بھارت: کشمیر کی سب سے بڑی جیل میں ہر پانچ میں سے ایک قیدی کرونا کا شکار
بھارت کے زیرِ انتظام کشمیر کی سب سے بڑی جیل میں ہر پانچ میں سے ایک قیدی میں کرونا وائرس پایا گیا ہے جب کہ بھارت میں مسلسل تین روز سے 60 ہزار سے زائد یومیہ کیسز رپورٹ ہو رہے ہیں۔
سرینگر کی سینٹرل جیل کی انتظامیہ نے کہا ہے کہ 480 میں سے 102 قیدیوں کا کرونا ٹیسٹ مثبت آیا ہے جس کے بعد انہیں جیل سے منتقل کرنے کے انتظامات کیے جا رہے ہیں۔
کشمیر کی جیلوں کے ایڈشنل ڈی جی نے خبر رساں ادارے 'رائٹرز' کو بتایا ہے کہ ہم مزید احتیاط کر رہے ہیں۔ جیلوں میں آنے والے تمام نئے قیدیوں کا کرونا ٹیسٹ کیا جا رہا ہے اور انہیں دو ہفتوں کے لیے قرنطینہ میں بھی رکھا جا رہا ہے۔
خیال رہے کہ بھارت میں گزشتہ کئی روز سے 50 ہزار سے زائد یومیہ کیسز رپورٹ ہو رہے تھے اور اب گزشتہ تین روز سے یہ تعداد بڑھ کر 60 ہزار سے زائد ہو گئی ہے۔
پاکستان میں کرونا وائرس کی کیا صورتِ حال ہے؟
پاکستان کے سرکاری اعداد و شمار کے مطابق گزشتہ 24 گھنٹوں کے دوران کرونا وائرس کے 626 نئے مریض سامنے آئے ہیں جب کہ اس وبا سے 14 مزید افراد جان کی بازی ہار گئے۔
جمعرات کو پاکستان میں 23 ہزار سے زائد کرونا ٹیسٹس کیے گئے جن میں سے 626 مثبت پائے گئے۔ نئے کیسز سامنے آنے کے بعد ملک میں کرونا کا شکار ہونے والوں کی مجموعی تعداد دو لاکھ 87 ہزار سے زائد ہو گئی ہے جب کہ اموات 6153 ہیں۔
پاکستان کے صوبہ سندھ میں سب سے زیادہ کیسز رپورٹ ہوئے ہیں۔ سندھ میں کیسز کی تعداد ایک لاکھ 25 ہزار سے زائد ہے جب کہ پنجاب میں 94 ہزار سے زائد کووڈ 19 کے مریض سامنے آ چکے ہیں۔
خیبر پختونخوا میں 35 ہزار، بلوچستان میں 12 ہزار، پاکستان کے زیرِ انتظام کشمیر میں دو ہزار اور گلگت بلتستان میں بھی دو ہزار 400 سے زائد کیسز رپورٹ ہوئے ہیں۔
پاکستان میں کرونا وائرس سے صحت یاب ہونے والے مریضوں کی تعداد دو لاکھ 65 ہزار سے زائد ہے۔
امریکہ: 'اے ایم سی' کا 400 سنیما دوبارہ کھولنے کا اعلان
دنیا بھر میں کرونا وائرس کے سبب بند سنیما ہالز اب ایک مرتبہ پھر کھلنے لگے ہیں اور دنیا کی سب سے بڑی سنیما چین 'اے ایم سی انٹرٹینمنٹ ہولڈنگز' نے بھی امریکہ میں اپنے بیشتر سنیما کھولنے کا اعلان کیا ہے۔
'اے ایم سی' کی انتظامیہ نے جمعرات کو اپنے ایک بیان میں کہا ہے کہ وہ 20 اگست سے فلم بینوں کے لیے امریکہ میں موجود اپنے دو تہائی سنیما ہالز کے دروازے کھول دے گی۔
'اے ایم سی' کے امریکہ میں مجموعی طور پر 600 سے زائد سنیما ہیں جن میں سے لگ بھگ 400 کو احتیاطی تدابیر کو مدِ نظر رکھتے ہوئے عوام کے لیے کھولا جا رہا ہے۔
فلم بینوں کو دوبارہ سنیما آنے پر راغب کرنے کے لیے 'اے ایم سی' نے سنیما کھولنے کے پہلے روز ٹکٹ کی قیمت صرف 15 سینٹ مقرر کی ہے۔ کم قیمت پر ٹکٹوں کی فروخت کے لیے کمپنی نے تشہیری مہم بھی شروع کردی ہے جس کا مرکزی نعرہ "2020 میں فلم دیکھیے 1920 کی قیمت پر" ہے۔
کمپنی کے مطابق پہلے مرحلے میں امریکہ کے 100 سے زائد مقامات پر سنیما ہالز کھولے جائیں گے۔
اے ایم سی کا کہنا ہے کہ وہ آئندہ ہفتوں میں مزید مقامات پر واقع اپنے دیگر سنیما بھی کھولنے کی تیاری کر رہی ہے۔
پبلک ٹرانسپورٹ میں کرونا کو پھیلنے سے کیسے روکا جائے؟
لاک ڈاؤن میں نرمی کے بعد پاکستان میں معمول کی سرگرمیاں بحال تو ہو رہی ہیں لیکن وائرس کا خطرہ ابھی ٹلا نہیں ہے۔ کرونا کے دوبارہ پھیلاؤ کا ایک ذریعہ پبلک ٹرانسپورٹ بھی بن سکتی ہے۔ جنوبی افریقہ میں پبلک ٹرانسپورٹ میں کرونا وائرس کا پھیلاؤ روکنے کے لیے ایک حل تلاش کیا گیا ہے۔ دیکھیے اس رپورٹ میں
