پاکستان میں مزید 566 افراد وبا سے متاثر
پاکستان میں گزشتہ 24 گھنٹوں کے دوران مزید 566 افراد کرونا وائرس سے متاثر ہونے کی تصدیق کی گئی۔
اعداد و شمار کے مطابق پاکستان میں کرونا وائرس سے تین لاکھ نو ہزار 581 افراد متاثر ہوئے۔ جب کہ ان میں سے دو لاکھ 95 ہزار 333 افراد صحت یاب ہو چکے ہیں۔ حکام نے 6451 افراد کے ہلاک ہونے کی تصدیق کی ہے۔
اعداد و شمار کے مطابق پاکستان میں اب بھی 7797 افراد زیرِ علاج ہیں جن میں سے 576 افراد کی حالت تشویش ناک بتائی جا رہی ہے۔
کرونا کے خلاف پنجاب حکومت کی حکمتِ عملی کیسی رہی؟
پاکستان میں کرونا وائرس کا زور ٹوٹنے کے بعد کاروباری سرگرمیاں بحال اور تعلیمی ادارے کھل گئے ہیں۔ آبادی کے لحاظ سے ملک کے سب سے بڑے صوبے پنجاب میں کرونا کا پھیلاؤ روکنے کے لیے کیا حکمتِ عملی اپنائی گئی اور پنجاب حکومت کی اس حکمتِ عملی کو ماہرین کیسے دیکھتے ہیں؟ جانیے ثمن خان کی رپورٹ میں
فرینچ اوپن: ٹینس کورٹ میں صرف ایک ہزار شائقین کو آنے کی اجازت
فرانس کی حکومت نے اتوار کو شروع ہونے والے فرینچ اوپن ٹینس ٹورنامنٹ میں میچ دیکھنے کے لیے روزانہ صرف ایک ہزار شائقین کو ٹینس کورٹ میں جانے کی اجازت دی ہے۔
فرینچ اوپن کے منتظمین کو امید تھی کہ انہیں پانچ ہزار شائقین کے داخلے کی اجازت مل جائے گی۔ یہ ٹورنامنٹ کرونا وائرس کے پھیلاؤ کی وجہ سے چار ماہ کی تاخیر سے ہو رہا ہے۔
اس سے قبل 20 ہزار شائقین کی گنجائش والے ٹینس کورٹ میں ساڑھے 11 ہزار شائقین کے داخلے کا اعلان کیا گیا تھا۔ اب حکومت کے اصرار پر یہ تعداد گھٹ کر صرف ایک ہزار تک محدود ہو گئی ہے۔
فرانس کے وزیرِ اعظم یان کاسٹیکس کا اصرار تھا کہ ٹورنامنٹ پر وہی قواعد اور ضوابط لاگو ہوں گے جو کرونا وائرس کے ریڈ زونز میں نافذ ہیں۔