سخت احتیاطی تدابیر کے ساتھ مناسکِ حج کا آغاز
سعودی عرب میں بدھ سے مناسکِ حج کی ادائیگی کا آغاز ہو گیا ہے۔ کرونا کی عالمی وبا کے باعث اس بار حج کو محدود کردیا گیا ہے اور حج کے لیے منتخب ہونے والے افراد مکہ میں قرنطینہ میں وقت گزارنے کے بعد مناسک ادا کر رہے ہیں۔
عازمینِ حج نے بدھ کی صبح طوافِ کعبہ کیا جس کے بعد وہ مسجد الحرام سے منیٰ روانہ ہو رہے ہیں۔
سعودی حکومت نے حج کے موقع پر کرونا وائرس سے بچاؤ کے لیے سخت حفاظتی انتظامات کیے ہیں۔ طوافِ کعبہ کے دوران عازمین نے سماجی فاصلے کا خیال رکھا اور زمین پر لگائے گئے نشانات پر چل کر کعبے کا طواف کیا۔
کرونا کے باعث کیے گئے سخت اقدامات کے تحت اس سال عازمین کو خانۂ کعبہ کو چھونے کی اجازت بھی نہیں ہے۔ انتظامیہ نے خانۂ کعبہ کے گرد حصار بنایا ہے جس کے باعث لوگ خانۂ کعبہ کی دیواروں کو ہاتھ نہیں لگا سکتے اور نہ ہی حجرِ اسود کو بوسہ دے سکتے ہیں۔
عازمین کو مناسکِ حج کی ادائیگی کے دوران ماسک پہننے اور سماجی فاصلہ قائم رکھنے کی بھی ہدایت کی گئی ہے۔ مسجد الحرام میں نشانات بھی لگائے ہیں تاکہ عازمین کے درمیان فاصلہ قائم رہ سکے۔
آسٹریلیا: سڈنی سے براہِ راست کوئنز لینڈ جانے پر پابندی عائد
آسٹریلیا کی شمال مشرقی ریاست کوئنز لینڈ کے حکام نے کرونا وائرس کو مزید پھیلنے سے روکنے کے لیے سڈنی اور اس کے مضافاتی علاقوں سے لوگوں کے ریاست میں داخلے پر پابندی عائد کر دی ہے۔
حکام نے یہ پابندی دو خواتین کے سڈنی سے براستہ ملبرن ریاست کے دارالحکومت برسبین پہنچنے پر وائرس کا ٹیسٹ مثبت آنے کے بعد عائد کی ہے۔
ملبرن جنوبی ریاست وکٹوریا کا دارالحکومت ہے جہاں چھ ہفتے کا لاک ڈاؤن جاری ہے۔
امریکہ میں ہلاکتوں کی تعداد ڈیڑھ لاکھ سے زیادہ ہو گئی
امریکہ میں کرونا وائرس سے ہلاکتوں کی تعداد ڈیڑھ لاکھ سے تجاوز کر گئی ہے۔
امریکہ میں گزشتہ چوبیس گھنٹوں کے دوران کرونا وائرس کے 1461 مریض دم توڑ گئے ہیں، ستائیس مئی کے بعد ہلاکتوں کی یہ سب سے زیادہ تعداد ہے۔
جان ہاپکنز یونیورسٹی کے اعداد و شمار کے مطابق امریکہ میں کرونا وائرس سے ہلاک ہونے والے افراد کی کل تعداد ایک لاکھ 50 ہزار 713 ہو گئی ہے جب کہ کیسز کی مجموعی تعداد 44 لاکھ 26 ہزار سے زیادہ ہے۔
ریاست ایریزونا، کیلی فورنیا، فلوریڈا اور ٹیکساس میں نئے کیسز کی تعداد بڑھتی جا رہی ہے۔
برازیل: کووڈ 19 سے مرنے والوں کی تعداد 90 ہزار سے متجاوز
برازیل میں بدھ کو کوڈ 19 سے مرنے والوں کی تعداد 90 ہزار سے تجاوز کر گئی ہے جب کہ متاثرہ افراد کی تعداد میں بھی ریکارڈ اضافہ ہوا ہے۔
برازیل میں گزشتہ 24 گھنٹوں میں 69 ہزار 74 نئے کیسز رپورٹ ہوئے ہیں جب کہ مزید 1595 افراد اس مرض کے ہاتھوں ہلاک ہوئے۔
نئے کیسز اور اموات کی تعداد کے بعد اب تک کووڈ سے متاثرہ مریضوں کی مجموعی تعداد 25 لاکھ اور اموات کی کل تعداد 90 ہزار 134 ہو گئی ہے۔
امریکہ کے بعد سب سے زیادہ متاثرہ ممالک کی فہرست میں برازیل دوسرے نمبر پر ہے۔
کرونا کیسز میں اضافے کے باوجود برازیل کی حکومت نے بیرونِ ملک سے آنے والے افراد پر عائد پابندی ختم کر دی ہے۔
حکومتی اعلامیے میں کہا گیا ہے کہ پابندی کے خاتمے سے چار ماہ تک جاری رہنے والے طویل لاک ڈاؤن کے سبب ملکی سیاحت کو پہنچنے والے نقصانات کا ازالہ ہو سکے گا۔