کرونا وائرس پر قابو پانے والے ممالک میں نئے کیسز
وائرس پر بظاہر قابو پانے والے ممالک میں دوبارہ کیسز سامنے آنے پر نئے خدشات جنم لے رہے ہیں۔ سائنس دان معلوم کرنے کی کوشش کر رہے ہیں کہ وائرس دوسرے ممالک سے مسافروں کے ذریعے آیا یا اس کے پھیلاؤ کا ذریعہ مرض کی علامات نہ رکھنے والے مقامی افراد ہیں۔
بھارت میں مزید 20ہزار افراد وائرس سے متاثر
بھارت میں گزشتہ 24 گھنٹوں میں 19906 افراد میں کرونا وائرس کی تشخیص ہوئی ہے۔
حکام نے وبا سے مزید 410 افراد کی موت کی تصدیق کی ہے۔
وزارت صحت کے مطابق بھارت میں کرونا سے ہلاک ہونے والوں کی تعداد 16095 ہو گئی ہے۔ جب کہ کل مثبت کیسز کی تعداد پانچ لاکھ 28 ہزار تک پہنچ گئی ہے۔
حکام کے مطابق وبا سے صحت یاب ہونے والے افراد کی تعداد متاثرین سے زیادہ ہے۔
وزارت صحت کے مطابق بھارت میں فعال کیسز کی تعداد جہاں دو لاکھ ہے جب کہ صحت یاب ہونے والوں کی تعداد تین لاکھ ہو گئی ہے۔
حکومت وبا سے صحت یاب ہونے والوں کی شرح 58 فی صد سے زیادہ ہونے کا دعویٰ کر رہی ہے۔
اٹلی میں اموات میں کمی، جنوبی کوریا میں کیسز میں اضافہ
اٹلی میں یکم مارچ سے اب تک یومیہ اموات کی سب سے کم تعداد ریکارڈ کی گئی ہے۔
اطلاعات کے مطابق ایک ہفتہ قبل تک اٹلی میں مکمل لاک ڈاؤن تھا جس کے سبب مرنے والے افراد کی تعداد کمی واقع ہوئی ہے۔
اُدھر جمہوریہ چیک میں کرونا وائرس کے متاثرین کی تعداد میں اضافہ ہوا ہے۔
وزارت صحت کے مطابق جمہوریہ چیک میں 8 اپریل کے بعد سے اب تک یومیہ 260 نئے کیسز سامنے آ رہے ہیں۔ جمہوریہ چیک میں وبا سے متاثرہ افراد کی تعداد میں تقریبا تین گنا اضافہ ہوا ہے۔ 17 کروڑ کی آبادی والے ملک میں اب تک 11 ہزار سے زائد کیسز کی تصدیق ہو چکی ہے جن سے میں ہفتے تک 347 افراد ہلاک ہو چکے ہیں۔
جنوبی کوریا میں ایک مرتبہ پھر کرونا وائرس کے پھیلاؤ میں اضافہ دیکھا جا رہا ہے۔ حکام کے مطابق 62 نئے کیسز رپورٹ ہونے کے بعد متاثرین کی مجموعی تعداد 12 ہزار715 ہوگئی ہے۔
میکسیکو کی وزارت صحت نے ہفتے کو 4410 نئے کیسز کی تصدیق کی ہے۔ میکسیکو میں اب تک کرونا وائرس سے متاثرہ 602 افراد کی موت ہو چکی ہے۔
حکومت نے کہا ہے کہ متاثرہ افراد کی اصل تعداد تصدیق شدہ کیسز کے مقابلے میں زیادہ ہے۔
کرونا ٹیسٹ کا تنازع، پاکستان کی کرکٹ ٹیم انگلینڈ روانہ
پاکستان کرکٹ ٹیم 20 کھلاڑیوں اور عملے کے 11 ارکان سمیت انگلینڈ کے دورے کے لیے اتوار کی صبح لاہور سے مانچسٹر روانہ ہو گئی ہے۔ پاکستانی ٹیم خصوصی طیارے کے ذریعے روانہ ہوئی ہے۔
دونوں ممالک کے درمیان تین ٹیسٹ اور تین ٹی ٹوئنٹی میچ کھیلے جائیں گے۔
یار رہے کہ پاکستان اور انگلینڈ کے درمیان میچوں کی حتمی تاریخ اور مقامات کا اعلان ہونا ابھی باقی ہے۔
قومی اسکواڈ 14 روز قرنطینہ میں گزارے گا تاہم انہیں پریکٹس اور ٹریننگ کی اجازت ہوگی۔
انگلینڈ روانہ نہ ہونے والے کھلاڑیوں میں محمد حفیظ بھی شامل ہیں۔ پاکستان کرکٹ بورڈ کی جانب سے کرائے گئے کرونا ٹیسٹ میں آل راؤنڈر محمد حفیظ کا ٹیسٹ مثبت آیا تھا تاہم جب انہوں نے نجی لیب سے دوبارہ ٹیسٹ کرایا تو اس کی رپورٹ منفی آئی تھی۔ جس کے بعد انہوں نے ایک ٹوئٹ کیا اور پیغام دیا کہ ان کا ٹیسٹ منفی آیا ہے۔ ٹوئٹ کے ساتھ ہی نیا تنازع کھڑا ہو گیا تھا۔