73 ملکوں سے 82462 پاکستانیوں کو واپس لایا جا چکا ہے: دفترِ خارجہ
پاکستان کے دفترِ خارجہ کی ترجمان عائشہ فاروقی نے کہا کہ اب تک دنیا کے 73 ممالک سے 82,462 پاکستانی شہریوں کو وطن واپس لایا جا چکا ہے جو کرونا وائرس کی وبا پھوٹنے کے بعد پھنس کر رہ گئے تھے۔
عائشہ فاروقی نے جمعرات کو ایک بیان میں کہا کہ اب تک وطن واپس لائے جانے والے پاکستانی شہریوں میں سے تقریباً 11 ہزار وہ پاکستانی شہری بھی شامل ہیں جنہیں گزشتہ دو ہفتوں کے دوران وطن واپس لا یا گیا ہے۔
اُنہوں نے بتایا کہ 7001 کو دبئی، 2,700 کو سعودی عرب، 439 کو کرغزستان، 253 کو بغداد (عراق)، 250 کو ٹورنٹو (کینیڈا)، 119 کو عمان (اردن )، 111 کو ماریشیس جبکہ 70 کو ناروے سے واپس لایا گیا ہے۔
پاکستان نے تفتان سرحد تجارت کے لیے کھول دی
حکومتِ پاکستان نے کرونا کا پھیلاؤ روکنے کے لیے بند کی گئی ایران سے متصل تفتان سرحد سات روز کے لیے کھولنے کا نوٹی فکیشن جاری کر دیا ہے۔
یہ سرحد 22 فروری کو ایران میں کرونا وائرس کیسز میں تیزی سے اضافے کے باعث بند کی گئی تھی۔
جمعرات کو جاری کیے گئے نوٹی فکیشن میں حکام کا کہنا ہے سرحد پر کرونا سے بچاؤ کے ایس او پیز پر عمل درآمد لازمی ہو گا۔
سرحد بند ہونے سے پاکستانی تاجروں کو مشکلات کا سامنا تھا اور دونوں ملکوں کے درمیان تجارت عملاً بند ہو کر رہ گئی تھی۔
کاروباری افراد کا کہنا ہے کہ سرحد کی بندش سے ایران کو برآمد کیے جانے والے آموں کی کھیپ بھی خراب ہو گئی تھی۔
تفتان کے ایک مقامی تاجر حاجی ضیاء الرحمان نے وفاقی حکومت کے فیصلے کو خوش آئند قرار دیا ہے۔ ان کا کہنا ہے کہ اس فیصلے سے پاکستانی تجارت کو فروغ ملے گا۔
اُن کا کہنا تھا کہ اب پاکستان سے آم اور چاول کی برآمد کا سلسلہ شروع ہو جائے گا۔
افغانستان میں کرونا کے مزید 658 کیس رپورٹ
افغانستان میں کرونا وائرس کے مزید 658 کیس رپورٹ ہوئے ہیں جس کے بعد ملک بھر میں وائرس سے متاثرہ مریضوں کی تعداد 27532 ہو گئی ہے۔
حکام کا کہنا ہے کہ کرونا وائرس سے اب تک افغانستان میں 546 افراد ہلاک ہو چکے ہیں۔
افغان وزارتِ صحت کے حکام کا کہنا ہے رپورٹ ہونے والے کیسز میں 11339 کابل جب کہ صوبہ ہرات میں 4304 کیس رپورٹ ہوئے ہیں۔
حکام کا کہنا ہے کہ اب تک 7660 مریض وائرس سے صحت یاب بھی ہو چکے ہیں۔
پاکستان میں کرونا سے مزید 136 اموات
پاکستان میں جمعرات کو کرونا وائرس سے کم از کم 136 افراد ہلاک ہو گئے جب کہ 4640 نئے مریضوں کی تصدیق ہوئی۔
منگل کو بھی 136 ہلاکتیں ہوئی تھیں لیکن خدشہ ہے کہ جمعرات کی اموات زیادہ ہو جائے گی کیونکہ ان میں اسلام آباد کے اعداد و شمار شامل نہیں ہیں۔
پاکستان میں مسلسل چوتھے دن سو سے زیادہ اموات ہوئی ہیں۔ ملک میں 8 جون کو پہلی بار ایک دن میں سو سے زیادہ افراد ہلاک ہوئے تھے۔ تب سے اب تک 11 دن میں ہلاکتوں کی تعداد 1156 ہوگئی ہے۔
پی ڈی ایم اے پنجاب کے مطابق گزشتہ 24 گھنٹوں کے دوران 1540 مریضوں کا کرونا وائرس کا ٹیسٹ مثبت آیا جب کہ 63 مریض دم توڑ گئے۔ محکمہ صحت سندھ کے مطابق صوبے میں ایک دن میں سب سے زیادہ 48 اموات ہوئیں اور 2286 کیسز سامنے آئے۔
خیبرپختونخوا میں 18 مریض چل بسے جب کہ 506 افراد کے وائرس میں مبتلا ہونے کا علم ہوا۔ بلوچستان میں 6 اموات ہوئیں اور 204 افراد میں وائرس کی تصدیق ہوئی۔
پاکستان کے زیر انتظام کشمیر میں 29 اور گلگت بلتستان میں 12 نئے مریضوں کا پتا چلا۔ کرونا وائرس میں مبتلا گلگت بلتستان کے وزیر زراعت حاجی جانباز خان انتقال کر گئے۔
مجموعی طور پر پاکستان میں 164758 مریض سامنے آ چکے ہیں اور 3229 ہلاکتیں ہو چکی ہیں۔ پنجاب میں اموات کی تعداد 1265، سندھ میں 964، خیبرپختونخوا میں 773، بلوچستان میں 99، اسلام آباد میں 94 اور گلگت بلتستان میں 19 ہے۔ پاکستان کے زیر انتظام کشمیر میں 15 افراد ہلاک ہو چکے ہیں۔
سرکاری اعداد و شمار کے مطابق ملک بھر میں 61052 مریض صحت یاب ہو چکے ہیں۔ ان میں سب سے زیادہ سندھ کے 31034 اور پنجاب کے 17892 افراد شامل ہیں۔