متحدہ عرب امارات: سرکاری ملازمین کے دفاتر پانچ جولائی سے کھلیں گے
متحدہ عرب امارات کے سرکاری خبر رساں ادارے نے رپورٹ کیا ہے کہ وفاقی حکومت کے ملازمین کے دفاتر پانچ جولائی سے کھل جائیں گے جس کے بعد سرکاری ملازمین اپنے اپنے کاموں پر لوٹ سکیں گے۔
دفاتر میں سماجی فاصلے کی ہدایت پر عمل کیا جائے گا اور کرونا وائرس سے بچاؤ کی احتیاطی تدابیر بھی اختیار کی جائیں گی۔
روس میں گزشتہ دو ماہ کے کم ترین یومیہ کیسز
روس میں گزشتہ 24 گھنٹوں کے دوران 6719 افراد میں کرونا وائرس کی تصدیق ہوئی ہے۔ یہ گزشتہ دو ماہ کے دوران ایک دن میں سامنے آنے والے کیسز کی کم ترین تعداد ہے۔
روس میں گزشتہ دو ماہ سے یومیہ سات ہزار سے زائد کیسز رپورٹ ہو رہے تھے جس کے بعد گزشتہ ہفتے پہلی مرتبہ سات ہزار سے کم کیسز رپورٹ ہوئے تھے۔ یہ تعداد پیر کو مزید گر کر 6719 پر آ گئی ہے۔
روس کرونا وائرس سے سب سے زیادہ متاثر ہونے والے ملکوں میں تیسرے نمبر پر ہے جہاں چھ لاکھ سے زائد مریض سامنے آ چکے ہیں۔ پیر کو 93 اموات کے بعد ملک میں کرونا سے مرنے والوں کی کل تعداد 9166 ہو گئی ہے۔
تھائی لینڈ میں گزشتہ 35 دن سے مقامی منتقلی کا کوئی کیس نہیں
تھائی لینڈ میں کرونا وائرس کی وبا کا زور ٹوٹ گیا ہے۔ ملک میں گزشتہ 35 روز سے کرونا وائرس کا کوئی ایسا مریض رپورٹ نہیں ہوا جس میں وائرس مقامی طور پر منتقل ہوا ہو۔
پیر کو تھائی لینڈ میں کرونا کے سات نئے کیسز رپورٹ ہوئے ہیں جو تمام بیرونِ ملک سے تھائی لینڈ آئے تھے۔
فلسطین: سوشل ڈسٹینسنگ کے ساتھ قرآن کی تعلیم