بھارت: کرونا کے باعث بند فلمی صنعت کو سرگرمیاں شروع کرنے کی اجازت
کرونا وائرس کے باعث گزشتہ چند ماہ سے تعطل کا شکار بالی وڈ فلم انڈسٹری کو شوٹنگز دوبارہ شروع کرنے کی اجازت مل گئی ہے جس کے بعد التوا کا شکار فلموں کی ریلیز بھی متوقع ہے۔
ریاستی حکومتوں نے اس حوالے سے ترمیمی ہدایات بھی جاری کردی ہیں۔ توقع کی جارہی ہے کہ اب بڑی کاسٹ اور بڑے بجٹ والی فلمیں بھی جلد ریلیز ہوسکیں گی۔
کرونا وائرس اور لاک ڈاؤن کی وجہ سے ممبئی سمیت جنوبی بھارت کی علاقائی فلمی صنعت بھی گزشہ تین ماہ سے مکمل طور پر بند تھی جس کی وجہ سے نئی فلموں اور ٹی وی ڈراموں کی شوٹنگ بھی رکی ہوئی تھی۔ یہاں تک کہ اسٹوڈیوز کو تالے لگ گئے تھے تاہم اب فلمی سرگرمیاں دوبارہ شروع ہونے کی راہ ہموار ہوگئی ہے۔
بھارت کی مقامی میڈیا رپورٹس کے مطابق ممبئی میں حکام نے ایس او پیز کے تحت اسٹوڈیوز دوبار کھولنے اور شوٹنگز شروع کرنے کی اجازت دے دی ہے۔
پاکستان افغانستان کے سرحدی مقام 'غلام خان' کو بھی کھول دیا گیا
کرونا وائرس کے باعث پاکتسان اور افغانستان کے سرحدی مقام 'غلام خان' کو بھی پیدل آمدو رفت کے لیے کھول دیا گیا ہے۔ حکام کا کہنا ہے کہ کرونا وائرس کے باعث دونوں ملکوں کے کئی شہری سرحد کے دونوں اطراف پھنسے ہوئے ہیں۔ لہذٰا اُن کی سہولت کے لیے یہ سرحد کھولی گئی ہے۔
شمالی وزیرستان کے ڈپٹی کمشنر شاہد علی نے بتایا کہ کرونا لاک ڈاؤن کی وجہ سے خوست اور میران شاہ میں دونوں ممالک کے سیکڑوں مسافر پھنس گئے تھے۔
سرحدی گزرگاہ کھلتے ہی افغانستان میں پھنسے مزدوروں کو جانچ پڑتال کے بعد پاکستان آنے کی اجازت دی جا رہی ہے۔
افغانستان میں محصور پاکستانیوں میں ٹرانسپورٹرز، خواتین اور بچے بھی شامل ہیں۔ واپس آنے والوں کو غلام خان کے قریب قرنطینہ مرکز میں منتقل کر دیا گیا ہے۔ انتظامیہ کے بقول یہاں تمام سہولیات فراہم کی گئی ہیں۔
برطانیہ کا سفری پابندیوں میں نرمی کا فیصلہ
برطانیہ نے سفری پابندیوں اور قرنطینہ سے متعلق اپنی پالیسی میں نرمی کا فیصلہ کرتے ہوئے ان ممالک کی فہرست جاری کرنے کا اعلان کیا ہے جہاں برطانوی شہری موسم گرما کی تعطیلات گزارنے جاسکیں گے۔
برطانیہ آنے کے خواہش مند وائرس سے کم متاثرہ ملکوں کے مسافروں کے لیے 15 روز قرنطینہ کی شرط بھی ختم کرنے پر غور کیا جا رہا ہے۔ تاہم ان ملکوں کی یہ فہرست بدھ کو جاری کی جائے گی۔
برطانوی حکام کا کہنا ہے کہ وہ ان ممالک میں آمدورفت دوبارہ شروع کرنا چاہتے ہیں جہاں کرونا وائرس کیسز بہت کم ہیں۔
حکام کا کہنا ہے کہ فرانس، اٹلی، اسپین، یونان، جرمنی، ڈنمارک، ناروے، ہالینڈ اور جزائر غرب الہند کے ملکوں کے لیے سفری پابندیوں پر نرمی پر غور کیا جا رہا ہے۔
رپورٹس کے مطابق ویتنام، سنگاپور اور ہانگ کانگ جیسے ممالک کے لیے پروازیں چلانے کا موسم گرما کے اختتام تک کوئی ارادہ نہیں ہے۔
کرونا سے سندھ میں مزید 38 اموات، 24 گھنٹوں میں 1949 نئے کیسز
پاکستان کے صوبہ سندھ میں گزشتہ 24 گھنٹوں کے دوران مزید 1949 افراد میں کرونا کی تشخیص ہوئی ہے جب کہ 38 افراد ہلاک ہوئے ہیں۔ سندھ میں وبا سے ہلاک ہونے والوں کی مجموعی تعداد 1243 ہو گئی ہے۔
حکومت سندھ کا کہنا ہے جمعے کو ہونے والے 11901 ٹیسٹس میں مثبت آنے والے نتائج کی شرح 22 فی صد رہی۔ پورے صوبے میں مجموعی طور پر اب تک 4 لاکھ 26ہزار 149 ٹیسٹ کیے جا چکے ہیں جس میں سے 78ہزار 267 کیسز کی تشخیص ہوئی ہے۔
ان میں سے 55.5 فی صد یعنی 43 ہزار 444 مریض صحت یاب بھی ہو چکے ہیں جن میں گزشتہ 24 گھنٹوں میں صحت یاب ہونے والے 1452 افراد بھی شامل ہیں۔
صوبائی حکومت کے اعدادو شمار کے مطابق صوبے میں اموات کی شرح 1.5 فی صد ہے۔ اس وقت 33580 مریض زیرِ علاج ہیں ان میں سے 32127 گھروں میں، 78 قرنطینہ مراکز میں اور 1375 مختلف اسپتالوں میں زیر علاج ہیں۔
صوبائی حکام کے مطابق 696 ایسے مریض بھی ہیں جن کی حالت تشویش ناک ہے جن میں 116 افراد کو وینٹی لیٹر پر منتقل کیا گیا ہے۔
سندھ کی صوبائی وزیر صحت ڈاکٹر عذرا فضل پیچوہو نے اس تاثر کو غلط قرار دیا ہے کہ صوبے میں کرونا کیسز کی تعداد میں کمی آئی ہے۔ ان کا کہنا ہے کہ اس کے برعکس صوبے مین کیسز تیز رفتار شرح کے ساتھ بڑھ رہے ہیں۔
عذرا فضل پیچوہو نے بتایا کہ تجزیے سے معلوم ہوا ہے کہ کرونا کی موجودہ لہر نہ صرف جاری رہے گی بلکہ اکتوبر میں اس میں مزید تیزی دیکھی جاسکتی ہے۔ اپنے ایک ویڈیو بیان میں ان کہنا ہے کہ صوبے میں کیے جانے والے کل ٹیسٹس میں سے مثبت کیسز کی شرح 20 سے 22 فی صد تک ہے جو کافی بلند شرح ہے۔ انہوں نے اس خدشے کا بھی اظہار کیا ہے کہ آئندہ چند ماہ تک کرونا کیسز کی تعداد بڑھتی ہی جائے گی۔
حکام کے مطابق کراچی ڈویژن کے تمام اضلاع سے 1949 نئے کیسز میں سے 1139 مثبت کیسز کا پتا چلا ہے۔ حیدرآباد میں 99، گھوٹکی 93، خیرپور 68، سکھر 54، شکار پور 46، شہید بینظیرآباد 45، سانگھڑ 32، میرپورخاص 27، لاڑکانہ 25، جامشورو 17، نوشہرو فیروز 16، دادو 15، بدین 12، کشمور 9، عمرکوٹ 7، سجاول 6، ٹنڈو الہ یار اور جیکب آباد 3-3، ٹنڈو محمد خان اور مٹیاری میں 2-2 کیسز رپورٹ ہوئے ہیں۔