پاکستان میں 600 سے زیادہ افراد میں وائرس کی تشخیص
بھارت: تاج محل چھ ماہ بعد سیاحوں کے لیے دوبارہ کھول دیا گیا
بھارت میں کرونا وائرس کے پھیلاؤ کو روکنے کی غرض سے بند کیے گئے مغلیہ دور کے شاہکار تاج محل کو سیاحوں کے لیے دوبارہ کھول دیا گیا ہے۔
بھارت میں مارچ میں اعلان کردہ سخت لاک ڈاؤن کے باعث تاج محل بھی ویران ہو گیا تھا اور ملکی و غیر ملکی سیاحوں سمیت کسی کو بھی تاج محل کی سیر کرنے کی اجازت نہیں تھی۔ تاہم پابندیوں میں نرمی کے اعلان کے ساتھ ہی پیر سے تاج محل کی رونقیں دوبارہ بحال ہونے لگی ہیں۔
حکام کا کہنا ہے کہ ایک دن میں صرف پانچ ہزار افراد کو سماجی دوری سے متعلق قواعد پر سختی سے عمل کرتے ہوئے تاج محل کے دورے کی اجازت دی جائے گی جب کہ ٹکٹس بھی صرف آن لائن خریدے جاسکیں گے۔
تاج محل ملکی اور غیر ملکی سیاحوں کے لیے بھارت کا مشہور سیاحتی مقام ہے۔ اعداد و شمار کے مطابق سالانہ 70 لاکھ سیاح تاج محل کی سیر کرتے ہیں۔
کرونا کیسز میں اضافہ، پاکستان میں تعلیمی اداروں کی بندش میں توسیع کا مطالبہ
پاکستان میں ڈاکٹروں کی تنظیم 'پاکستان میڈیکل ایسوسی ایشن' (پی ایم اے) نے مطالبہ کیا ہے کہ کرونا کیسز کی بڑھتی ہوئی شرح کے پیشِ نظر ملک بھر میں پرائمری اور پری پرائمری اسکولوں کو کھولنے کا فیصلہ 12 سے 15 روز کے لیے ملتوی کیا جائے۔
ایسوسی ایشن کا کہنا ہے کہ ملک میں ایک ہفتے کے دوران کرونا کیسز کے ساتھ نزلہ و زکام کے مریضوں کی تعداد میں بھی یک دم اضافہ دیکھا جا رہا ہے۔
ادھر صوبۂ سندھ میں کرونا کے ممکنہ پھیلاؤ کے باعث اسکول کھولنے کا دوسرا مرحلہ احتیاطی طور پر پہلے ہی ملتوی کیا جا چکا ہے۔ واضح رہے کہ پہلے دیے گئے شیڈول کے مطابق چھٹی سے آٹھویں جماعتوں کے طلبہ کے لیے اسکول دوسرے مرحلے میں 23 ستمبر سے کھلنا تھے جو سندھ حکومت نے 28 ستمبر تک مؤخر کر دیا تھا جب کہ وفاقی حکومت شیڈول کے مطابق اسکول کھولنے کا اعلان کر چکی ہے۔