اٹلی میں کیسز کی تعداد 10 لاکھ سے متجاوز، 10 متاثرہ ترین ممالک میں شامل
کرونا وائرس سے بری طرح متاثرہ یورپی ملک اٹلی میں کرونا کیسز کی تعداد 10 لاکھ سے تجاوز کر گئی ہے۔
اطالوی وزارتِ صحت کے مطابق ملک بھر میں گزشتہ 24 گھنٹوں کے دوران 32 ہزار 961 افراد میں وائرس کی تشخیص ہوئی ہے۔
اٹلی میں فروری سے اب تک رپورٹ ہونے والے کیسز کی تعداد 10 لاکھ 28 ہزار ہو گئی ہے جس کے بعد اٹلی کرونا وائرس سے متاثرہ ملکوں کی فہرست میں ابتدائی 10 نمبروں میں شامل ہو گیا ہے۔
بدترین متاثرہ ممالک کی فہرست میں امریکہ پہلے، بھارت دوسرے اور برازیل تیسرے نمبر پر ہے جب کہ باقی ممالک میں روس، فرانس، اسپین، برطانیہ اور دیگر شامل ہیں۔
اٹلی میں کرونا وائرس سے اب تک 42 ہزار 953 اموات رپورٹ ہو چکی ہیں۔ یہ تعداد یورپ میں برطانیہ کے بعد دوسرے نمبر پر ہے۔
ایران کے سب سے بڑے قبرستان 'بہشت زہرہ' پر شدید دباؤ
ایران کے دارالحکومت تہران میں ایک بہت بڑا قبرستان موجود ہے جسے ملک بھر میں قومی حیثیت حاصل ہے۔ اس قبرستان میں جنگوں میں اپنی جانیں قربان کرنے والے فوجی، ملک کی اہم شخصیات، فن کاروں، دانش ور اور کئی قومی رہنما آسودۂ خاک ہیں۔ اور اب کرونا وائرس کے پھیلاؤ نے اس کی اہمیت کو مزید بڑھا دیا ہے۔
اس قبرستان کو گزشتہ 50 سال سے زیادہ عرصے کے دوران زیادہ اہمیت حاصل ہوئی ہے جب ملک کو جنگوں، شورشوں اور بدامنی جیسے مسائل کا سامنا کرنا پڑا اور یہ قبرستان اس دوران ہلاک ہونے والوں کی آخری آرام گاہ بنا۔
تاہم کرونا وائرس کے بڑھتے ہوئے کیسز اور اس کے نتیجے میں ہونے والی ہلاکتوں کی وجہ سے اس قبرستان پر اتنا دباؤ اور بوجھ کبھی نہیں پڑا جس کا اسے ان دنوں سامنا ہے۔
امریکہ میں ریکارڈ ایک لاکھ 44 ہزار سے زیادہ کیسز رپورٹ
امریکہ میں ایک روز کے دوران کرونا وائرس کے ریکارڈ ایک لاکھ 44 ہزار سے زیادہ کیسز رپورٹ ہوئے ہیں۔
مریضوں کے نئے اضافے کے بعد امریکہ میں کیسز کی مجموعی تعداد ایک کروڑ چار لاکھ سے زائد ہو گئی جب کہ اب تک دو لاکھ 41 ہزار 809 اموات رپورٹ ہو چکی ہیں۔
علاج معالجے کی غرض سے اسپتالوں میں داخل ہونے والے مریضوں کی تعداد میں بھی مسلسل اضافہ ہو رہا ہے۔
بدھ کو کم از کم 64 ہزار 939 افراد مختلف اسپتالوں میں داخل ہوئے جو وبائی مرض کے دوران اسپتال میں داخل ہونے والے مریضوں کی اب تک کی سب سے بڑی تعداد ہے۔
یاد رہے کہ امریکہ دنیا میں کسی بھی ملک کے مقابلے میں کرونا وبا سے سب سے زیادہ متاثر ہونے والا ملک ہے جہاں نہ صرف اموات بلکہ کیسز کی تعداد بھی سب سے زیادہ ہے۔
چین میں کرونا وائرس کے 15 نئے کیسز رپورٹ
چین میں کرونا وائرس کے مزید 15 نئے کیسز رپورٹ ہوئے ہیں۔ نیشنل ہیلتھ کمیشن کی جانب سے جمعرات کو جاری بیان میں کہا گیا ہے کہ 15 نئے کیسز میں سے ایک کیس اندرون ملک جب کہ باقی 14 کیسز بیرونِ ملک سے چین منتقل ہوئے ہیں۔
چین میں وبائی مرض کی علامات ظاہر ہوئے بغیر یعنی ایسمٹومیٹک کیسز کو کرونا وائرس کا مرض شمار نہیں کیا جاتا۔
جان پاپکنز یونیورسٹی کے اعداد و شمار کے مطابق چین میں کرونا وائرس کے تصدیق شدہ کیسز کی مجموعی تعداد 91 ہزار 752 ہو گئی ہے جب کہ اس وبائی مرض سے اب تک چار ہزار 742 افراد ہلاک ہوئے ہیں۔