عیدالاضحیٰ کے دوران سماجی فاصلے قائم رکھیں اور اجتماعی قربانی کریں: صدر عارف علوی
پاکستان کے صدر مملکت عارف علوی کی زیرِ صدارت جمعرات کو کرونا وائرس سے متعلق اجلاس ہوا جس میں عید الاضحیٰ کے دوران حفاظتی تدابیر پر عمل درآمد کے حوالے سے صدر کو بریفنگ دی گئی۔
اجلاس میں وفاقی وزیرِ داخلہ بریگیڈیئر (ر) اعجاز شاہ، وفاقی وزیرِ مذہبی امور پیر نورالحق قادری اور اسلامی نظریاتی کونسل کے چیئرمین ڈاکٹر قبلہ ایاز بھی شریک تھے۔
صدر عارف علوی نے اجلاس کے دوران کہا کہ عید الاضحیٰ کے دوران کرونا سے بچاؤ کے حفاظتی اقدامات پر عمل یقینی بنانے کے لیے تمام اسٹیک ہولڈرز بشمول علما اور صوبائی حکومتوں کو اعتماد میں لیا جائے۔
صدر مملکت نے عوام کو ہدایت کی کہ وہ وائرس سے بچنے کے لیے سماجی فاصلے کی ہدایت پر عمل کریں اور اجتماعی قربانی کریں۔
صدرِ پاکستان کا کہنا تھا کہ میڈیا نے لوگوں میں کرونا وائرس کے بارے میں شعور اجاگر کرنے میں اہم کردار ادا کیا ہے۔ میڈیا عوام کو حفاظتی تدابیر پر عمل کرنے اور مویشی منڈیوں میں جانے کے حوالے سے بھی آگاہی دے۔
ٹوکیو میں دو ماہ بعد ریکارڈ کیسز رپورٹ
جاپان کے دارالحکومت ٹوکیو میں جمعرات کو 107 نئے کیسز رپورٹ ہوئے ہیں جو گزشتہ دو ماہ کے دوران ایک دن میں سامنے آنے والے کیسز کی ریکارڈ تعداد ہے۔ البتہ حکام کا کہنا ہے کہ ملک میں دوبارہ ایمرجنسی نافذ کرنے کی کوئی ضرورت نہیں ہے۔
ٹوکیو کے گورنر نے کہا ہے کہ کیسز کی تعداد میں اضافہ خوش آئند نہیں ہے۔ انہوں نے ٹوکیو کے رہائشیوں سے اپیل کی کہ وہ احتیاطی تدابیر پر عمل کر کے کرونا کا پھیلاؤ روکنے میں حکومت کی مدد کریں۔
پاکستان میں کرونا وائرس کے مزید 3979 کیسز، 78 مریض ہلاک
پاکستان میں جمعرات کو کرونا وائرس کے مزید 3979 کیسز کی تصدیق ہوئی جبکہ 78 مریض ہلاک ہوگئے۔ ملک بھر میں 8513 مریض صحت یاب بھی ہوئے۔ ان میں دارالحکومت اسلام آباد کے اعدادوشمار شامل نہیں ہیں۔
پنجاب کے محکمہ صحت کے مطابق 24 گھنٹوں کے دوران 1216 افراد کے کرونا وائرس کے ٹیسٹ مثبت آئے اور 35 مریض دم توڑ گئے۔ صوبے میں 5520 مریضوں کے شفایاب ہوجانے کی اطلاع ملی۔ امکان ہے کہ گزشتہ کئی دنوں کے اعدادوشمار ملنے کی وجہ سے یہ تعداد زیادہ ہے۔
سندھ کے محکمہ صحت کا کہنا ہے کہ صوبے میں مزید 2430 افراد کرونا وائرس میں مبتلا ہوگئے ہیں، جبکہ 31 مریض چل بسے ہیں۔ 1399 افراد وائرس سے جان چھڑانے میں کامیاب ہوگئے ہیں۔ ملک کے سب سے بڑے شہر کراچی میں مریضوں کی تعداد 70143 اور اموات کی تعداد 1220 ہوچکی ہے۔
خیبر پختونخوا کے محکمہ صحت کے مطابق، دن بھر میں 232 نئے کیسز کا علم ہوا اور 10 اموات ہوئیں۔ 1131 افراد کو شفا ملی۔ بلوچستان میں 58 مریضوں کی تصدیق ہوئی اور ایک مریض ہلاک ہوا۔ 307 افراد تندرست ہوگئے۔
گلگت بلتستان کے محکمہ صحت کا کہنا ہے کہ جمعرات کو 18 نئے کیسز سامنے آئے اور 27 صحت یاب ہوگئے۔ پاکستان کے زیر انتظام کشمیر میں 25 مریضوں کا پتا چلا، ایک مریض کا انتقال ہوا اور 129 افراد نے وائرس کو شکست دے دی۔
ملک بھر میں مریضوں کی کل تعداد 221788، اموات کی تعداد 4551 اور صحت یاب ہوجانے والوں کی تعداد 113209 تک پہنچ گئی ہے۔
اب تک پاکستان سمیت 13 ملکوں میں 2 لاکھ سے زیادہ کیسز کی تصدیق ہوچکی ہے۔ ان میں سب سے کم اموات پاکستان میں ہوئی ہیں۔