کرونا بحران: بھارتیوں کا عاملوں اور نجومیوں سے رجوع
بھارت میں کرونا وائرس کے روزانہ 70 ہزار سے زائد نئے کیسز سامنے آ رہے ہیں۔ اس صورتِ حال میں بہت سے بھارتی شہری اپنے مستقبل کے بارے میں فکرمند ہیں اور عاملوں و نجومیوں کا رخ کرنے لگے ہیں۔ دنیا کے مختلف ممالک میں کرونا وائرس کی عالمی وبا کے باعث ان دنوں کیا صورتِ حال ہے؟ دیکھیے اس رپورٹ میں
کرونا بحران: ایک ارب طلبہ کی اسکولوں میں واپسی غیر یقینی
کرونا وائرس کے بحران نے دنیا کے کئی ترقی پذیر خطوں میں نوجوان نسل کے لیے تعلیمی مواقعوں کو محدود کر دیا ہے اور ان کے لیے تعلیمی سلسلہ جاری رکھنے کے امکانات بری طرح متاثر ہو گئے ہیں۔
انٹرنیٹ تک رسائی نہ ہونے اور اسکولوں کی بندش کے باعث تقریباً تمام سطحوں پر طالب علموں کی ایک بڑی تعداد کو غیر معمولی چیلنجز کا سامنا کرنا پڑ رہا ہے، جسے اقوامِ متحدہ کی ایک تازہ رپورٹ میں عالمی ہنگامی صورتِ حال قرار دیا گیا ہے۔
اقوام متحدہ کے تعلیمی اور ثقافتی امور سے متعلق ادارے 'یونیسکو' کے مطابق دنیا کے ایک ارب یعنی دو تہائی طالب علموں کو اسکولوں کی بندش کے بعد اپنی تعلیم جاری رکھنے میں غیر یقینی صورتِ حال کا سامنا ہے۔
اعداد و شمار کے مطابق اس برس اگست اور اکتوبر کے درمیان تقریباً 90 کروڑ پرائمری سے پہلے اور سیکنڈری اسکول کی سطحوں پر طلبہ و طالبات کو اپنی کلاسوں میں واپس جانا تھا۔ لیکن کرونا وائرس کی موجودہ صورتِ حال میں دنیا کے 155 ممالک میں صرف 43 کروڑ طالب علم ہی اسکول واپس آسکیں گے۔
دنیا کے تقریباً 45 کروڑ نوجوان اپنے نئے تعلیمی سال کا آغاز انٹرنیٹ کے ذریعے آن لائن کریں گے۔ ان میں سے کچھ طلبا و طالبات جزوی طور پر آن لائن اور کلاس میں حاضر ہو کر تعلیم حاصل کریں گے۔
پاکستان: کرونا کے 10 مریض چل بسے، 424 نئے کیسز رپورٹ
پاکستان میں گزشتہ چوبیس گھنٹوں کے دوران کرونا وائرس کے شکار 10 مریض دم توڑ گئے ہیں جب کہ 424 افراد میں وائرس کی تشخیص ہوئی ہے۔
سرکاری اعداد و شمار کے مطابق پاکستان میں کیسز کی کل تعداد دو لاکھ 97 ہزار سے تجاوز کر گئی ہے جب کہ وبا سے اب تک 6328 افراد ہلاک ہو چکے ہیں۔
حکام کا کہنا ہے کہ ملک بھر میں کرونا سے متاثرہ دو لاکھ 81 ہزار سے زیادہ مریض صحت یاب ہو چکے ہیں اور مجموعی طور پر 26 لاکھ سے زائد ٹیسٹ کیے گئے ہیں۔
ریاستیں کرونا ویکسین کی تقسیم کے لیے تیاری کریں: سی ڈی سی
امریکہ میں صحتِ عامہ سے متعلق امور کے نگران ادارے 'سینٹرز فار ڈیزیز کنٹرول' (سی ڈی سی) نے ملک کی تمام 50 ریاستوں کے حکام سے کہا ہے کہ وہ یکم نومبر سے کرونا وائرس کی ویکسین کی تقسیم شروع کرنے کی تیاری کریں۔
امریکی ذرائع ابلاغ میں بدھ کو آنے والی رپورٹس کے مطابق 'سی ڈی سی' کی جانب سے ریاستوں کو یہ گائیڈ لائنز 27 اگست کو جاری کی گئی تھیں۔
میڈیا رپورٹس کے مطابق 'سی ڈی سی' کی جانب سے ویکسین کی تقسیم سے متعلق جس تاریخ کا انتخاب کیا گیا ہے اس کے دو روز بعد امریکہ میں صدارتی انتخاب ہونا ہے۔
ریاستوں کے گورنرز کو ارسال کردہ چار صفحات پر مشتمل میمو میں 'سی ڈی سی' نے صحت کے مقامی محکموں اور حکام سے کہا ہے کہ وہ ویکسینیشن شروع کرنے سے متعلق اپنے منصوبوں کا ابتدائی خاکہ یکم اکتوبر تک تیار کرلیں۔
خبر رساں ادارے 'بلوم برگ' کے مطابق 'سی ڈی سی' نے رابطہ کرنے پر مذکورہ میمو پر کوئی ردِ عمل نہیں دیا۔