صدر ٹرمپ کی پہلی بار ماسک پہن کر عوامی تقریب میں شرکت
صدر ڈونلڈ ٹرمپ جو اب تک کرونا وائرس کے پھیلاؤ میں تیزی آنے کے باوجود ماسک پہننے سے گریز کرتے آئے تھے، اب انہوں نے بھی ماسک پہننا شروع کر دیا ہے۔
صدر ٹرمپ نے ہفتے کو ایک فوجی تقریب میں شرکت کی۔ اس دوران انہوں نے ایک اسپتال میں زیرِ علاج زخمی فوجیوں اور فرنٹ لائن ہیلتھ کیئر ورکرز سے ملاقات کی۔ اس دوران انہوں نے پہلی مرتبہ کسی عوامی مقام پر فیس ماسک پہنا ہے۔
رپورٹس کے مطابق صدر ٹرمپ نے اس سے قبل ماسک پہننے یا دوسرے امریکیوں کو ماسک پہننے کی ترغیب دینے سے انکار کیا تھا۔
ان کا کہنا تھا کہ ماسک پہننا یا نہ پہننا ہر انسان کی ذانی پسند، نہ پسند پر منحصر ہے۔
پہلی بار ماسک پہننے سے متعلق وضاحت پیش ہوئے صدر ٹرمپ کا کہنا تھا کہ وہ کبھی بھی ماسک پہننے کے خلاف نہیں تھے لیکن وہ سمجھتے ہیں کہ اس کے لیے مناسب وقت اور جگہ ہوتی ہے۔
ان کے بقول اسپتال بھی ایسی جگہ ہے جہاں ماسک پہننا ضروری ہے۔ یہاں آپ کو بہت سے لوگوں سے رابطہ کرنا پڑتا ہے۔ یہاں صحت یاب لوگوں کے ساتھ ساتھ کرونا وائرس سے متاثرہ افراد بھی متاثر ہوتے ہیں لہذا یہاں ماسک پہننا لازمی ہے۔
صحت عامہ کے اعلیٰ عہدیداروں نے وائرس کے پھیلاؤ کو کم کرنے کے لیے ماسک کے استعمال پر زور دیا ہے۔
امریکہ میں کرونا وائرس سے متاثرہ افراد کی تعداد 32 لاکھ سے زائد جب کہ ایک لاکھ 34 ہزار اموات ہو چکی ہیں۔
ایشوریہ رائے اور ان کی بیٹی بھی کرونا کا شکار
بالی ووڈ کے بگ بی یعنی امیتابھ بچن اور ان کے بیٹے ابھیشیک بچن کے بعد ان کی بہو ایشوریہ رائے اور پوتی ارادھیہ بھی کرونا وائرس کا شکار ہوگئے ہیں۔
امیتابھ بچن اور ابھیشیک بچن کا ٹیسٹ ایک روز قبل مثبت آیا تھا جس کے بعد انہیں ممبئی کے ناناوتی اسپتال میں داخل ہونا پڑا۔
ستتر سالہ امیتابھ بچن نے ٹیسٹ مثبت آنے پر ایک ٹوئٹ بھی کی تھی جس میں انہوں اس بات کی تصدیق کی تھی کہ وہ ناناوتی اسپتال میں زیرِ علاج ہیں۔
امیتابھ کے بعد ابھیشیک کا ٹیسٹ بھی مثبت آیا اور یوں انہیں بھی اسپتال میں داخل ہونا پڑا۔
ابھیشیک نے بھی اپنا ٹیسٹ مثبت آنے پر سوشل میڈیا پر پرستاروں کو کرونا وائرس میں مبتلا ہونے سے متعلق بتایا تھا۔
ایشوریہ رائے اور ان کی بیٹی کے ساتھ ساتھ دیگر اہل خانہ کے بھی کرونا وائرس ٹیسٹ کیے گئے تھے۔ پہلی بار میں ایشوریہ اور ارادھیہ کا ٹیسٹ منفی جب کہ دوسری بار مثبت آیا ہے۔
ناناوتی اسپتال کے ترجمان ڈاکٹر انصاری نے بھارتی میڈیا کو بتایا کہ امیتابھ وینٹلی لیٹر پر نہیں ہیں اور ان حالت بہتر ہو رہی ہے۔
امریکی ریاست فلوریڈا میں ایک دن میں 15000 نئے کرونا کیسز کا ریکارڈ
امریکی ریاست فلوریڈا میں اتوار کے روز کرونا وائرس کے 15 ہزار پازیٹو کیسز سامنے آئے جو کسی ایک امریکی ریاست کا ایک نیا ریکارڈ ہے۔
اس سے قبل بدھ کے روز کیلی فورنیا میں 11694 مریضوں کے ساتھ کسی ایک ریاست میں ایک دن میں سامنے آنے والے کیسز کا ریکارڈ قائم ہوا تھا۔
فلوریڈا میں اس وقت کوویڈ 19 کے 2 لاکھ 70 ہزار سے زیادہ مریض ہیں جب کہ 4346 اموات ہو چکی ہیں۔
فلوریڈا نے حالیہ ہفتوں میں لاک ڈاؤن کی پابندیوں میں نرمی کی ہے جس میں ڈزنی ورلڈ کے تفریح پارک کھولنا بھی شامل ہے۔
اس وقت دنیا بھر میں کرونا وائرس کے متاثرین کی تعداد ایک کروڑ 30 لاکھ جب کہ اموات پانچ لاکھ 70 ہزارکے قریب پہنچ چکی ہیں۔جانز ہاپکنز کے مرتب کردہ اعداد و شمار کے مطابق دنیا بھر کے ایک چوتھائی متاثرین امریکہ میں ہیں جن کی تعداد 33 لاکھ 77 ہزار سے زیادہ ہے اور ایک لاکھ 37 ہزار سے بڑھ چکی ہیں۔
ہفتے کے روز صدر ٹرمپ پہلی بار ماسک پہنے نظر آئے، یہ وہ دن تھا جب امریکہ میں ساڑھے 66 ہزار پازیٹو کیسز کے ساتھ ایک دن کا نیا ریکارڈ قائم ہوا۔
ہفتے کے روز انہوں نے واشنگٹن کے مضافات میں واقع والٹر ریڈ نیشنل ملٹری میڈیکل سینٹر کا دورہ کیا تھا۔ نامہ نگاروں نے صدر ٹرمپ کو پہلی بار ماسک پہنے دیکھ کر پوچھا تو انہوں نے کہا کہ جب آپ اسپتال میں ہوں تو بہتر ہو گا کہ آپ ماسک پہن لیں۔
جنوبی کیرولائنا میں ہفتے کے روز 2200 سے زیادہ کیسز رپورٹ ہوئے جب کہ ایک اور متاثرہ ریاست لوزیانا میں جمعے کو 2600 سے زیادہ افراد میں کرونا وائرس کی تصدیق ہوئی۔
امریکی حکام اسکول کھولنا چاہتے ہیں، اسکول انتظامیہ تیار نہیں
ایک طرف جہاں امریکہ میں کوویڈ 19 کے مریضوں کی تعداد میں تیزی سے اضافہ ہو رہا ہے وہاں دوسری جانب صدر ٹرمپ اور وائٹ ہاؤس کے حکام اسکول کھولنے پر زور دے رہے ہیں۔
اتوار کے روز قومی تعلیمی نظام کی سربراہ بیسٹی ڈیواس نے ملک بھر کی کمیونیٹز پر زور دیا ہے کہ وہ آنے والے ہفتوں میں اسکولوں میں پانچوں دن کلاسیں شروع کریں جن میں شرکت کے لیے طالب علم کلاس روم میں آئیں۔
ان کا کہنا تھا کہ بچوں کا سکول آنا محفوظ ہے۔ فاکس نیوز اور سی این این پر گفتگو کرتے ہوئے انہوں نے کہا کہ اعداد و شمار یہ ظاہر نہیں کرتے کہ بچوں کا اسکول آنا خطرناک ہے اور سائنس دان بھی یہ کہتے ہیں کہ بچوں کو یہ وائرس نہیں لگتا۔ اس لیے اسکول کھولنے چاہیئں اور بچوں کو اسکول جانا چاہیے۔
دوسری جانب بیماریوں کے کنٹرول کے قومی ادارے سی ڈی سی کے عہدے داروں نے کہا ہے کہ وہ معمول کی زندگی کی جانب واپس جانے کے لیے احتیاطی تدابیر پر سختی سے عمل کرنے پر زور دیں گے جن میں ماسک پہننا اور سماجی فاصلہ برقرار رکھنا شامل ہے۔
دارالحکومت واشنگٹن کے مضافات میں واقع ایک بڑی کاؤنٹی فیئر فیکس کے اسکول سسٹم کے سربراہ سکاٹ برابرینڈ نے کہا ہے کہ بچوں کی تعداد اور حفاظتی تدابیر کے پیش نظر فیرفیکس کاؤنٹی کو پانچوں دن اسکول کھولنے کے لیے پنٹاگان جیسی کم ازکم پانچ بڑی عمارتوں کی ضرورت پڑے گی، جس کے لیے وسائل موجود نہیں ہیں۔
ایک اندازے کے مطابق پنٹاگان میں 20 ہزار سے زیادہ افراد کے کام کرنے کی گنجائش موجود ہے۔
صحت کے ماہرین کا کہنا ہے کہ اسکول سسٹم کے 15 لاکھ ٹیچرز میں سے کم ازکم ایک چوتھائی عمر کے اس حصے میں ہیں، جس میں وہ مہلک وبا کرونا وائرس کا آسانی سے شکار بن سکتے ہیں۔ اس لیے موجودہ صورت حال میں اسکول کھولنا درست فیصلہ نہیں ہو گا۔