ہانگ کانگ میں مزید 19 کیسز رپورٹ
ہانگ کانگ میں بدھ کو کرونا وائرس کے 19 نئے کیسز رپورٹ ہوئے ہیں جن میں سے 14 مقامی منتقلی کے ہیں۔ ہانگ کانگ کے حکام نے کرونا کے ممکنہ پھیلاؤ کے خدشے کے پیشِ نظر سخت پابندیاں بھی عائد کی ہیں۔
گزشتہ 24 گھنٹوں کے دوران ہانگ کانگ میں رپورٹ ہونے والے کیسز کی تعداد منگل کے مقابلے میں کم رہی ہے۔منگل کو ہانگ کانگ میں 48 کیسز رپورٹ ہوئے تھے۔
ہانگ کانگ میں کرونا وائرس کا پہلا کیس جنوری میں سامنے آیا تھا اور اب تک 1500 سے زائد کیسز رپورٹ ہو چکے ہیں۔ ہانگ کانگ میں کرونا سے آٹھ ہلاکتیں بھی ہوئی ہیں۔
اسمارٹ لاک ڈاؤن کے اچھے نتائج آنا شروع ہو گئے: چیئرمین این ڈی ایم اے
پاکستان میں قدرتی آفات کے ادارے 'نیشنل ڈیزاسٹر مینجمنٹ اتھارٹی (این ڈی ایم اے)' کے چیئرمین نے کہا ہے کہ اسمارٹ لاک ڈاؤن کے اچھے نتائج آنا شروع ہو گئے ہیں۔ پاکستان میں کرونا کے حوالے سے صورتِ حال بہتری کی طرف جا رہی ہے لیکن عید الاضحٰی پر کرونا سے بچاؤ کے حفاظتی اقدامات کو یقینی بنانا ہو گا۔
این ڈی ایم اے کے سربراہ لفٹیننٹ جنرل محمد افضل نے لاہور میں 'کنگ ایڈورڈ میڈیکل یونیورسٹی' کے ٹیلی میڈیسن سینٹر کا دورہ کرنے کے بعد ذرائع ابلاغ سے گفتگو کرتے ہوئے کہا کہ وزیرِ اعظم عمران خان کی ہدایت پر پاکستان بھر میں آکسیجن والے بیڈز لگانے کا عمل جاری ہے۔
انہوں نے کہا کہ لاہور میں 330 بیڈز، راولپنڈی 70 اور گلگت میں 100 بیڈز لگائے جا چکے ہیں جب کہ خیبر پختونخوا میں 320 بیڈز، کراچی میں 500 اور کوئٹہ میں 200 بیڈز لگائے جا رہے ہیں۔
لیفٹیننٹ جنرل محمد افضل کے مطابق ان کا ہدف پاکستان بھر میں اس ماہ کے آخر تک ڈھائی ہزار بیڈز لگانا ہے۔ ملک میں اب تک آکسیجن والے 1424 بیڈز فنکشنل کیے جا چکے ہیں۔
فرانس کا قومی دن طبی عملے کے نام
بھارت کے مختلف علاقوں میں دوبارہ لاک ڈاؤن
بھارت میں کرونا وائرس کے مریضوں کی تعداد میں تیزی سے اضافہ ہو رہا ہے جسے روکنے کے لیے کئی ریاستوں نے مختلف علاقوں میں جزوی لاک ڈاؤن اور پابندیاں دوبارہ عائد کر دی ہیں۔
بھارت میں کرونا کے کیسز نو لاکھ سے تجاوز کر چکے ہیں۔ بھارت ان ملکوں میں شامل ہو گیا ہے جو وائرس کا پھیلاؤ روکنے کے لیے دوبارہ لاک ڈاؤن اور پابندیاں عائد کر رہے ہیں۔
بھارت کے شہر بنگلور کی آبادی ایک کروڑ 30 لاکھ ہے۔ کرونا وائرس کے بڑھتے کیسز کے پیشِ نظر بنگلور میں منگل سے سات روز کے لیے لاک ڈاؤن کیا گیا ہے۔
بنگلور میں حکام نے دفاتر میں محدود لوگوں کے ساتھ کام کرنے اور ٹرانسپورٹ بند کرنے کی ہدایت کی ہے جب کہ صرف اشیائے ضروریہ کی دکانیں کھلی رکھنے کی اجازت ہے۔
ریاست بہار کی آبادی 12 کروڑ 50 لاکھ سے زائد ہے اور یہ بھارت کی ان ریاستوں میں سے ایک ہے جہاں غربت بہت زیادہ ہے۔ بہار میں جمعرات سے 15 دن کے لیے لاک ڈاؤن نافذ کیا جائے گا۔
اس کے علاوہ اترپردیش، تامل ناڈو اور آسام میں بھی کرونا کا پھیلاؤ روکنے کے لیے مختلف پابندیاں عائد کی گئی ہیں۔