چین میں کرونا وائرس کے مزید 23 کیسز سامنے آگئے
چین میں کرونا وائرس کے کیسز میں کمی واقع ہوئی ہے۔ تاہم اب مزید 23 نئے کیسز سامنے آئے ہیں جب کہ اس سے ایک روز قبل بھی 31 کیسز رپورٹ ہوئے تھے۔
نیشنل ہیلتھ کمیشن نے اپنی ویب سائٹ پر شائع بیان میں کہا ہے کہ نئے کیسز میں 15 افراد کو مقامی سطح پر وائرس منتقل ہوا جب کہ بیرون ملک سے چین پہنچنے والے 8 افراد میں وائرس کی تشخیص ہوئی۔
رپورٹس کے مطابق ہفتے کو مختلف اسپتالوں سے 45 مریضوں کو صحت یاب ہونے پر فارغ کیا گیا تاہم 817 کیسز اب بھی موجود ہیں۔ ان میں سے 47 افراد کی حالت تشویش ناک بتائی گئی ہے۔
چین میں وائرس سے متاثرہ افراد کی مجموعی تعداد 84 ہزار 619 ہو گئی ہے جب کہ اب تک 4 ہزار 634 افراد ہلاک ہوچکے ہیں۔
سندھ میں کاروبار کھولنے کی اجازت
پاکستان کے صوبے سندھ میں پیر سے تمام کاروباری، تجارتی اور صنعتی سرگرمیاں بحال کی جا رہی ہیں۔
صوبائی حکومت نے 14 مارچ کو کرونا کے پھیلاؤ کو روکنے کے لیے مختلف پابندیاں عائد کی تھیں جن میں بتدریج کمی کی جا رہی ہے۔
ترجمان وزیرِ اعلیٰ ہاؤس کے مطابق ہوٹلز اور ریسٹورینٹس رات 10 بجے تک کھلے رکھے جا سکیں گی جب کہ فوڈ کورٹس کو ٹیبل سروس بھی دینے کی اجازت ہو گی۔
شادی ہالز اور تعلیمی ادارے فوری طور پر نہیں کھولے جارہے۔ اس حوالے سے فیصلہ آئندہ ماہ ہو گا۔
امریکہ میں کیسز 50 لاکھ سے تجاوز کر گئے
امریکہ میں کرونا وائرس کے کیسز کی تعداد 50 لاکھ سے تجاوز کر گئی ہے جب کہ اس وبا سے امریکہ میں اب تک ایک لاکھ 62 ہزار سے زیادہ اموات ہو چکی ہیں۔
جان ہاپکنز یونیورسٹی کے اعداد و شمار کے مطابق امریکہ میں اتوار تک کرونا وائرس کے مجموعی کیسز کی تعداد 50 لاکھ 603 تک پہنچ گئی ہے۔
امریکہ دنیا بھر میں کرونا وائرس سے سب سے زیادہ متاثرہ ملک ہے جہاں کیسز اور اموات کسی بھی ملک کے مقابلے میں سب سے زیادہ ہیں۔
برازیل میں اموات ایک لاکھ سے تجاوز کر گئیں
برازیل میں کرونا وائرس سے اموات کی تعداد ایک لاکھ سے تجاوز کر گئی ہے جب کہ ملک بھر میں اب تک 30 لاکھ کیسز رپورٹ ہو چکے ہیں۔
کرونا وائرس سے سب سے زیادہ متاثرہ ملکوں کی فہرست میں برازیل امریکہ کے بعد دوسرے نمبر پر ہے جہاں ایک لاکھ 477 اموات اور 30 لاکھ 12 ہزار سے زائد کیسز رپورٹ ہو چکے ہیں۔ امریکہ میں کیسز کی تعداد 50 لاکھ سے زائد ہے۔
برازیل کے محکمۂ صحت کے مطابق اتوار کو ملک بھر میں 905 اموات اور 49 ہزار 970 کیسز رپورٹ ہوئے ہیں۔