امریکی فوج کے ایک اور سینئر افسر کرونا وائرس سے متاثر
امریکہ کی فوج کی میرین کور نے کہا ہے کہ اس کے دوسرے اعلیٰ ترین افسر جنرل گیری تھامس بھی کرونا وائرس کا شکار ہو گئے ہیں۔ ان کا کرونا وائرس کا ٹیسٹ بھی مثبت آیا ہے۔
خیال رہے کہ جنرل گیری تھامس امریکہ کی فوج کے دوسرے اعلیٰ ترین افسر ہیں جو کہ رواں ہفتے عالمی وبا سے متاثر ہوئے ہیں۔
اب خدشات ظاہر کیے جا رہے ہیں کہ ان دونوں اعلیٰ افسران سے ملاقات کرنے والے پینٹاگون کے دیگر اعلیٰ حکام بھی وائرس سے متاثر ہو سکتے ہیں۔
جنرل گیری تھامس میرین کور کے اسسٹنٹ کمانڈنٹ ہیں۔ ان میں کرونا وائرس کی معمولی علامات ظاہر ہوئی ہیں۔ انہوں نے خود کو اپنے گھر میں قرنطینہ کر لیا ہے۔
امریکی فوج کی جوائنٹ چیفس آف اسٹاف میں شامل تمام اعلیٰ فوجی افسران قرنطینہ میں جا چکے ہیں۔ ان میں چیئرمین جوائنٹ چیفس آف اسٹاف جنرل مارک ملی بھی شامل ہیں۔
آسٹریلیا میں تین ماہ بعد 48 گھنٹوں میں کرونا سے کوئی ہلاکت نہیں ہوئی
آسٹریلیا میں مسلسل دوسرے روز کرونا وائرس سے کوئی ہلاکت نہیں ہوئی ہے اور ایسا آسٹریلیا میں لگ بھگ تین ماہ بعد ہوا ہے۔
گزشتہ 24 گھنٹوں کے دوران آسٹریلوی ریاستوں اور زیرِ انتظام علاقوں میں کووڈ 19 کے 16 کیسز سامنے آئے ہیں جب کہ جمعرات کو 28 کیسز رپورٹ ہوئے تھے۔ البتہ گزشتہ دو روز کے دوران کرونا وائرس سے کوئی ہلاکت نہیں ہوئی۔
خبر رساں ادارے 'رائٹرز' کے مطابق گیارہ جولائی کے بعد یہ پہلا موقع ہے جب آسٹریلیا میں 48 گھنٹوں کے دوران کرونا سے کوئی ہلاکت نہیں ہوئی۔
روس میں یومیہ کیسز کی تعداد 11 ہزار تک پہنچ گئی
روس میں کرونا وائرس کے یومیہ کیسز کی تعداد میں ایک بار پھر اضافہ ہو رہا ہے اور 24 گھنٹوں کے دوران سامنے آنے والے کیسز 11 ہزار تک پہنچ گئے ہیں۔
امریکہ کی 'جانز ہوپکنز یونیورسٹی' کے اعداد و شمار کے مطابق جمعرات کو روس میں کرونا وائرس کے 11 ہزار 300 سے زائد کیسز رپورٹ ہوئے ہیں۔ اس سے قبل چھ اکتوبر کو بھی روس میں 11 ہزار سے زائد کیسز سامنے آئے تھے۔
روس میں کرونا وائرس کی وبا مئی میں زوروں پر تھی جس کے بعد جولائی میں یومیہ کیسز کی تعداد کم ہونا شروع ہوئی تھی۔
اگست میں روس میں ایک دن کے دوران سامنے آنے والے کیسز کی تعداد پانچ ہزار سے بھی کم ہو گئی تھی۔
البتہ ستمبر کے آخری عشرے میں کیسز دوبارہ بڑھنا شروع ہوئے اور اکتوبر میں یومیہ کیسز کی تعداد ایک بار پھر 10 ہزار سے زائد ہو گئی ہے۔
خیال رہے کہ روس میں وبا کے آغاز سے اب تک کووڈ 19 کے 12 لاکھ 53 ہزار سے زائد کیسز سامنے آ چکے ہیں جب کہ اموات کی تعداد 22 ہزار سے زیادہ ہے۔
بھارت میں 70 ہزار سے زائد نئے کیسز، مجموعی مریض 69 لاکھ سے زیادہ
بھارت میں کرونا وائرس کے کیسز کی تعداد میں 70 ہزار 400 سے زائد کیسز کا مزید اضافہ ہوا ہے جو جمعرات کو سامنے آئے ہیں۔ نئے کیسز کے بعد ملک میں کووڈ 19 سے متاثرہ افراد کی کل تعداد 69 لاکھ چھ ہزار سے زیادہ ہو گئی ہے۔
بھارت میں کرونا وائرس سے ہونے والی ہلاکتیں بھی ایک لاکھ چھ ہزار سے زائد ہیں۔ بھارت، امریکہ کے بعد دنیا بھر میں کرونا سے سب سے زیادہ متاثر ہونے والا ملک ہے۔