امریکہ میں یومیہ اموات میں کمی
دنیا بھر میں کرونا وائرس سے سب سے زیادہ متاثرہ ملک امریکہ میں یومیہ ہلاکتوں کی تعداد میں کمی ہو رہی ہے۔ جب کہ ماہرین نے خبردار کیا ہے کہ سردیوں میں اس وبا کے باعث ایک بار پھر ہلاکتوں میں اضافہ ہو سکتا ہے۔
ماہرین کا کہنا ہے کہ سردی کی شدت میں اضافے کے باعث لوگوں کے چار دیواری کے اندر زیادہ وقت گزارنے سے وبا کے پھیلاؤ میں اضافہ ہو سکتا ہے۔
واشنگٹن یونیورسٹی کے پروفیسر علی موقداد کا کہنا ہے کہ جب تک کرونا ویکسین نہیں آ جاتی۔ ہمیں اپنے معمولاتِ زندگی بدلنا ہوں گے۔
خیال رہے کہ امریکہ میں کرونا وائرس سے متاثرہ افراد کی تعداد 64 لاکھ سے تجاوز کر چکی ہے۔ جب کہ ایک لاکھ 93 ہزار سے زائد افراد اس وبا کا نشانہ بن کر ہلاک ہو چکے ہیں۔
میکسیکو میں ہلاکتیں 70 ہزار سے متجاوز
میکسیکو میں گزشتہ 24 گھنٹوں کے دوران مزید 534 اموات کے بعد کرونا وائرس کے باعث ہونے والی ہلاکتوں کی تعداد 70 ہزار سے تجاوز کر گئی ہے۔
وزارتِ صحت کے حکام کے مطابق جمعے کو کرونا وائرس کے مزید 5 ہزار 935 کیسز سامنے آئے جس کے بعد میکسیکو میں متاثرہ افراد کی تعداد 6 لاکھ 58 ہزار سے زائد ہو گئی ہے۔
وبا کے باعث میکسیکو کی معیشت میں مزید 13 فی صد گراوٹ دیکھی جا رہی ہے۔
اعداد و شمار کے مطابق امریکہ،بھارت اور برازیل کے بعد میکسیکو کرونا وائرس سے سب سے زیادہ متاثرہ چوتھا ملک ہے۔
خیال رہے کہ میکسیکو میں ہونے والی ایک تحقیق میں کہا گیا تھا کہ رواں سال مارچ کے وسط سے اگست کے آغاز تک ایک لاکھ 20 ہزار سے زائد اضافی اموات ہوئی ہیں۔
تحقیق میں یہ بھی کہا گیا تھا کہ یہ لازمی نہیں کہ یہ اضافی اموات کرونا وائرس کے باعث ہی ہوئی ہوں۔
فرانس میں پہلی بار 10 ہزار سے زائد کیس
فرانس میں کرونا وبا کے آغاز کے بعد پہلی بار ایک ہی روز 10 ہزار سے زائد کیس رپورٹ ہوئے ہیں۔
محکمہ صحت کے حکام نے ہفتے کو بتایا کہ ملک بھر میں گزشتہ 24 گھنٹوں کے دوران مزید 10 ہزار 561 کیس رپورٹ ہوئے ہیں۔
ریکارڈ کیسز رپورٹ ہونے کے بعد حکام نے لاک ڈاؤن کے بجائے دیگر احتیاطی تدابیر اپنانے کے لیے اقدامات شروع کر دیے ہیں۔
فرانسیسی حکام کا کہنا ہے کہ زیادہ رسک والے علاقوں میں ٹیسٹنگ کی استعداد بڑھانے کے علاوہ وائرس کا پھیلاؤ روکنے کے لیے دیگر ضروری اقدامات کیے جا رہے ہیں۔
فرانس میں گزشتہ ہفتے اسپتال میں داخل ہونے والے مریضوں کی تعداد میں بھی اضافہ ہوا ہے۔ مزید 2432 مریض اسپتال لائے گئے تھے جب کہ 417 مریضوں کو انتہائی نگہداشت وارڈز میں رکھا گیا۔
خبر رساں ادارے 'رائٹرز' کے مطابق گزشتہ 24 گھنٹوں کے دوران فرانس میں 17 ہلاکتوں کے بعد مہلک وائرس سے ہلاکتوں کی مجموعی تعداد 30 ہزار سے بڑھ چکی ہے۔
حمزہ شہباز بھی کرونا وائرس کا شکار ہو گئے ہیں: مسلم لیگ (ن)
پاکستان میں حزب اختلاف کی سب سے بڑی جماعت مسلم لیگ (ن) نے دعویٰ کیا ہے کہ اس کے مرکزی رہنما حمزہ شہباز بھی جیل میں کرونا وائرس کا شکار ہو گئے ہیں۔
مسلم لیگ (ن) کے ڈپٹی سیکریٹری جنرل عطا اللہ تارڑ نے ایک ٹوئٹ میں بتایا کہ پنجاب اسمبلی میں اپوزیشن لیڈر حمزہ شہباز کو چند روز سے بخار تھا جس کے بعد اُن میں وائرس کی تصدیق ہوئی ہے۔
عطا اللہ تارڑ کا کہنا ہے کہ حمزہ شہباز کو فوری طبی امداد کے لیے کوٹ لکھپت جیل سے اسپتال منتقل کرنا ضروری ہے۔
پاکستان میں انسداد بدعنوانی کے ادارے، قومی احتساب بیورو (نیب) نے گزشتہ سال جون میں آمدن سے زائد اثاثہ جات کیس میں حمزہ شہباز کو گرفتار کیا تھا۔