پاکستان میں مثبٹ کیسز کی شرح 70 دن بعد تین فی صد سے زائد
پاکستان میں حکام کی جانب سے کرونا وائرس کی دوسری لہر کے پیشِ نظر ملک کے مختلف شہروں میں دوبارہ پابندیاں عائد کی جا رہی ہیں۔
لاہور، کراچی، اسلام آباد، راولپنڈی، ملتان، میرپور، حیدرآباد سمیت 11 شہروں میں کاروباری مراکز، ریستوران، شادی ہال رات 10 بجے جب کہ تفریحی مقامات شام چھ بجے بند کرنے کا فیصلہ کیا گیا ہے۔
ادھر وفاقی وزیر منصوبہ بندی اسد عمر کا کہنا ہے کہ ملک میں 70 دن بعد مثبت کیسز کی شرح تین فی صد سے بڑھ گئی ہے جس سے اندازہ ہوتا ہے کہ بیماری بڑھ رہی ہے۔
اُن کا ایک ٹوئٹ میں کہنا تھا کہ کرونا کی دوسری لہر کا مقابلہ کرنے کے لیے عوام کو احتیاط کرنا ہو گی۔
جرمنی میں دو سے 20 نومبر تک بارز، تھیٹرز اور ریستوران بند کرنے کا فیصلہ
جرمنی کی چانسلر اینجلا مرکل نے اعلان کیا ہے کہ وائرس کے پھیلاؤ کے باعث دو سے 20 نومبر تک بارز، تھیٹرز اور ریستوران بند رہیں گے۔
خبر رساں ادارے 'رائٹرز' کے مطابق جرمن چانسلر نے کہا کہ مقامی حکومتوں کی مشاورت کے ساتھ دوبارہ پابندیاں عائد کی جا رہی ہیں کیوں کہ وائرس کی دوسری لہر خطرناک ثابت ہو سکتی ہے۔
اینجلا مرکل نے کہا کہ جرمنی کا نظامِ صحت موجودہ صورتِ حال کو سنبھال سکتا ہے، لیکن لاک ڈاؤن نہ کیا تو آنے والے ہفتوں میں صورتِ حال کنٹرول سے باہر ہو سکتی ہے۔
یورپ میں وائرس کی دوسری لہر کے باعث ایک بار پھر اسٹاک مارکیٹس میں مندی کا رُجحان دیکھا جا رہا ہے۔
بھارت میں متاثرین کی تعداد 80 لاکھ سے زائد
بھارت میں کرونا وائرس سے متاثرہ افراد کی تعداد 80 لاکھ سے زائد ہو گئی ہے جب کہ موسمِ سرما میں ماہرین وائرس کے مزید پھیلاؤ کا خدشہ ظاہر کر رہے ہیں۔
حکومت کی جانب سے جاری کردہ تازہ اعداد وشمار کے مطابق ایک ارب 30 کروڑ آبادی والے ملک بھارت میں کرونا سے متاثرہ افراد کی تعداد 80 لاکھ 40 ہزار 203 ہوگئی ہے جب کہ اب تک ایک لاکھ 20 ہزار 527 افراد ہلاک ہو چکے ہیں۔
بھارت کرونا وائرس سے سب سے زیادہ متاثرہ ممالک کی فہرست میں امریکہ کے بعد دوسرے نمبر پر ہے جہاں اب تک کرونا وائرس کے متاثرین کی مجموعی تعداد 90 لاکھ 10 ہزار ہو چکی ہے۔
دارالحکومت نئی دہلی میں بدھ کو پانچ ہزار نئے کیسز رپورٹ ہوئے جو ایک دن کے دوران سامنے آنے والے کیسز کی اب تک کی سب سے بڑی تعداد ہے۔
بھارت کا معاشی مرکز سمجھا جانے والا ممبئی، بھارت کا سب سے زیادہ متاثرہ شہر ہے جہاں اب تک ڈھائی لاکھ سے زیادہ کیسز اور دس ہزار سے زیادہ اموات ہوچکی ہیں۔
دنیا بھر میں پہلی مرتبہ ایک دن میں 5 لاکھ سے زائد کیسز رپورٹ
دنیا بھر میں پہلی مرتبہ بدھ کو ایک روز کے دوران کرونا وائرس کے پانچ لاکھ سے زیادہ کیسز رپورٹ ہوئے ہیں۔
عالمی سطح پر کووڈ 19 کیسز کی یومیہ تعداد میں دو ہفتوں سے بھی کم مدت کے دوران تقریباً 25 فی صد اضافہ ہوا ہے جب کہ گزشتہ جمعے کو دنیا میں پہلی بار ایک دن میں چار لاکھ کیسز رپورٹ ہوئے تھے۔
بیشتر مغربی ممالک اور لاطینی امریکہ کے کچھ حصوں میں پچھلے کچھ ہفتوں کے دوران ایک روز میں سب سے زیادہ اضافہ ہوا جس کے بعد بہت سے ممالک نے کرونا وائرس کے پھیلاؤ کو روکنے کے لیے سخت اقدامات اٹھانا شروع کر دیے ہیں۔
جان ہاپکنز یونیورسٹی کے اعداد و شمار کے مطابق دنیا بھر میں کرونا وائرس سے متاثرہ افراد کی مجموعی تعداد چار کروڑ 50 لاکھ سے تجاوز کر گئی ہے جب کہ اب تک گیارہ لاکھ سے زیادہ اموات رپورٹ ہو چکی ہیں۔
متاثرین کی تعداد کے لحاظ سے یورپ، شمالی امریکہ اور لاطینی امریکہ میں دنیا کے 66 فی صد افراد شامل ہیں جب کہ یہاں دنیا بھر کے مقابلے میں 76 فی صد سے زیادہ اموات ہو چکی ہیں۔
یورپ میں روزانہ کی بنیاد پر متاثر ہونے والے افراد میں دوگنا اضافہ نوٹ کیا گیا ہے۔ یورپ میں بدھ کو پہلی بار ڈھائی لاکھ سے زیادہ کیسز رپورٹ ہوئے۔ یہاں اب تک تقریباً 90 لاکھ 50 ہزار افراد متاثر اور دو لاکھ 61 ہزار افراد ہلاک ہو چکے ہیں۔