چین میں کرونا وائرس پھر سر اٹھانے لگا
چین میں کووڈ 19 کے مریضوں کی تعداد میں ایک مرتبہ پھر اضافہ نوٹ کیا جا رہا ہے۔ اتوار کو وہاں 61 کیسز سامنے آئے ہیں۔ اس سے قبل چھ مارچ کو سب سے زیادہ 75 کیسز رپورٹ ہوئے تھے۔
چین کے ہیلتھ کمیشن کے مطابق ملک میں کرونا وائرس کی دوسری لہر کے دوران مارچ کے بعد سے اب تک ایک دن میں سب سے زیادہ کیسز سامنے آنے کا یہ نیا ریکارڈ ہے۔
کمیشن کے مطابق اس تعداد میں بیرون ملک سے چین واپس آنے والے افراد شامل نہیں ہیں۔ ان میں مقامی سطح پر وائرس کی منتقلی کے 57 کیسز شامل ہیں۔
صوبہ سنکیانگ میں کرونا وائرس کی مقامی طور پر منتقلی کے 41 کیسز اور شمال مشرقی صوبہ لیاؤننگ میں اب تک 14 نئے کیسز رپورٹ ہو چکے ہیں۔
اسلام آباد کے کئی مقامات بند
پاکستان کے وفاقی دارالحکومت اسلام آباد میں کرونا وائرس پر قابو پانے کے لیے پیر سے عیدالاضحیٰ کی تعطیلات تک مختلف مقامات کو بند کر دیا گیا ہے۔
ڈپٹی کمشنر اسلام آباد حمزہ شفقات کے مطابق مری ایکسپریس وے، مارگلہ، پارکس، تفریحی مقامات، ہوٹلز، پکنک کے مقامات اور ہل اسٹیشن بند رہیں گے،
ڈی سی اسلام آباد نے شہریوں سے اپیل کی ہے کہ وہ تفریح کی غرض سے گھومنے پھرنے کے منصوبے کو ترک کر دیں اور سیاحتی مقامات کا رخ نہ کریں۔
بھارت میں 49 ہزار سے زیادہ نئے کیسز رپورٹ
بھارت میں گزشتہ چوبیس گھنٹوں کے دوران 49 ہزار 931 نئے کیسز رپورٹ ہوئے ہیں جس کے بعد کیسز کی کل تعداد 14 لاکھ 35 ہزار سے زیادہ ہو گئی ہے۔
سرکاری اعداد و شمار کے مطابق بھارت میں پیر کو کرونا وائرس کے شکار مزید 708 مریض دم توڑ گئے ہیں جس کے بعد ہلاکتوں کی تعداد 32 ہزار 771 ہو گئی ہے۔
حکام کے مطابق ملک میں ایکٹو کیسز کی تعداد چار لاکھ 85 ہزار 114 ہے جب کہ نو لاکھ 17 ہزار 568 مریض صحت یاب ہو چکے ہیں۔
پنجاب میں عیدالاضحیٰ پر تمام کاروباری مراکز بند رکھنے کا فیصلہ
پنجاب حکومت نے کرونا وائرس کے باعث عیدالاضحیٰ کے موقع پر صوبے بھر کے تمام کاروباری مراکز بند کرنے کا فیصلہ کیا ہے۔
کاروباری مراکز پیر اور منگل کی درمیانی شب سے پانچ اگست تک بند رہیں گے۔
کاروباری مراکز بند کرنے کا فیصلہ صوبائی وزیرِ قانون پنجاب راجہ بشارت کی زیرِ صدارت وزیر اعلیٰ ہاؤس میں کابینہ کمیٹی برائے انسداد کرونا کے اجلاس میں کیا گیا ہے۔
فیصلے کے مطابق لاک ڈاؤن کے دوران میڈیکل اسٹورز، گروسری اسٹورز، ٹرانسپورٹ اور دفاتر کھلے ہوں گے۔
اجلاس کے دوران راجہ بشارت نے کہا کہ مویشی منڈیوں میں ایس او پیز پر مکمل عمل درآمد کرایا جائے گا جب کہ عیدالاضحیٰ کی نماز اور قربانی کے اجتماعات کے لیے بننے والے ایس او پیز پر عمل درآمد کو یقینی بنایا جائے گا۔