروع ہونے کے بعد ایک ہی روز میں 915 نئے کیسز کا اندراج ایک ریکارڈ ہے۔
وزارتِ صحت کے بیان کے مطابق کرونا وائرس کے نتیجے میں اب تک 309 مریض ہلاک ہو چکے ہیں۔
اسی دوران 'رپورٹرز سین فرنٹیرز' (آر ایس ایف) نے جمعرات کو اپنی ایک رپورٹ میں بتایا ہے کہ افغانستان میں گزشتہ ہفتے ایک افغان صحافی اور ایک میڈیا ورکر کرونا وائرس سے ہلاک ہوئے ہیں۔
آر ایس ایف کا کہنا ہے کہ افغانستان میں کرونا کی وبا شروع ہونے کے بعد سے اب تک کم از کم 70 افغان صحافی اور میڈیا ورکرز وائرس سے متاثر ہو چکے ہیں۔
ایک کروڑ 20 لاکھ آبادی والے صوبے میں کرونا کے صرف 4500 مریضوں کی گنجائش
بلوچستان کے حکام نے خدشہ ظاہر کیا ہے کہ اگر صوبے میں کرونا وائرس کے مریضوں کی تعداد زیادہ بڑھی تو اسپتالوں میں کرونا کے مریضوں کو رکھنے کی گنجائش ختم ہو جائے گی۔
بلوچستان حکومت کے ڈائریکٹر جنرل صحت ڈاکٹر سلیم ابڑو نے وائس آف امریکہ کو بتایا ہے کہ ایک کروڑ 20 لاکھ کی آبادی والے صوبے میں تمام سرکاری اسپتالوں اور قرنطینہ کے لیے مختص کی گئی جگہوں پر صرف 4500 مریضوں کو رکھنے کی گنجائش موجود ہے۔
انہوں نے کہا کہ ان مقامات پر بیک وقت 500 ایسے لوگوں کو رکھا جا سکتا ہے جن کی حالت نازک ہو۔ ڈاکٹر سلیم ابڑو نے کہا کہ اگر صوبے میں کرونا سے متاثرہ افراد کی تعداد 50 ہزار تک پہنچ جاتی ہے تو اُس صورت میں ہم صرف دعا کر سکتے ہیں کیوں کہ ہمارے پاس گنجائش نہیں ہے۔
انہوں نے بتایا کہ بلوچستان میں کرونا سے متاثرہ مریض بڑی تعداد میں صحت یاب ہوئے ہیں۔ ان کے بقول صوبے میں کرونا سے ساڑھے چار ہزار لوگ متاثر ہوئے ہیں جب کہ دو ہزار سے زائد تندرست ہو گئے ہیں۔
ڈاکٹر سلیم ابڑو نے کہا کہ بلوچستان کو افرادی قوت کی کمی کا بھی سامنا ہے۔ اگر ہم ایک ہزار قرنطینہ سینٹر بھی بنا لیں تو اُن کو چلانے کے لیے ڈاکٹر اور دیگر طبی عملے کی کمی ہے۔
ڈاکٹر سلیم ابڑو کا کہنا تھا کہ صوبے میں طبی عملے کے 300 ارکان کرونا وائرس سے متاثر ہوئے ہیں جن میں 230 ڈاکٹرز، 10 نرسیں اور 60 افراد پیرا میڈکس اسٹاف کے بھی شامل میں۔