- By ضیاء الرحمن
لاہور کے سات علاقے سیل، پنجاب کے مزید 33 علاقے بند کرنے پر غور
پنجاب کی صوبائی حکومت نے اسمارٹ لاک ڈاؤن کے تحت لاہور کے مزید سات علاقوں کو سیل کر دیا ہے جب کہ صوبے بھر میں مزید 33 مقامات کو سیل کرنے پر غور کیا جا رہا ہے۔
ڈپٹی کمشنر لاہور دانش افضال نے وائس آف امریکہ کو بتایا ہے کہ لاہور میں بدھ کی رات مزید سات علاقے بند کیے گئے ہیں جو 30 جون تک بند رہیں گے۔ انہوں نے کہا کہ ان علاقوں میں بازار بھی بند رہیں گے۔
جن علاقوں میں بدھ کی رات اسمارٹ لاک ڈاؤن کیا گیا ہے، ان میں گلبرگ، ماڈل ٹاؤن، گارڈن ٹاؤن، فیصل ٹاؤن، ڈی ایچ اے، گلشن راوی اور اندرون شہر کے علاقے شامل ہیں۔
پولیس کے مطابق ان سات علاقوں میں 40 ہاٹ اسپاٹس کو مکمل طور پر بند کر دیا گیا ہے جس کے بعد شہر میں سیل کیے جانے والے ہاٹ اسپاٹس کی کُل تعداد 101 ہو گئی ہے۔
ان علاقوں میں 43 ایس ایچ اوز سمیت تین ہزار 546 پولیس اہلکار تعینات کیے گئے ہیں۔
دوسری جانب چیف سیکریٹری پنجاب جواد رفیق ملک کی سربراہی میں کرونا کی صورتِ حال اور لاک ڈاؤن سے متعلق ہونے والے اجلاس میں لاہور سمیت صوبے کے 33 مقامات کو سیل کرنے پر غور کیا گیا اور ان علاقوں میں کرونا وائرس کی صورتِ حال کی تفصیلات طلب کر لی گئی ہیں۔
واضح رہے پنجاب میں کرونا کیسز کی تعداد 70 ہزار کے قرین پہنچ گئی ہے جب کہ صوبے میں اب تک 1516 افراد وائرس سے ہلاک ہوئے ہیں۔
کرونا کے کیس آئندہ ہفتے ایک کروڑ تک پہنچ جائیں گے، عالمی ادارے کا انتباہ
عالمی ادارۂ صحت (ڈبلیو ایچ او) نے کہا ہے کہ دنیا بھر میں کرونا وائرس کا پھیلاؤ تیزی سے جاری ہے اور آئندہ ہفتے دنیا بھر میں کیسز کی تعداد 93 لاکھ سے بڑھ کر ایک کروڑ تک پہنچ جائے گی۔
عالمی ادارۂ صحت کے سربراہ ٹیڈروس ایڈہینم نے بدھ کو ایک بیان میں کہا کہ لاطینی امریکہ کے ملک وائرس کا نیا مرکز بن چکے ہیں جہاں اب تک ایک لاکھ سے زائد اموات ہو چکی ہیں۔ ان میں سے 54 ہزار سے زائد اموات خطے کے صرف ایک ملک برازیل میں ہوئی ہیں۔
ڈبلیو ایچ اے کے ہنگامی حالات سے متعلق شعبے کے سربراہ ڈاکٹر مائیک ریان کا کہنا ہے کہ براعظم شمالی و جنوبی امریکہ میں وبا تاحال اپنے عروج پر نہیں پہنچی اور خاص طور پر وسطی اور جنوبی امریکہ کے ملکوں میں وائرس کا پھیلاؤ تیزی سے جاری ہے۔
اُنہوں نے کہا کہ لاطینی امریکہ کے کئی ملکوں میں گزشتہ ہفتے وائرس سے متاثر ہونے والے مریضوں کی شرح میں 25 سے 50 فی صد تک اضافہ دیکھا گیا۔
عالمی ادارۂ صحت کے سربراہ ٹیڈروس ایڈہینم نے کہا ہے کہ آئندہ ہفتے کیسز ایک کروڑ تک پہنچنے کا تخمینہ ہمارے لیے یاد دہانی ہے کہ ویکسین کی تیاری کے ساتھ ساتھ ہمیں وائرس کا پھیلاؤ روکنے اور زندگیاں بچانے کی ذمہ داری بھی نبھانا ہو گی۔
نئی دہلی: کرونا کے مریضوں کی تلاش کے لیے گھر گھر سروے کیا جائے گا
بھارت نے اعلان کیا ہے کہ دارالحکومت نئی دہلی میں کرونا وائرس کے مریضوں تلاش کے لیے شہر کی پوری آبادی کا سروے کیا جائے گا۔
نئی دہلی کی آبادی دو کروڑ 90 لاکھ کے قریب ہے جہاں حکام لوگوں کے گھروں پر جا کر ہر شہری کی صحت سے متعلق تفصیلات جمع کریں گے اور جن شہریوں میں کرونا کی علامات ہوں گی، ان کا ٹیسٹ کیا جائے گا۔
خبر رساں ادارے 'ایسوسی ایٹڈ پریس' کے مطابق نئی دہلی حکومت کا کہنا ہے کہ یہ سروے چھ جولائی تک مکمل کر لیا جائے گا۔
خیال رہے کہ دہلی بھارت میں کرونا سے سب سے زیادہ متاثر ہونے والا شہر ہے جہاں 70 ہزار 390 کیسز رپورٹ ہو چکے ہیں۔
بھارت میں گزشتہ 24 گھنٹوں کے دوران 16 ہزار 922 کیسز رپورٹ ہوئے ہیں جو بھارت میں یومیہ کیسز کی سب سے بڑی تعداد ہے۔ بھارت میں کرونا مریضوں کی مجموعی تعداد چار لاکھ 73 ہزار سے زیادہ ہو گئی ہے جب کہ کل ہلاکتیں 14 ہزار 800 سے زائد ہیں۔