پابندیوں میں نرمی کے بعد محدود زائرین کا عمرہ
سعودی عرب نے کرونا وائرس کے پیشِ نظر نافذ کردہ پابندیوں میں نرمی کرتے ہوئے اتوار کو چھ ہزار زائرین کو عمرے کی ادائیگی کی اجازت دے دی۔
حکومت کی طرف سے پہلے مرحلے میں سعودی شہریوں اور رہائشیوں کو عمرہ ادا کرنے کی اجازت ہو گی۔
سرکاری احکامات کے مطابق ایک شخص زیادہ سے زیادہ تین گھنٹوں میں عمرہ ادا کرنے کا پابند ہو گا۔
اس ضمن میں مسجد الحرام میں نماز پڑھنے اور عمرہ کے خواہش مندوں کو پہلے سے تاریخ اور وقت کی آن لائن بکنگ کرانا ہو گی۔
دوسرے مرحلے میں رواں ماہ 18 اکتوبر سے زیادہ سے زیادہ 15 ہزار زائرین کو عمرہ اور 40 ہزار نمازیوں کو اجازت دی جائے گی۔
واضح رہے کہ سعودی عرب میں لگ بھگ 3 لاکھ 36 ہزار افراد میں کرونا وائرس کی تشخیص ہوئی ہے جب کہ اس وبا سے 4800 سے زائد افراد ہلاک ہو چکے ہیں۔
صدر ٹرمپ کی حالت بہتر ہے، آج اسپتال سے ڈسچارج کیا جا سکتا ہے: معالج
امریکہ کے صدر ڈونلڈ ٹرمپ کے معالج ڈاکٹر سین کونلے نے کہا ہے صدر کی حالت بہتر ہے اور اُنہیں پیر کو اسپتال سے ڈسچارج کیا جاسکتا ہے۔
کرونا وائرس کے شکار ہونے والے امریکہ کے صدر ڈونلڈ ٹرمپ واشنگٹن کے والٹر ریڈ نیشنل ملٹری میڈیکل سینٹر میں زیرِ علاج ہیں جہاں امریکی نیوی کے کمانڈر ڈاکٹر سین کونلے کی سربراہی میں ڈاکٹروں کی ایک ٹیم اُن کا علاج کر رہی ہے۔
ڈاکٹر سین نے اتوار کو میڈیا کو بریفنگ دیتے ہوئے بتایا کہ صدر ٹرمپ کے خون میں آکسیجن کی کمی نوٹ کی گئی ہے جس پر اُنہیں اسٹیرائڈ دی جا رہی ہے۔
ڈاکٹر کونلی نے بتایا کہ صدر ٹرمپ نے سانس میں دشواری کی کوئی شکایت نہیں کی اور اُن کی حالت اب بہتر ہے۔
جان ہوپکنز یونیورسٹی اسکول آف میڈیسن سے وابستہ پھیپھڑوں کے امراض کے ماہر ڈاکٹر برین گریبلدی کے مطابق اگر صدر ٹرمپ کی حالت اسی طرح برقرار رہی تو امید ہے کہ اُنہیں آج ہی اسپتال سے وائٹ ہاؤس منتقل کر دیا جائے گا جہاں وہ اپنا بقایا علاج جاری رکھ سکتے ہیں۔
خیبر پختونخوا: اسکولوں میں سہولتیں نہیں، ایس او پیز پر عمل کیسے ہو گا؟
خیبر پختونخوا میں کرونا وائرس ایس او پیز کی خلاف ورزی پر 42 تعلیمی ادارے بند کیے گئے ہیں جن میں اکثریت نجی اسکولوں کی ہے۔ دوسری جانب صوبے کے ہزاروں سرکاری اسکول بنیادی سہولتوں سے محروم ہیں جس کے باعث ان میں کرونا کے حفاظتی اقدامات پر عمل درآمد مشکل نظر آ رہا ہے۔ عمر فاروق کی رپورٹ۔
نیوزی لینڈ کی وزیرِ اعظم کا ایک بار پھر کرونا کو شکست دینے کا اعلان
نیوزی لینڈ کی وزیرِ اعظم جیسنڈا آرڈرن نے اعلان کیا ہے کہ اُن کے ملک نے کرونا وائرس کو دوسری مرتبہ شکست دے دی ہے۔
وزیرِ اعظم جیسنڈا نے پیر کو اپنے ایک بیان میں کہا کہ حکومت نے وائرس کو دوبارہ پھیلنے سے روکنے کی لڑائی میں وبا کو شکست دے دی ہے جس کے بعد ملک کے دوسرے بڑے شہر آکلینڈ سے پابندیاں اٹھا لی ہیں۔
وزیرِ اعظم جیسنڈا نے شہریوں کو پابندیوں پر عمل درآمد کرنے پر مبارک باد بھی دی۔
وزیرِ اعظم جیسنڈا نے مئی میں وائرس کے خلاف پہلی مرتبہ فتح کا اعلان اُس وقت کیا تھا جب ملک میں 102 روز تک مقامی سطح پر وائرس کی منتقلی کا کوئی کیس سامنے نہیں آیا تھا۔
لیکن اگست میں کرونا وائرس کے نئے کیسز سامنے آنا شروع ہوئے تو 15 لاکھ آبادی والے شہر آکلینڈ میں دوبارہ پابندیاں عائد کر دی گئی تھیں۔