کرونا وائرس میرا سب سے بھیانک خواب ہے، ڈاکٹر فاؤچی
امریکہ میں وبائی امراض کے سب سے بڑے ماہر ڈاکٹر انتھونی فاؤچی نے کہا ہے کہ کرونا وائرس ان کا سب سے ڈراؤنا خواب ہے اور اس کے پھیلاؤ اور ہلاکت خیزی نے ان کو ششدر کردیا ہے۔
انھوں نے ان خیالات کا اظہار بایوٹیکنالوجی کمپنیوں کے اعلیٰ افسروں کی کانفرنس کے لیے خطاب کرتے ہوئے کیا۔
انھوں نے کہا کہ اس وائرس نے صرف چار ماہ میں پوری دنیا کو ہلکان کردیا۔ اور یہ سلسلہ ابھی رکا نہیں ہے۔ وہ جانتے تھے کہ ایسی کوئی وبا کبھی بھی پھوٹ سکتی ہے، لیکن جس چیز نے انھیں ششدر کردیا وہ اس کا انتہائی تیزی سے دنیا میں پھیل جانا ہے۔
کرونا بحران کی وجہ سے عسکریت پسندوں کا زور بڑھ سکتا ہے: آسٹریلوی انٹیلی جنس
آسٹریلیا کے سیکیورٹی انٹیلی جنس محکمے کے سربراہ مائیک بر گیس نے کہا ہے کہ ان دنوں کرونا وائرس کی وجہ سے آسٹریلیا کے اکثر باشندے اپنے گھروں میں ہیں اور انٹرنیٹ کا استعمال کثرت سے کر رہے ہیں ، اس لاک ڈاؤن کی وجہ سے جاسوسی ، مجرمانہ سرگرمیوں اور دہشت گردی میں اضافہ ہو رہا ہے۔
سڈنی سے ہمارے نامہ نگار فل مرسی کی رپورٹ کے مطابق آسٹریلیا کی سیکیورٹی انٹیلی جنس ادارے کے سربراہ کا کہنا ہے کہ کووڈ 19 نے ہیکرز، مجرموں اور دہشت گردوں کو سازگار مواقع فراہم کیے ہیں۔ اب یہ ہمارا کام ہے کہ ہم ان پر ںظر رکھیں اور سیاسی طور پر فعال غیر ملکی مداخلت کاروں کا قلع قمع کریں۔
یہ خیال کیا جاتا ہے کہ عسکریت پسند گروپ آسٹریلیا میں عوام کو ورغلا رہے ہیں اور اپنے نظریات کا پرچار کر رہے ہیں۔ اس کے علاوہ آن لائن شاپنگ اور دوسرے آن لائن مالی لین دین کو ہیک کیا جا رہا ہے۔
پاکستان میں پہلی مرتبہ پانچ ہزار سے زائد کیسز رپورٹ
پاکستان میں گزشتہ چوبیس گھنٹوں کے دوران 5385 افراد میں کرونا وائرس کی تشخیص ہوئی ہے۔ ایک روز کے دوران پاکستان میں سامنے آنے والے کیسز کی یہ سب سے زیادہ تعداد ہے۔
سرکاری اعداد و شمار کے مطابق کرونا وائرس سے مزید 83 افراد ہلاک ہوئے ہیں۔ اس طرح ملک بھر میں وبا کا شکار ہو کر مرنے والوں کی تعداد 2255 ہو گئی ہے۔
پاکستان میں اب تک سات لاکھ 54 ہزار 252 افراد کے کرونا ٹیسٹ کیے جا چکے ہیں۔ ملک میں وائرس سے ایک لاکھ 13 ہزار 697 افراد متاثر ہوئے ہیں جن میں سے 36 ہزار 308 مریض صحت یاب بھی ہو چکے ہیں۔
اس وائرس سے پنجاب اور سندھ سب سے زیادہ متاثر ہیں جہاں بالترتیب 43 ہزار 460 اور 41 ہزار 303 کیسز رپورٹ ہو چکے ہیں۔
خیبر پختونخوا میں 14 ہزار 527، بلوچستان میں 7031، اسلام آباد میں 5963، گلگت بلتستان میں 444 اور پاکستان کے زیرِ انتظام کشمیر میں 974 کیسز رپورٹ ہو چکے ہیں۔
کرونا بحران کے دوران ماحولیاتی تبدیلی کے چیلنج میں کوئی کمی نہیں آئی
کوپرنیکس ماحولیاتی تبدیلی سروس سے وابستہ سائنسدانوں کے مطابق سال 2020 تاریخ کے 10 گرم ترین سالوں میں شمار ہو گا۔ یہی نہیں فائنانس واچ کی ایک تازہ ترین رپورٹ میں کہا گیا ہے کہ کرونا وائرس کے مقابلے میں ماحولیاتی تبدیلی مالی استحکام کے لیے زیادہ بڑا خطرہ ہے۔
سائنسی حقائق پر مبنی یہ دو رپورٹیں ان مفروضوں کی نفی کرتی ہیں جن کے مطابق خیال کیا جا رہا تھا کہ کرونا وائرس کی وجہ سے عالمی سطح پر معاشی اور ترقیاتی کارروائیوں میں کئی ماہ طویل غیر معمولی جمود کی صورتِ حال سے شاید ماحولیاتی تبدیلی میں کمی واقع ہو گی۔
کوپرنیکس ماحولیاتی تبدیلی سروس سے منسلک سائنس دان فری جاویم بورگ کہتی ہیں کہ مئی کا گرم ترین مہینہ ہونا ایک خطرناک بات ہے۔
عالمی ادارۂ موسمیات کے سیکرٹری جنرل پیٹری تالس کہتے ہیں کہ کووڈ نائنٹین کی وجہ سے اقتصادی اور صنعتی کارروائیوں میں جو کمی آئی ہے وہ کسی طور بھی ماحولیاتی تبدیلی کی روک تھام کے لیے کیے جانے والے اقدامات کا نعم البدل نہیں ہے۔