کرونا وائرس کی ویکسین کیسے کام کرے گی؟
کرونا وائرس کا مقابلہ کرنے کے لیے ویکسین کی تیاری کی کوششیں جاری ہیں۔ کسی بھی ویکسین کی منظوری بڑے پیمانے پر کامیاب تجربوں کے بعد دی جاتی ہے۔ اس وقت دنیا بھر میں کرونا سے بچاؤ کی کم از کم پانچ ویکسینز تجربات کے آخری مرحلے میں ہیں۔ یہ ویکسین انسانی جسم میں کیسے کام کرے گی؟ دیکھیے اس رپورٹ میں
بھارت میں ایک دن میں 10 لاکھ افراد کے ٹیسٹ کیے گئے
بھارت میں کرونا وائرس سے متاثرہ افراد کی تعداد 30 لاکھ کے قریب پہنچ گئی ہے۔ جب کہ 24 گھنٹوں کے دوران مزید 69 ہزار 878 افراد میں کرونا وائرس کی تصدیق ہوئی ہے۔
بھارت کی وزارتِ صحت کے جاری کردہ اعداد و شمار کے مطابق جمعے کے روز کرونا وائرس سے 945 اموات ہوئیں۔ جس کے بعد بھارت میں عالمی وبا سے ہلاکتوں کی تعداد 55 ہزار 794 ہو گئی ہے۔
اس وقت بھارت میں کرونا وائرس کے 6 لاکھ 97 ہزار 330 مریض زیر علاج ہیں، جب کہ 22 لاکھ سے زائد صحت یاب ہو چکے ہیں۔
بھارت میں جمعے کے روز 10 لاکھ 23 ہزار 836 کرونا ٹیسٹ کیے گئے۔ جو کہ اب تک بھارت میں کسی ایک دن میں کیے جانے والے سب سے زیادہ ٹیسٹ ہیں۔
میکسیکو میں ہلاکتیں ساڑھے 59 ہزار سے بڑھ گئیں
لاطینی امریکہ کے ملک میکسیکو میں کرونا وائرس کے سبب ہلاکتوں کی تعداد 59 ہزار 610 تک پہنچ گئی ہے۔
میکسیکو میں گزشتہ 24 گھنٹوں میں 5 ہزار 928 کرونا وائرس کے نئے کیسز رپورٹ ہوئے ہیں۔
ملک بھر میں کرونا وائرس کے کیسز کی مجموعی تعداد 5 لاکھ 49 ہزار 734 ہو گئی ہے۔
جمعے کو میکسیکو میں مزید 504 افراد کرونا وائرس کے باعث ہلاک ہوئے۔
حکام کا کہنا ہے کہ کرونا وائرس سے متاثرہ افراد کی اصل تعداد، سرکاری اعداد و شمار سے کہیں زیادہ ہو سکتی ہے۔