بھارت میں کرونا وائرس کے ریکارڈ کیسز رپورٹ
گزشتہ 24 گھنٹوں کے دوران بھارت میں 15 ہزار 968 نئے کیسز رپورٹ ہوئے ہیں جو اب تک ایک دن میں سامنے آنے والے کیسز کی سب سے زیادہ تعداد ہے۔ بھارت میں کرونا کے مجموعی مریض چار لاکھ 56 ہزار 183 ہو گئے ہیں۔
منگل کو بھارت میں مزید 465 افراد کرونا وائرس سے جان کی بازی ہار گئے جس کے بعد اموات کی کل تعداد 14 ہزار 476 ہو گئی ہے۔
لاطینی امریکہ کرونا وائرس کا نیا مرکز، اموات ایک لاکھ سے متجاوز
لاطینی امریکہ ایک لاکھ سے زائد ہلاکتوں کے بعد کرونا وائرس کا نیا مرکز بن گیا ہے۔ اس خطے میں برازیل 14 لاکھ 45 ہزار سے زائد کیسز اور 52 ہزار 645 اموات کے ساتھ سرِ فہرست ہے۔
برازیل دنیا بھر میں کرونا وائرس کے کیسز اور اموات کے حوالے سے امریکہ کے بعد دوسرے نمبر پر ہے۔
برازیل میں گزشتہ 24 گھنٹوں کے دوران 39 ہزار 436 نئے کیسز سامنے آئے ہیں اور 1300 ہلاکتیں ہوئی ہیں۔
برازیل میں کرونا کا بحران اس سطح پر پہنچ گیا ہے کہ وفاقی عدالت نے صدر جائر بولسونیرو کو حکم دیا ہے کہ وہ عوامی تقریبات میں ماسک پہنیں اور ایسا نہ کرنے کی صورت میں 400 ڈالر روزانہ جرمانہ ادا کریں۔ جج کا کہنا تھا کہ صدر بولسونیرو کرونا وائرس سے متعلق مقامی قانون کی خلاف ورزی کے مرتکب ہو رہے ہیں۔
صدر بولسونیرو اب تک سیاسی ریلیوں کے دوران ماسک پہننے سے انکار کرتے آئے ہیں۔ بولسونیرو کرونا کو محض ایک عام سا 'فلو' قرار دیتے رہے ہیں۔ ان کا کہنا ہے کہ جو لوگ اس وائرس سے خوفزدہ ہیں وہ پاگل پن کا مظاہرہ کر رہے ہیں۔
کرونا وائرس سے اموات چار لاکھ 75 ہزار سے متجاوز
لاطینی امریکہ میں کرونا وائرس کے کیسز میں تیزی سے اضافے کے بعد دنیا بھر میں کیسز کی مجموعی تعداد 92 لاکھ اور ہلاکتیں چار لاکھ 77 ہزار سے تجاوز کر گئی ہیں۔
دنیا بھر میں کیسز اور اموات کے اعتبار سے امریکہ بدستور سرِ فہرست ہے جہاں 23 لاکھ کیسز سامنے آ چکے ہیں اور ایک لاکھ 21 ہزار سے زائد اموات ہو چکی ہیں۔
نجی لیب سے کرایا گیا کرکٹر محمد حفیظ کا کرونا ٹیسٹ منفی
پاکستان کرکٹ ٹیم کے آل راؤنڈر محمد حفیظ کا کہنا ہے کہ نجی لیب سے کرایا گیا اُن کا کرونا ٹیسٹ منفی آ گیا ہے۔ اس سے قبل پاکستان کرکٹ بورڈ کی جانب سے کرائے گئے ٹیسٹ میں حفیظ کا کرونا ٹیسٹ مثبت آیا تھا۔
محمد حفیظ کا کرونا ٹیسٹ منفی آنے کے بعد پاکستان کرکٹ بورڈ کی جانب سے کرائے گئے کھلاڑیوں کے کرونا ٹیسٹس پر سوالیہ نشان لگ گئے ہیں۔
اپنی ایک ٹوئٹ میں محمد حفیظ نے کہا کہ اُنہوں نے بدھ کو اہل خانہ کے ہمراہ نجی لیب سے کرونا ٹیسٹ کرایا جو منفی آیا ہے۔
خیال رہے کہ پاکستان کرکٹ بورڈ نے اعلان کیا تھا منگل کو محمد حفیظ سمیت مزید سات کرکٹرز کے کرونا ٹیسٹ مثبت آئے ہیں۔
محمد حفیظ کا کہنا تھا کہ جب پی سی بی کی جانب سے کرایا گیا ٹیسٹ مثبت آیا تو اُنہیں کوئی علامات نہیں تھیں۔ لہذٰا اپنی تسلی کے لیے اُنہوں نے دوبارہ ٹیسٹ کرایا۔