اسلام آباد: طلبہ کا کرونا ٹیسٹ مثبت آنے پر نجی کالج سیل
پاکستان کے دارالحکومت اسلام آباد کے ایک میڈیکل کالج کے 16 طلبہ کا کرونا ٹیسٹ مثبت آنے کے بعد اسے سیل کر دیا گیا ہے۔
قومی رابطہ کمیٹی برائے کرونا وائرس (این سی او سی) کے مطابق ٹارگٹڈ ٹیسٹنگ کے دوران اسلام آباد کے رفاہ میڈیکل کالج کے ہاسٹل میں 16 کرونا کیسز سامنے آنے کے بعد عوام کی حفاظت کے پیشِ نظر اسے سیل کر دیا گیا ہے۔
ڈپٹی کمشنر اسلام آباد کی جانب سے میڈیکل کالج کو سیل کرنے کا باقاعدہ نوٹی فکیشن بھی جاری کر دیا گیا ہے۔
وائس آف امریکہ کو دستیاب نوٹی فکیشن کے مطابق وزارتِ صحت کی تجویز پر رفاہ میڈیکل کالج اور ہاسٹل کو تاحکم ثانی سیل کیا گیا ہے تاکہ وبا کے پھیلاؤ کو روکا جا سکے۔
نوٹی فکیشن میں اسلام آباد پولیس سے کہا گیا ہے کہ وہ عوام کی حفاظت کے پیشِ نظر کالج اور ہاسٹل سے ملحقہ علاقوں کو سیل کرے۔
پشاور: ایک ہی سرکاری اسکول کے پانچ اساتذہ میں کرونا وائرس کی تصدیق
پشاور کے ایک ہی سرکاری اسکول کے پانچ اساتذہ میں کرونا وائرس کی تصدیق ہوئی ہے۔ محکمۂ تعلیم کے مطابق اساتذہ کا تعلق گورنمنٹ ہائر سیکنڈری اسکول نمبر ایک، کینٹ سے ہے۔
محکمۂ تعلیم کا کہنا ہے کہ اساتذہ کے کرونا ٹیسٹ ایک ہفتہ قبل کرائے گئے تھے جن کے نتائج منگل کو موصول ہوئے ہیں۔ محکمۂ تعلیم کے مطابق کرونا وائرس سے متاثرہ کوئی بھی استاد طلبہ سے نہیں ملا تھا۔
محکمۂ تعلیم نے کہا ہے کہ ان اساتذہ کے دوبارہ بھی کرونا ٹیسٹ کیے جائیں گے۔ تمام اساتذہ کے مرحلہ وار کرونا ٹیسٹ کے حوالے سے محکمۂ صحت سے بات ہو چکی ہے۔
بھارت میں کیسز 50 لاکھ سے زیادہ
بھارت میں کرونا وائرس کے کیسز کی تعداد 50 لاکھ سے تجاوز کر گئی ہے۔
خبر رساں ادارے 'رائٹرز' کے مطابق بدھ کو بھارت میں 'کووڈ 19' میں مبتلا 90 ہزار سے زائد نئے مریض سامنے آئے ہیں جس کے بعد ملک میں کرونا کا شکار مریضوں کی مجموعی تعداد 50 لاکھ سے زیادہ ہو گئی ہے۔
خیال رہے کہ امریکہ کے بعد بھارت وہ دوسرا ملک ہے جہاں کیسز کی تعداد 50 لاکھ سے زیادہ ہے۔
بھارت میں کرونا وائرس سے 82 ہزار سے زائد ہلاکتیں بھی ہو چکی ہیں جب کہ گزشتہ 24 گھنٹوں کے دوران 'کووڈ 19' کے شکار 1290 مریض ہلاک ہوئے ہیں۔
کرونا وائرس بھارت کی 351 جیلوں تک پہنچ گیا: رپورٹ
بھارت میں انسانی حقوق کے لیے کام کرنے والی ایک تنظیم 'نیشنل کیمپین اگینسٹ ٹارچر' نے اپنی ایک حالیہ رپورٹ میں دعویٰ کیا ہے کہ ملک کی 1350 جیلوں میں سے 351 میں کرونا وائرس کے مریض رپورٹ ہو چکے ہیں۔
رپورٹ کے مطابق بھارت کی 36 ریاستوں میں سے 25 کی مختلف جیلوں میں کرونا وائرس کے مریض پائے گئے ہیں۔ بھارتی ریاست اترپردیش کی 35 جیلوں میں کرونا وائرس کے مریض پائے گئے ہیں۔
مدھیہ پردیش، مہاراشڑرا، اڑیسہ اور آندھرا پردیش میں بھی بالترتیب 34، 32، 31 اور 28 جیلوں میں کرونا کے مریض رپورٹ ہو چکے ہیں۔